Read Nyishi JON 15 Bible Online

JON 15 - Nyishi bible

JON 15

¹“Ngo roo annv, hoo ngoqg Abv rongo atv.

²Mwv aaxy xeema bo haqb hvqxiam ngoqg hoqgv pal hurxa dvn, hoo aaxy xeenbo haqb hvqxiam, aaxy vigo xeem dvb paxaq banv mvxaq gvdvn.

³Ngo nulam pui bekinko gab nulv dvrwq dukun.

⁴Ngoqg uraso dooto, hoo ngo kam nulug uraho dootayin. Nulv ngoqg uraso dooma baloqkam roo haqbv svvnlo guugab dooma yukam aaxy xeema dvn, hoq hvbkalam nulv aaxy xeenyiram.

⁵“Ngo roo annv, nulv haqbv. Hiyv xeq ngoqg uraso doodwn hoo ngo mwwg uraho doodwn, mwv vigo aaxy xeetayin, hoggab ngam apaqpel nulv hog akkam nyinyi ram.

⁶Hiyv lajaqkam ngoqg dookub dooma boam svvn haqbam pal hurxa tvl hoo sempaq mvnam hvb mvtayin, hoo haqb tulungam dorkum layil wmho joolwqtvl parxianum.

⁷Nulv ngoqg uraso doobaloqkam, hoo ngoqg agamv nulug uraho dooba dvn, hoo nulug kob mwwnam mam hog mwlwngam nulv kobnyiloqkam ham nulgab nyijtayin.

⁸Soq sib lak nyil ngoqg Abwg yuunam mam kaakin dvn, hoo nulv vigo aaxy xeeb nyiloqkam ngoqg buungv hvl kaacin dvn

⁹Ngo nulam ngoqg Abv ngam abynam hvbkalam aby dvn, hoqgab nulv ngoqg abyko uraho dooto.

¹⁰Nulv ngoqg gaml benam mam pvvb nyiloqkam, nulv ngoqg abyko uraho doodwn, ngo ngoqg Abwg gaml benam mam tabnv mwwg abyko uraho doonam hvbkalam nulv dootayin.

¹¹“Soq nulam ngoqg beg dvn si ngoqg hempam nulgab doom dvb hoo nulug hempam niqtuq polin mvdwb mvdwn.

¹²Soq si ngoqg gaml benamv. Ngo nulam abynam hvbkalam, nulv akwn akwn abymins laka.

¹³Atwg ajin tulungam aby banv bulug sidub sinam ham koi yaanbo abynam dooma dvn.

¹⁴Nulv ngoqg nyitwk hvl gaml benam mam tatwl nyib nyiloqkam nulv ngoqg ajinv

¹⁵Ngo nulam sija nyerangv hvl lokkam goqkram, hoggab nyerangv mwwg at dor hoq nyinam mam cengmadvn; hvbmabde ngo nulam ajina hvl goqgdvn, hoggab ngoqg Ab galoqkv ngo hog mwlwngam tapanam mam nulam cengm dvb bekin tukun.

¹⁶Nulv ngam xuqmanum, hvbmabde ngo nulam xuqnam hoo xuqlinum tulungv wl vigo aaxy xeem dvb hoo nulug aaxiam dooyu mvdwb, hoqgab nulv Abam ngoqg eminho hog mwlw kobnyiloqkam, mwv nulam jiyi nvpv.

¹⁷Hoqgab ngo nulam soq gaml tulu sam begyin, nulv akwn akwn abymins laka.

¹⁸“Gvda gvtv nulam oyum baloqkam, nulv sam mwwgab yaka, bulv nulam oyum maadab ngam otuqcob oyum dvn.

¹⁹Nulv gvda gvtwg nyiib nyinyiloqkam gvda gvtv nulam atwg nyi hvb aby sudco. Hvbmabde ngo nulam gvda gvt soqgv xuqlin pan, hoqgab nulv gvda gvt soq nyiib nyikma; hoqgab sulak gvda gvtv nulam oyum sudwn.

²⁰Ngo nulam gomcwr bekinam mam mwwgab tvka, “Nyerangv mwwg atam koi yaama dvn; bulv ngam mvnyi-mviyal mvbaloqkam nulam kam hvb mvi nvpv. Bulv ngoqg puiyam mwwjw baloqkam nulug puiyam kam mwwjw tayin.

²¹Hvbmabde bulv soq mwlw sam nulam ngoqg emin gab nyitayin, hoggab bulv ngam kanambo akam cengma.

²²Ngo haal bulam bemaloqkam, bulug nyic nyiangv lengram, hvbmabde bulv sija bulug nyic nyiangam kvsko dook ma.

²³Hiyv xeq ngam oyum dvn ngoqg Abam kam oyum dvn.

²⁴Ngo bulug pengko ho haal nyiig lokkam nyis nyimanam mam nyima loqkam, bulug nyic nyia nyinamv lengram, hvbmabde bulv ngoqg nyinam mam sija kaatwl ngam la ngoqg Abam ngunyiam oyum dvn.

²⁵Hvbmabde bulug pvvblo gomcwr xeqpnamv hoggub nyijaqkam niqtuq nyilin dvb nyinum: ‘Bulv yolu doomab ngam oyumnum.’

²⁶“Hvbmabde ngo Ab galoqkv Dvrwqbo Yalam nulam Svka boam nulgab kanam tadvn. Mwv jvqtwg Yalv, hoo mwv ngoqg puiyam bekin tayin.

²⁷Hoo nulvkam puiyam baqtayin, hoggab nulv ngoqg lvgab nyirab dvk hoqgv jaq dooba pan.