Read Nyishi JON 20 Bible Online

JON 20 - Nyishi bible

JON 20

¹Doonu dvk arkomc kan twdwq dvb Meeri Magdalin nyubu ung hoqgv wlwngam ngurgin apnam mam kaapanum.

²Ho mwn xorkur banv Simon Pitor nvla buu tulungam la mwwg abynam akam bekinnum, “Bulv At Swn nyubu hoqgv joog nukba, hoo bulv mwam hogloqb ap sugnuk nvbadwq ham ngulv cengkma!”

³Kokw so Pitor la buu tuugin nyubwb wnum.

⁴Bulug vnyi gon xarnum, hvbmabde akwn Pitornvn otuqyab nyubu hv xarc coonum.

⁵Hoo mwv nywar banv vjam kaapanum, hvbmabde mwv nyubu urab haamanum.

⁶Mwwg kokwb Simon Pitor haamin gvnum, mwv nyubu urab hvvs haadal haanum. Mwv topum vjam la Jisug dumpongam pubum nan vj jeliangam kaapanum.

⁷Vj jelia rummv topum lvgab doomanum. Hvbmabde atv geqgin tvl doonum.

⁸Kokw so otuqjaqb nyubungam wc coonbo buu akv urab haabnv kaatwl mwwjwnum.

⁹Bulv sija godab Dvrwqbo potalo mwv sinam hoqgv turkur tayin hvl xeqnam mam tacin maanum.

¹⁰Kokw so buu tulungv nammwb wkur kunum.

¹¹Meeri xobdu banv nyubu bviywrho daqnum. Mwn xabjo ywwtwl pvxw banv nyubu urab kaanum

¹²hoo mwn ao gumtw vnyi go vj puulu kootwl Jisug svma dook dumpo lwkw hv akwn hoo akwn lvpia lwkw hv doodwb kaapanum.

¹³Bulv benum, “Nyem, no hoggub xabdwn?” Mwn bulam birwqnum, “Nyi tulungv ngoqg At Swn naag nukba, bulv mwam hogloq nyook hooya ap gvnkun ham ngo cengma!”

¹⁴Mwn hvl bexo kokw so nyikur kaanamv Jisun daqdwb kaapanum. Hvbmabde mwn ham Jisu nago mwwmanum.

¹⁵Jisu mwnwn toxnum, “Nyem, no hoggub xobdul doodwn? No hiyam meekar dvn?” Mwv boolu kan gon go mwwnum, hoqgab mwn mwam benum, “No mwam kaapa nyiloqkam, nyelo, mwam no hogloqb ap pan ngam bekin tvb, ngo wgdvl mwam kaatayin.”

¹⁶Jisu mwnwn benum, “Meeri!” Ho mwn mwwg taqcib doqkur banv Hibru agamb benum, “Rabboni!” (Hvgdvn si “Tomswrbo”).

¹⁷Jisu mwnwn benum, “Ngam gaqka maabv, ngo sija godab Abwg dookub cookur maada, hvbmabde wgdvl ngoqg buu tulungam bekin ta. Ngo noq gvla ngoqg Abwg dookub, ngoqg Pwnbo la noqg Pwnbo dookub cookur deen.”

¹⁸Meeri Magdalin buu tulungam mwn At Swnvn kaapa peenwk hvl Jisug puiyam bulam bekinnum.

¹⁹Ho Doonu dvk ariyumb nyiknum, buu tulungam bos banv lvkin gob hookum banv viyap pam mutum tvl doonum. Ho Jisu haabnv bulug pengko ho daqtwl benum, “Swrsomalongv nulug lvgab doon ka.”

²⁰Sam Jisu bexo tvl alaqngam la rumbum mam bulam kaatamnum. Buu tulungv At Swn kaatwl hemp ponum.

²¹Jisu lokta bulam benum, “Swrsomalongv nulug lvgab doonka. Ngam Abv kanamnam hvbkalam nulam ngo kanam dvn.”

²²Sam bexo tvl mwv bulug aoho miqbnv benum, “Dvrwqbo Yalam naato.

²³Nulv nyi tulug nyic nyiangam apaq jibaloqkam bulug nyic nyiangam apaq jipa kun. Hvbmabde nulv nyi tulug nyic nyiangam apaq jima baloqkam, bulug nyic nyiangam apaq jima pakun.”

²⁴Buu tulug pengko ho akwn Tomas ngvk hvl (Bwwpiamnam) benam akv Jisu buu tulug dookub haad ho mwv bulug lvgab doomanum.

²⁵Buu tulungv mwam bekinnum, “Ngulv At Swn kaat kun!” Tomas birwqnum, “Ngo mwwg dvvcw silo lvgab taqkonam alaq paiyam kaama lo hoo ngoqg lvqcwngv dvvcw silo lvgab tvqlwq koam piika maalo, hoo ngoqg alaqngv mwwg rumbum mam hubka maalo ngo mwwjwram.”

²⁶Aal piin kokw so buu tulungv lokta nam urahv doonum, hoo Tomas bulug lvgab doonum, bulv viyap pam mutum tvl doonum, hvbmabde Jisu haabnv bulug pengko hoo daqtwl benum, “Swrsomalongv nulug lvgab doon ka.”

²⁷Ho mwv Tomasnvn benum, “Noqg lvqcwngam soq so piika to, ngoqg alaq sam kaaka to; noqg alaqngv ilwq gvdwl ngoqg rumbum sam hubka to. Noqg mwumnam mam apaq tuku, hvbmabde mwwjwto!”

²⁸Tomas mwam birwqnum, “Ngoqg At Sw hoo ngoqg Pwnbo!”

²⁹Jisu mwam benum, “No ngam kaagam gab i mwwjw dvn? Hvbmabde ngam kaamakam mwwjwbo nyi tulungv paqnam jaqkv.”

³⁰Jisu mwwg buu tulug kaagaho vigo swrdorxeqb nyinam mam soq pota so xiqlwq ap kuma pan.

³¹Soq torab sam xeqnam si hvb nyiloqkam nulv Jisu Kriston, Pwnbog Ko Tuupv hvl mwwjw mvdwb, hoo mwwg eminho swwgam kaapa mvdwb hvl xeqpan.