Read Nyishi JON 13 Bible Online

JON 13 - Nyishi bible

JON 13

¹Dvtv Durum aalv hvvc maada dvk aal loogwn ho Jisu mwv soq gvda gvt sam apaqpel mwwg Abwg dookub wd moodv haapa ku hvl cengknum. Mwv mwwg atwg nyi tulungam looxiam anyanum, hoo bulam mwv moodv wnam gob abynum.

²Jisu la mwwg buu tulungv ariyum dookum banv dudul doonum. Ho uiyv Simon gv ko Judas Iskeriotg hang uraho Jisun nyepin mvdwb hvl sup pul apnum.

³Jisu cengnum Abv mwam ator mwlwngam mwwg alaqho jipan; hoo mwv Pwnbog hoqgv haanum hoo mwv Pwnbog dookub wdul doonam mam cengnum,

⁴Jisu tebol hoqgv gorabnum. Mwwg aoho lvlwq koonam mam pixiatvl, vj poqtam ak naalayil, mwwg hwwpoho puucwnum.

⁵Ho mwv issam pukaq gol meeg pwptvl mwwg buu tulug lvpiangam hwrxaqtvl vj poqtamv bulug lvpiangam niip jinum.

⁶Mwv Simon Pitorg dookub haaikam Pitor mwam benum, “At Sw, ngoqg lvpiangam hwrxaq tadwn i?”

⁷Jisu mwam birwqnum, “Ngo sija hognvkv nyidul doodwn ham no cengram hvbmabde kokwngam no cengtayin.”

⁸Pitor mwam benum, “No ngoqg lvpiangam hwrxaq dvb nyiram!” Jisu mwam birwqnum, “Ngo noqg lvpiangam hwrxaq maabnyiloqkam no ngoqg buu ma.”

⁹Pitor mwam benum, “At Sw, hvnyiloqkam ngoqg lvpiangam hwrxaq twqmab! Hvbmabde ngoqg alaqkam la dumpongam kam hwrxaq tvb!”

¹⁰Jisu mwam benum, “Gv hwrxaq kunbo nyi akv dvrwq cojor dukun hoo mwv hwrxaq dvb nyimadvn, hvbmabde lvpiangam hwrxaq dvb nyituqdvn. Nul mwlwngv dvrwqbo nyiv, hvbmabde akwn dvrwq ma.”

¹¹Hiyv mwam nyepin tayin ham Jisu cengnum, hoqgab benum, “Nul mwlwngv dvrwqbov, hvbmabde akin gon dvrwq ma.”

¹²Mwv bulug lvpiangam hurs suxo kokw so Jisu mwwg lvlwqngam pilwq kunv tebol ho hookurnum. Mwv toxnum, “Ngoqg nulam nyinam sam nulv cengpa i?

¹³Nulv ngam Tomswr boa hoo At Sw hvl goqdo, hv nulgab kvtaqdo, hoggab ngo jaqsu.

¹⁴Ngo nulug At Sw la Tomswr bob nyitwl ngo nulug lvpiangam hwrxaqnam hvbkalam nulvkam akwn akwn lvpiangam hwrxaq minsto.

¹⁵Ngo nulam kaag dvb nyinam ak nyiswr peen hoq sam nulvkam ngoqg nyinam hvbkalam nyila ka.

¹⁶Ngo jvqtw jaqb nulam bekin dvn, “Nyerangv mwwg atam koi yaama dvn; hoo pui baqyabo akv mwam kanambo akam koi yaama dvn.

¹⁷Nulv sam cengtwl nyib nyiloqkam hvvjaq lak nulug hemp pos jaqkv!

¹⁸Ngo nul mwlwngam bema sulak; ngo cengdwn hiyam ngo xuqpa kun. Hvbmabde Dvrwqbo potalo xeqnam mam niqtuq nyilin tayin. ‘Hiyv ngoqg dvsam dvnbo nyi akv ngam lvpia caarab dujabnum.’

