Read Nyishi JON 19 Bible Online

JON 19 - Nyishi bible

JON 19

¹Ho Pilat Jisu boolinl hoo mwam xipwql mvnum,

²Hoo sipai tulungv taag ywr dumtup ak mvtwl mwwg dumpo hv tulwqnum. Ho bulv lwwsa-lwwma bo lvlwq rumg mwam koomnum.

³Mwwg ogumb wnwq banv benyanum, “Juhudi hvdwg Lvpw Atv swwiyu nvka!” hoo bulv wnwq banv mwam alaqngv pitaqnum.

⁴Pilat lingkur banv nyi tulungam benum, “Kaaiya to, ngo sija mwam nulug dookub agab boolin tayin, hoo nulam ngo mwwg aoho dod yolu meepa maak hvl nulam kaakin tayin.”

⁵Jisu taag ywr dumtup pam la lwwsa-lwwma bo lvlwqngam kootwl agab lengnum. Pilat bulam benum, “Kaato siilak nyi akv!”

⁶Ho Nyub buda tulungv la rvkybo tulungv mwam kaatwl bulv sogoql benum, “Mwam daapo tol dvvcw silo lvgab taqtin to! daapo tol dvvcw silongv taqtin to!” Pilat bulam benum, “Nulv mwam boog dvl daapotol dvvcw silo lvgab taqtin gvdwl mengta, hoggab ngo mwam mengdwb hog dod yolu meepa ma.”

⁷Juhudi tulungv mwam birwqnum, “Ngulug pvvb ak doodwn, hoo hoq pvvb beab mwv sidwb nyitayin, hoggab mwv atam Pwnbog Ko Tuupvk hvl besdvn.”

⁸Pilat bulug benam mam tatwl mwv meeg yaiya bosnum.

⁹Ho mwv nam urab hookur banv Jisun benum, “No hogloqkv haai yin i?” Hvbmabde Jisu mwam hog gokam birwqmanum.

¹⁰Pilat Jisun benum, “No ngam birwqram i? No cengma dvn yv, ngo nam toxa jid bvkam hoo nam daapo ao tol dvvcw silo lvgab taqtinl mengd bvkam atorv doodwn?”

¹¹Jisu mwam birwqnum, “No ngoqg aoso ator doonyiram nam ao hoqgv jima deedib. Hoqgab noqg alaqho hiyv gvqlwq jinbo nyi tulu hoqg nyic-nyiangv vi yaadwn.”

¹²Pilat ham tatwl mwv Jisun toxa dvb mwwnum. Hvbmabde Juhudi tulungv sogoql benum, “No mwam tolin baloqkam no Lvpw hvdwg Gora abwg ajin ma! Hiyv lajaqkam ngo atv Lvpw atv hvl benbov Gora abwg ceebiongv.”

¹³Ho soq benam sam tatwl Jisun agab boolin banv mwv nyel bebnv dootam ak “Wlw paanam” aohv doonum. (Hibrungv ham “Gabbata” hvl eminum.)

¹⁴Ho doonyiv taab kunum. Soq aal si Nyedarko Durum otuq mwx-mvaqko aalwb nyinum. Pilat ho Juhudi tulungam benum, “Nulug Lvpw at sam kaato!”

¹⁵Ho bulv sogoq goql benum, “Mwam mengxato! Mwam mengxato! Mwam daapo ao tol mengto!” Pilat bulam benum, “Nulug Lvpw atam mengto i?” Ho nyub buda tulungv birwqnum, “Sijar ao hoqgv ngulug Lvpw at dooma dvn.”

¹⁶Ho kokw so Pilat Jisun daapo aoho mengm dukub bulug alaqb gvqlwq kunum. Kokw so bulv Jisun bool wgnum.

¹⁷Hoo mwv daapongam jootwl “Dungk lo Alo” ngvk hvl benam nyookub wnum, (Hibrungv ham “Golgota” hvl goqdwn.)

¹⁸Ho bulv mwam daapo aoho dvvcw silo lvgab taqtinum; hoo bulv nyi vnyi gota Jisug taqg-loosaqho daapo ponyi golo mengnum.

¹⁹Pilat pota taqg xeqtwl daapo aohv tengpnum, “Najaretwg Jisu, Juhudi tulug Lvpw atv hvl xeqpnum.”

²⁰Jisun mengkv bopam hoqgv haajaqb aado maanum, hoqgab Juhudi nyiv vigo hoq xeql tengpnam mam poory nyanum. Hoq tengtaqnamv Hibru, Letin hoo Gwrik agamb xeqnum.

²¹Hvbmabde Juhudi tulug nyub buda tulungv Pilatnvn benum, “Juhudi tulug Lvpw atv hvl xeqmab, hvlaya xeqto, “Soq nyi ak si benum, “Ngo Juhudi tulug Lvpw atv.”

