Read Nyishi JON 11 Bible Online

JON 11 - Nyishi bible

JON 11

¹Betani nampam ho doonbo Lajar ngvk hvl eminam nyi ak vcnum. Betani nampam ho Meeri la mwnwg bwrm Marta bunyiv doonum.

²Soq Meeri si At Swg lvpiangam kuty paqyaq tvl mwnwg dumpo dum lvgab neexaqnum; vcil doonbo hv Lajar mwnwg borv.

³Amy tulungv Jisun pui bilwqnum “At Sw, noqg abynam ajinv vc cido.”

⁴Hvbmabde hoqham Jisu tapa tvl benum, “Soq vc si Lajarnvn sig dvb ma hvbmabde Pwnboam yuum dvb nyidwn, hoo soqgv Pwnbog Ko Tuupam yuum dvb nyipan.”

⁵Jisu Marta nvla mwnwg bwrm mamla Lajarnvn abynum.

⁶Lajarg vcnam puiyam tapa tvl mwv loonyi gota mwwg yvkho doobinum.

⁷Kokw so mwv buu tulungam benum, “Kuj Judiyab wkur nuk kuj.”

⁸Buu tulungv birwqnum, “Tomswrbo, oyu maadab kvdaq alo Juhudi tulungv nam wlw hurdwb meegaqnum, no lokta aloqb wkur dvb mwwdwn i?”

⁹Jisu birwqnum, “Aal loo hv mood wyw leq vnyig dooma dvn i? Hoqgab hiyv nyiv aal huto ho wgaq bov duqtubl geqma dvn, hoggab mwv soq gvda gvtwg hutongam kaapa dvn.

¹⁰Hvbmabde ai kanam gaqn bov mwv duqtubl geqdwn, hoggab mwv huto doogma.”

¹¹Sam bexo kokw so bulam benum, “Ngulug ajin Lajar yubngaql doodu do, hvbmabde ngo mwam muu taab wtayin.”

¹²Buu tulungv birwqnum, “At Sw, mwv yubngaql dood nyiloqkam mwv al sui kuco.”

¹³Hvbmabde Jisug benamv Lajar sin kubak hvl benum, ham bulug mwwnamv Lajar yubl doodu dvngo mwwnum.

¹⁴Ho Jisu bulam bitw kwlwl bekinam, “Lajar sipa ku;

¹⁵Hvbmabde ngo mwwg lvgab doomin gvmanam hv al tvbnyi, ngo hemp mwwpa do, hoqgab nulv mwwjw tayin. Hoqgab mwwg dookub ngulv wnuj.”

¹⁶Tomas, Bwwpiamnam, mwwg buu ajin tulungam benum, “Kuj, ngulv kam wnuj, ho ngulv mwwg lvgab siba taaj.”

¹⁷Hwdlo Jisu wcwl kaaknamv Lajarnvn aal loopy otuqho svma liitkul dooknum.

¹⁸Jerusalem hoqgv Betani ngv mail dvvnyi gob nyinum.

¹⁹Juhudi nyiv vigo Marta nvla Meerinvn bulug bor gab bet-bela taab haanum.

²⁰Hwdlo Marta Jisu haadwk hvl benam puiyam tapa tvl mwn Jisun kaatab wnum, hvbmabde Meeri nam hv doonum.

²¹Marta Jisun benum, “At Sw, no so doonyiloqkam ngoqg borv simab dookam subaco!

²²Hvbmabde sam ngo cengdwn sijakam nam Pwnbov noqg konam mam mwv nam jitayin.”

²³Jisu mwnwn benum, “Noqg borv lokta turkur tayin.”

²⁴Marta mwam birwqnum, “Ngo cengdo kolam turkur de aalam mwv lokta turab taikun.”

²⁵Jisu mwnwn benum, “Ngo turkur dvb la swwgv. Ngam mwwjwbo akv sijaqkam swwtayin;

²⁶hoo simab dootwl nam mwwjw bov nywywngam siram. No sam mwwjw dvn?”

²⁷Mwn mwam birwqnum, “Vv, At Sw, ngo mwwjwdvn. Ngo nam Ywwnbo akv ho gvda gvtwb haady bo Pwnbog Ko Tuupv mwwjwdvn.”

²⁸Sam bexo kokw so Marta wkur banv mwnwg bwrm Meerinvn goqsil goqbnv benum, “Tomswr bov haapa ku, hoo nam mwv goqdo.”

²⁹Meeri ham tapa tvl cox alwb gorab banv mwam kaatab wnum.

³⁰Jisu sija godab nampam ho hvvc maadab Marta mwam kaapa ko ditaqho doonum.

³¹Hwdlo Meerinvn namho bet-belal doonbo Juhudi tulungv mwn cox alwb gorab banv wnam mam kaatwl mwn nyubwb wl xabtab wde nago mwwnyia banv bulv kokw kokwb wmin gvnum.

