Read Nyishi JON 18 Bible Online

JON 18 - Nyishi bible

JON 18

¹Jisu xumxo kokw so mwv mwwg buu tulug lvgab Kidron lywpa kvtin gonwb rabnum. Hoqho boolu ak dootwl hoo Jisu la mwwg buu tulungv urab haanum.

²Ho Jisun nyepinbo Judas hoq nyookam mwv cengnum. Hoggab Jisu mwwg buu tulungam hoq ditaqho lokub yvnum.

³Hoqgab Judas mwwg lvgab sipai pvtw twwg la Nyub Buda tulungv la Parisi tulungv kanam mam xumk nam hoq rvkybo nyi acam go boolu urab haanum. Bulv svtam mvla wm mur bwtwl haanum.

⁴Hvbmabde Jisu mwam hog nvkvxeq nyitayin ham hog mwlwngam mwv cengnum. Hoqgab mwv bulug dookub wnwq banv bulam benum.

⁵“Nulv hiyam meekar dvn,” bulv birwqnum “Najaretwg Jisun.” Mwv birwqnum, “Ngo lak mwv.” Nyepinbo Judas bulug lvgab daqnum.

⁶Jisu bulam benum, “Ngo lak mwv” hvl bekinam mam tatwl bulv langkwb wkurnum hoo ked ho geqpnum.

⁷Ho Jisu lokta bulam toxnum, “Nulv hiyam meekar dvn?” Hoo bulv birwqnum, “Najaretwg Jisu.”

⁸Jisu benum, “Ngo nulam kajo kulak nyook hvl betam tukun. Nulv ngam meekar dvn nyiloqkam soq nyi asaq tulu sam wxo mvto.”

⁹Soq benam si nyiloqkam mwwg bepwl ap kunam mam jvqtw jaqb niqtuq nyilin mvdwb benum, “Ab noqg ngam jinam mam ngo akin gonkam niim ma.”

¹⁰Ho Simon Pitor orioq daag buqnum, mwv orioqngam seqlin banv Nyub Butwg nyera hoqg nyuru rubwqngam xaqxianum, (Nyera ak hoqg eminv Malkus.)

¹¹Jisu Pitornvn benum, “Noqg orioq ham buqxaho xwqlwq tuku. Abwg ngam jinam hentwr pvtaqlo ngo twwdwb nyima dvn hvl no mwwdwn i?”

¹²Sipai pvtwngv bulug saabv la Juhudi tulug rvky bov Jisun nootu banv leenum.

¹³Hoqgv otuqjaqb mwam Annaswg dookub boanum. Mwv hoq vnywho Nyub Butub swwnbo Kaiyapaswg atwb nyinum.

¹⁴Juhudi tulungam Kaiyapas nyi mwlw gab nyi akin gon sinam yaangv aldvnwk hvl tomswrnum.

¹⁵Simon Pitor la buu akwn Jisug kokw kokwb wmin gvnum. Buu akwn ham Nyub But akv hindib cengam gab mwv Jisug lvgab Nyub But nam xaqb haamin gvnum.

¹⁶Hvbmabde Pitor haty bviywrho daqnum. Nyub But ak hoq cengkynam Jisug buu akv lingkur banv yabg hoq daqnbo nyem ko akam benum, Pitornvn urab boolwq tvk hvl benum.

¹⁷Yabg hoq daqnbo nyem ko akv Pitornvn benum, “No kam aloq nyi aloq buu tulug pengko ho akwn ma i?” Pitor birwqnum, “Ma, ngo ma.”

¹⁸Hoq apoho swkwrnum, hoqgab nyera tulungv la rvkybo tulungv mer hoq wm pargab tvl hingdul daqdunum. Pitor hoqb haabnv bulug lvgab mwv kam wm hingdul daqdunum.

¹⁹Nyub But akv Jisun mwwg buu tulug pagoqkam la tomswrko pagoqkam toxnum.

²⁰Jisu mwam birwqnum, “Ngo looxiam nyi mwlwngv tadwb gootwn, ngo Sinagog nam hookam hoo xumk nam uraho Juhudi tulungv dookum doopal dook hookam ngo tomswr banv yvnum. Ngo hog gokam bis bepeql betma.

²¹Hvnyiloqkam, no ngam hoggab tox dvn? Ngoqg benam mam tanbo nyi tulungam tox tvke. Bulv cengdwn ngo hog nvkv benum.”