¹⁹Sija ngo nulam hog nyima daab bekin dvn, ho hwdlo kokwngam soq si nyiyi kukam ngo kunyi hvl nulv ngam mwwjw kamyi nvp.

²⁰Ngo jvqtw jaqb nulam bekin dvn. hiyv xeq ngoqg kanamnam mam svgagvrwq bov ngam svgagvrwq dvn, hiyv xeq ngam svgagvrwq dvn hv ngam kanambo akam kam svgagvrwq dvn.”

²¹Jisu sam bexo kokw so mwwg hangv mwwdwq alnum, hoo mwlwngv tadwb mwv benum. “Ngo nulam jvqtw jaqb bekin dvn, nulug akgon ngam nyepin pingpaq tayin.”

²²Buu tulungv akwn akwn kaagab kaarabnum, mwv hiyvg pagoqkam bedwn ham cengmab kvvkwq-tvwqnum.

²³Buu tulug pengko ho Jisug abynam akv Jisug tebol bviyoqho doonum.

²⁴Simon Pitor mwam mvdin banv benum, “Mwam toxto hiyam mwv bidu dvn.

²⁵Hoqgab buu tulungv Jisug ogumb xwwnwq banv toxnum, “At Sw, hiyv hoq nyi akv?”

²⁶Jisu birwqnum, “Ngoqg wtwngam pvtaq uraho swbum tvl jinam nyi akv mwv.” Ho mwv wtw taqg naabnv subum tvl Simon gv ko tuup Iskeriot Judasnvn jinum.

²⁷Judas wtwngam naada kalam uiyv mwwg hang uraho haaknum. Jisu mwam benum, “Noqg nyis doonam mam vnwqb no nyitku!”

²⁸Tebol hoq doojinv hiyvkam hoggub Jisu sam mwam benum ham tacin maanum.

²⁹Judas twngk uddum mam kaaya bo gab, buu tulungv hvb mwwnum Jisu lokam mwam durum gab nyin wndvb hog rvtak hvl bis dvco mwwnum, hvbmab nyiloqkam lokam jwwgw tulungam hogloq meeg jitwk hvl mwv mwam begdvn go mwwnum.

³⁰Judas wtwngam nvvrwqpel cox alwb agab lengknum. Hoo ai kanwb nyiknum.

³¹Judas wleqro kokw so Jisu benum, “Sija Nyia Ko Tuupwg yuudynamv lengpa ku; hoo Pwnbov mwwg galoqkv yuun kunum.

³²Pwnbog yuunam mam mwwg galoqkv kaapa baloqkam Pwnbov kam Nyia Koam mwwg galoqkv yuum tayin, hoo dara mwam yuum tayin.

³³Ngoqg ko tulu, ngo nulug lvgab oyu haajaq go dooba kuram. Nulv ngam meekar tayin, hvbmabde Juhudi tulungam benam mam nulam sija ngo bekin dvn. Ngo hogloqb wdu dvn nulv haanyiram.

³⁴Ngo nulam pvvb nit ak beg yin, akwn akwn aby mins laka: ngoqg nulam abynam hvbkalam nulvkam akwn akwn abymins laka.

³⁵Nulug pengko ho akwn akwn aby minsbaloqkam nulam nyi mwlwngv ngoqg buu gonyi hvl cengtayin.”

³⁶Simon Pitor mwam toxnum, “At Sw, no hogloqb wdeen?” Jisu mwam birwqnum, “Ngo sija hogloqb wdeen no hoqb ngoqg kokwb wnyiram, hvbmabde no kokwngam wmin gvtayin.”

³⁷Pitor toxnum, “At Sw, ngo hog nyitwl noqg kokwb wnyiram? Ngo noqg gab sid bvkam mwwdwn.”

³⁸Jisu birwqnum, “No jvqtw jaqb ngoqgab sidwb mwwjw jaqdvn i? Ngo jvqtw jaqb bekin dvn; poroqngv xoqma daab no ngam cengma hvl luum go vm mvvtayin.