³²Hwdlo Jisug dookam wc yikho Jisun kaapa tvl mwwg al lwkwho geqpwl benum, “At Sw, no so doonyiloqkam ngoqg borv simab nyispaco!”

³³Hwdlo Jisu mwnwg xabnam mam la ho mwnwg lvgab haamin gvnbo Juhudi tulug xabnam mam kaatwl mwwg hangv vc banv hvvdwq mwwpanum.

³⁴Hoo bulam toxnum, “Hogloqho mwwg svmangam nulv liipan?” Bulv birwqnum, “At Sw, haagdvl kaato.”

³⁵Jisu xabnum.

³⁶Ho Juhudi tulungv benum, “Kaaka to mwv hog hwdgo mwam abynum!”

³⁷Hvbmabde bulv tuugin benum, “Mwv nyiqca bo vnyiqngam mvko jimanum i, hvnyiloqkam mwv Lajarnvn sim maab mutur nyoyin maanum i?”

³⁸Lokta hangv cwqla kumab mwwdwq kunv Jisu nyubu dookub wnum. Hoq nyubu hv lwwpwqb nyinum, ho wlw pwg ungngam ngurtumnum.

³⁹Jisu benum, “Wlw alam ngurginto. Nyi sikbo amiv, Marta mwam benum, “At Sw, naiyangv suutai, Mwam svma liiknamv aal loopy duku.”

⁴⁰Jisu mwnwn benum, “Ngo nam bemanam i, Pwnboam yuunam mam no mwwjw bvnyiloqkam kaapa tayin hvl ngo bekin maanum i?”

⁴¹Ho bulv wlwngam ngurginum. Jisu aob koodul benum, “Ngo nam paqyalinco hvdwn, no ngoqg benam mam tadwn.

⁴²Ngo cengdwn no looxiam ngoqg benam mam tadwn, hvbmabde ngo sam nam kogdvn si no ngam kanam bov hvl ngoqg dook so sija daqnbo nyi tulungam mwwjw mvdwb mwwl kogdvn.”

⁴³Sam bexo kokw so mwv vc alwb sogoql benum, “Lajar agab lengtku!”

⁴⁴Sikbo nyiv mwwg al-alaqngam svma tumnan vjv tumtw paqtwl nyubu hoqgv agab lengnum, hoo mwwg nyuqm mam vj ko ak putumnum. Jisu bulam benum, “Toosuqtvl mwam wmto.”

⁴⁵Meerinvn kaatab haanbo Juhudi nyiv vigo Jisug nyinam wnam mam kaatwl mwam mwwjwnum,

⁴⁶hvbmabde tuugin Parisi tulug dookub wkur kunv bulam Jisu hog nvkvxeq nyinum ham bekinnum.

⁴⁷Ho Parisi tulu ngvla nyub buda tulungv Dookum koi al doobnv benum, “Ngulv hoggv mvdwn? Hoggab soq nyi si swrdorxeqkv vigo nyido.

⁴⁸Ngulv mwam hvraqb nyim bvnyiloqkam nyi vxiv mwam mwwjw tayin, hoo Roman nyiv haal kaatwl ngulug Xumk nammam la ngulug gvdangam naareq tayin.”

⁴⁹Hvbmabde bulug pengko hoqgv Kaiyapasvk hvl eminam akv, hoq vnywho nyub butwb swwnum, mwv benum, “Nulv hog gokam cengma!

⁵⁰Nulv mwwdar maad nvi yv, nyob lupwngv simmam lingsam nulgab nyi akin gon sinamv alyadwn.

⁵¹Hvbmabde soq agam sam mwv at galoqkv mwwsul bemanum, hvbmabde hoq vnyw ho mwv nyub butwb swwgam gab, Jisu Juhudi nyi tulu gab sitanam mam nyiqry bebnv begol apnum,

⁵²hoo bul gab twqma hvbmabde gvda gvt mwlwho cwrsaq twqb gaqkar yvnbo tulungam olumgob, bookum dvb nyitayin.

⁵³Ho hoq aal jaq hoqgv Juhudi tulungv Jisun mengdwb hwwknv birwql ap kunum.

⁵⁴Hoqgab Judiya gvda hoqgv Juhudi nyi tulug dookho gaqkar yvkmab deexa-rara ogumho doonbo Iprayim bopamb wknv mwv buu tulug lvgab doobanum.

⁵⁵Ho Juhudi tulug Nyedarko Durum moodv hvvnwq kunum, hoqgab nampam hoqgv nyiv vijaqg Durum otuqb atam nyedar darxaq kotab Jerusalemb wnum.

⁵⁶Bulv Jisun meekar banv doqkum-doqlum ywwtwl bemin sunum, “Nulv hoggub mwwdo? Mwv jvqtw jaqb soq Durum so haram yu, ma haatayin?”

⁵⁷Hvbmabde nyub buda tulungv la Parisi tulungv gaml jil apnum, hiyv akgon Jisug dookam cengnbov bulam cengm tvk hvl benum, ho bulv mwam nootu dvb.