²²Pilat birwqnum, “Hoggv ngo xeqyinam ngo xeqtkun.”

²³Sipai tulungv Jisun daapo aohv dvvcw silo lvgab taqtin xootwl bulv mwwg vjam naabnv mvpin-mvranum hoo sipai vxiv rumsaq twqb naanum. Kokw so bulv mwwg lvlwq kamtam hoiyo dvb cumbunam mam hvmsiq maanam rummam kam naanum.

²⁴Sipai tulungv akwn akwn bemin sunum, “Sam surtu yooju, tak kaag dvl hiyv naadwb nyidwn ham kaaka tuj.” Soq si dvrwqbo potalo xeqnam mam jvqtw jaqb niqtuq nyilin dvb nyiknum: “Bulv ngoqg vjam bulug pengko ho mvpin-mvral naag nukun, hoo ngoqg vj gab bulv tak kaanum,” Hoqgab sipai tulungv sam nyinum.

²⁵Hoq ditaqho Jisug daapo ogumho mwwg ann, mwwg bwrm, Klopaswg nywxw Meeri la Magdalin Meeri daqnum.

²⁶Jisu mwwg abynam buu akam ogumho daqnam mam kaatwl, mwv mwwg annam benum, “Ann, noqg kov islak.”

²⁷Ho buu akam benum, “Islak noqg annv.” Hoqjaq hoqgv buu akv mwam booknv mwwg namho doomnum.

²⁸Jisu hog mwlwngam dvrwqbo potalo xeqnam mam niqtuq nyilin paku hvl cengtwk mwv benum, “Ngam hvngwr pa.”

²⁹Hoq ditaqho opo pooxu bo dootwl bulv hissop svvn toolo golo hiipungv cabgab tvl opoho subum tvl mwwg agamb hwca jinum.

³⁰Ho hoq pooxu bo opongam twwka tvl mwv benum, “Hvvkbo hvnum!” Kokw so mwv pvxw kunv siknum.

³¹Ho Juhudi tulungv Pilatnvn nyi mengknam lvpiangam pvtwr tvl bulam daapo ao hoqgv joopoq mvtbvk hvl gaml konum. Hoggab hoq aalhv loong deen aalwb nyigam gab bulv svmangam Doonu dvk aalho daapo aoho doom nwmanum, hoggab haata bo Doonu dvk aalho mwlwjaqkam dvrwqbo aalwb nyinum.

³²Ho sipai tulungv wbnv Jisug lvgab daapo ho mengnam nyi vnyi-vnyig lvpiangam pvtwrnum.

³³Hvbmabde bulv Jisug dookub haal kaaknamv sitkul doonum. Hoqgab bulv mwwg lvpiangam pvtwr maanum.

³⁴Hvbmabde sipai akwn Jisug rumbum mam nwwxongv nwqlwqnum, hoo nwqda kalam uiyv la issiv tolinum.

³⁵Soq nyinam sam kaanbov jvqtw jaqb benum, mwwg gon si jvqtw gojnyi, hoo ham kam cengdwn mwwg benam si jvqtwngam bidu dvn, hoo nulam kam mwwjw kamyi nvpv.

³⁶Soq sib nyinam si dvrwqbo potalo xeqp kunam mam jvqtw jaqb niqtuq nyilin mvdkub nyinum. “Ngoqg alo buukin gonkam pvtwr dvb nyiram.”

³⁷Dvrwqbo potalo hvlkam xeqnam ak doodwn, “Nyi tulungv bulug nwwxo nwqnam akam kaagab tayin.”

³⁸Soq kokw so Arimatiya bopam hoqgv Josap ngvk hvl benam nyi akv Pilatnvn svmangam naam tvbwg hvl konum. (Josap Jisug buu ak gon su, hvbmabde Juhudi tulungam bosil buu swwsil swwnum.) Pilat mwam svmangam naatwk hvl benum, hoqgab Josap wbnv svmangam jool wgnum.

³⁹Otuqho aal golo Jisun kaatab wnbo Nikodimas kam Josap lvgab wbanum. Mwv mirr hoo alos ngvk hvl benam hoq mviyotvl nvmnyi bov sar camkvn leq ang go bwanum.

⁴⁰Ho bunyiv Jisug svmangam joopoq banv topum vj golo tumtwl Juhudi tulug liicib liinum.

⁴¹Jisun mengk ditaqho boolu ak doonum hoq boolu ho lokkam svma liika maanum nyubu nit ak doonum.

⁴²Hoq aalhv Juhudi tulug Doonu dvk aalwg mwx-mvaqko aalwb nyigam gab bulv svmangam hoq ogumho doonbo nyubu ho liiknum.