Read Nyishi JON 21 Bible Online

JON 21 - Nyishi bible

JON 21

¹Hoq kokw so Jisu lokta mwwg buu tulungam Tiberiyas swnyiq ho kaatamnum. Mwv soq sib nyil kaakinum.

²Simon Pitor, Tomas (Bwwpiamnam), Galili Kana hoqg Natanael, Jebedig ko tuup tulu, hoo Jisu buu asaq vnyi gon lokub yvnum.

³Simon Pitor bulam benum, “Ngo ngui mengtab wdeen.” Bulv mwam benum, “Ngulv kam noqg lvgab wtayin.” Ho bulv wbnv swp golo caonum, hvbmabde bulv ai yupw hog akkam nootu maanum.

⁴Doonyiv caalin yukam Jisu swnyiq bviywrhv daqnum, hvbmabde buu tulungv mwam Jisu nago hvl cengmanum.

⁵Ho mwv bulam benum, “Yaapa tulu nulv hog akkam nootu ma i?” Bulv mwam birwqnum, “Umaq, hog ak kam nootu ma.”

⁶Ho mwv bulam benum, “Nulug wswq ham swp lvqbwq taqc boso hurlwqto, hoo nulv meeg hurpa tayin.” Bulv wswngam hurlwqnum, kokw so bulv nguiyv vijaqg hurtu yukam seelin nyomab nyiknum.

⁷Hiyam Jisu buu tulu pengko ho abynum akam Pitornvn benum. “Mwv At Sw lak!” Ho Simon Pitor mwv At Swk hvl benam mam tapa tvl mwwg ao hog lvlwq koonam mam pipaq peel, bonam nyita bo hvb nyil, hoo mwv atv sa-svlo urab poqlwqnum.

⁸Buu tulu gon swpwb haanum, ho wswqho ngui rooxo dvb diipwb seelin lengknum, hoggab ked diipv haajaqb aado yoomanum, loqd lwwg gob nyitwqnum.

⁹Hwdlo bulv sugurho lengk banv mer lvgab wm parnam aoho ngui hoq la wtw hoq meeg doodwb kaapanum.

¹⁰Kokw so Jisu bulam benum, “Nulug sija ngui nootunam hoqgv soqb meeg bwato.

¹¹Simon Pitor wbnv swp hoqgv wswq lvgab ngui cirtbov naleqgo sugurho seelinum, wswqho nguiyv lwwg la camg leq cirumgo doonum. Hvb naleq doosjaqkam wswqkam pujeq maanum.

¹²Jisu bulam benum, “Haag dvl dvto.” Hiyvkam mwam, “No hiyv” hvl tox dvb hampeq maanum, hoggab bulv mwam At Sw kunyi hvl cengnum.

¹³Ho Jisu haabnv wtwngam naabnv bulam jinum, hoo hvbkalam nguiyam kam jinum.

¹⁴Sixo kokw so soq si luum dvb Jisu mwwg buu tulungam kaakinum.

¹⁵Bulv dvxo kokw so Jisu Simon Pitornvn toxnum, “Jonwg ko Simon, no ngam hog mwlwngam hilayab abydvn i?” Mwv birwqnum, “Vv, At Sw, no ngam cengdwn ngo nam abydvn.” Jisu mwam benum, “Ngoqg sviya ko tulungam hoodeqto.”

¹⁶Lwnyi dvb Jisu mwam toxnum, “Jonwg ko Simon, no ngam abydvn i?” Mwv mwam birwqnum, “Vv At Sw, ngo cengdwn nam ngo abydvn.” Jisu mwam benum, “Ngoqg sviyangam hoocuml yvgto.”

¹⁷Jisu luum dvb mwam toxnum, “Jonwg ko Simon, no ngam abydvn i?” Ho Pitor mwam luum dvb tox ko-gab mwwr busu banv Jisun birwqnum, “At Sw, no hog mwlwngam cengdo; ngoqg nam abynam no cengdo.” Jisu mwam benum, “Ngoqg sviyangam hoocuml yvgto.”

¹⁸Ngo jvqtw jaqb bekin dvn, “No yaapa yikho noqg vjam no atv koox koorw tvl mwwtaqb noqg wb mwwkub wnum. Hvbmabde hwdlo no nyekam yukun, noqg alaqngam irab jitwl nyi asaqkv nam koox koorw mvtwl, hoo noqg wb mwwma kob nam bool wgtayin.”

¹⁹Jisug soq benam siiloqkam Pitor hoggub nyil sitayin, hoo Pwnboam yuum dvb jitayin ham bekinnum, “Ngoqg kokwb wmin gvto!”

²⁰Pitor nyikur banv hiyam Jisu abynum ham kaapanum, hv bulam wmin gvnum, hiyv akv Jisug ariyum ducum yikho mwwg bviyoqho dootwl, “At Sw, nam hiyv nyepin tadwn hvl toxbo akam kaapanum?”

²¹Hwdlo Pitor mwam kaapa yukho, mwv Jisun toxnum, “At Sw, soq nyi ak si hoggub nyitayin?”

²²Jisu mwam birwqnum, “Ngo mwam ngoqg hookur namgob doom dvb mwwb nyiloqkam, noqg gab hoggv? No ngoqg kokwb wmin gvto!”

²³Ho puiyv Jisug buu tulug pengko ho durab banv begamv soq buu ak si siram hvl benum, hvbsujaqkam Jisu mwam siram hvl bemanum, hvbmabde, “Ngo mwam ngoqg hookur namgob doom dvb mwwb nyiloqkam, nulgab hoggv?”

²⁴Soq buu ak siilak soq puiyam sam baqnum, hoo hoq aob mwv soq tulu sam xeqpwl apnum, hoo mwwg puiyv jvqtwngv hvl ngulv cengdwn.

²⁵Soqg aoso Jisug nyinam wnamv vigo doodwn. Hoq mwlw ham xeql ap kunyiloqkam, ngoqg mwwnamv soq gvda gvt so hoq potangam apko dooram.