²²Jisu hvl beda kalam rvkybo tulug pengko hoqgv akwn Jisun alaqngv nyuqm mam pitaq tvl benum, “No hoggub hampeq alwb Nyub Butam birwq dvn!”

²³Jisu mwam birwqnum, “Ngo hog bexiaq panyiloqkam hog nvkam bexiaqpan ham bekinto; hvbmabde ngoqg benamv jvqtw jaqb bepaloqkam no hoggub nyitwl ngam jwwdwn?”

²⁴Kokw so Annas mwam hvraqb leedwb Nyub Buda Kaiyapaswg dookub kanamnum.

²⁵Simon Pitor hvraqb wm hingdu banv hoq ditaqho doqdunum. Ho nyi tulungv mwam benum, “No aloq nyi aloqg buu akwn maas i?” Hvbmabde Pitor vm mvvbnv mwv benum, “Ma, ngo ma.”

²⁶Pitorg Nyub Budag nyera akwg nyurungam xaqxianum nyi ak hoqg imiq hoq nyi ak benum, “Nam ngo boolu uraho mwwg lvgab yvnam mam kaapa maanum i?”

²⁷Pitor lokta benum, “Ngo cengmak” hvl beda kalam poroqngv xoqnum.

²⁸Kokw so bulv Jisun Kaiyapaswg nam hoqgv Pilat saabwg nammwb bool wgnum. Hoqhv ar komcib nyiknum. Hvbmabde Juhudi tulungv Pilat saabwg nam urab haal nyic-nyia nyibur maab Nyedarko Durum ho dvba dvb mwwbnv urab haamin gvmanum.

²⁹Ho Pilat bulug dookub lengb nv bulam toxnum, soq nyi si hog nyicv nyipan?”

³⁰Bulug birwqnamv, “Ngulv hoggab soq nyi ak si nyic nyia nyima lo ngulv hoggub nyil noqg alaqb gvqlwq tayin.”

³¹Pilat bulam benum, “Nulv atv mwam boog dvl nulug atwg pvvb pw-hwwcwb hwwta.” Bulv birwqnum, “Ngulv nyiingam sim tvk hvl gaml jidwb ator dooma dvn.”

³²Soq sib nyinam si nyiloqkam Jisug mwv hoggub nyil sitayin ham bepnam ham jvqtw jaqb niqtuq nyilin dukub nyimpan.

³³Pilat nam urab hookur banv Jisun goqbnv toxnum, “No Juhudi tulug Lvpw Atv jaq yv?”

³⁴Jisu birwqnum, “No noqg atwg galoqkv toxdvn yv ma nyi asaqkv nam ngoqg pagoqkam bekin tvl bedwn?”

³⁵Pilat birwqnum, “No ngam Juhudi nyiv mwwd nvi yv? Noqg atwg nyiv la Nyub Buda tulungv sulak nam ngoqg alaqb gvqlwqnum. No hognvkv nyijpan?”

³⁶Jisu birwqnum, “Ngoqg lvpw-hativ soq gvda gvt so dooma; ngoqg lvpw-hativ soq gvda gvt so doonyiloqkam ngoqg buu tulungv nyob pal Juhudi tulug alaq hoqgv naalin supaco. Hvbmabde ngoqg lvpw-hativ soq gvda gvt so dooma.”

³⁷Pilat mwam toxnum, “Hvnyiloqkam no lvpw atv i?” Jisu birwqnum, “No lak ngam Lvpw Atv hvl bedwn. Ngam ko bwwnamv hoo ngoqg gvda gvtwb haanamv jvqtwngam bekin taab haanum. Jvqtwb swwn bov ngoqg agam mam tadwn.

³⁸Pilat agab lokta lengb nv Juhudi tulungam benum, “Hoggv jvqtwngv?” Ngo mwam yolu doonam meepa ma.

³⁹Hvbmabde nulug nyicw ak doodwn, ngo Nyedarko Durum dwd aalam pvtwqho doonbo nyi ak nulgab tolin dvn. Hoqgab Juhudi tulug Lvpw Atam nulgab ngam tolin mvto mwwdwn i?”

⁴⁰Bulv sogoql birwqnum, “Ma mwam ma, hvbmabde Barabasnvn tolinto.!” (Barabas nyi galoqkv naalil naanbo nyib nyinum.)