Read Nyishi JON 3 Bible Online

JON 3 - Nyishi bible

JON 3

¹Nikodimas ngvk hvl Juhudi tulungam nyig wgbo nyi ak Parisi dvpar hoqgv doonum.

²Mwv aigol Jisug dookub haanv mwam benum, “Tomswrbo, ngulv cengdwn no Pwnbo kanamnam tomswrbo akv. Hiyamkam Pwnbov mwwg lvgab doomin gvma lo noqg nyinam hvb swrdorxeqb nyinyi ram.”

³Jisu mwam birwqnum, “Ngo jvqtw jaqb nam bedwn hiyvkam lokta ko bwwdar maalo Pwnbog lvpwngam kaapa nyoram.”

⁴Nikodimas toxnum, “Hoggub nyil nyekam bov lokta ko bwwdar kotayin. Mwv lokta annwg kepob hookurl lwnyi dvb ko bwwdar kolaram.”

⁵Jisu birwqnum, “Ngo nam jvqtw jaqb bedwn, iss hoqgv la Yal galoqkv ko bwwdar koma baloqkam hiyvkam Pwnbog lvpwngam kaapa nyoram.

⁶Nyia kov ko bwwnamv nyiib nyidwn, hoo Yalv hoqgv bwwnamv mwv Yalwb nyidwn.

⁷No lokta ko bwwdar ta hvl ngoqg begam gab lomabv.

⁸Dooiyv dooi mwwkwb ywl wdwn, nulv ham dunam mam tapa dvn, hvbmabde nulv dooiyv hogloqkv haas dvn yv, hoo hogloqb ws dvn yv ham cengma dvn. Soq sib kalam hiyv Yal hoqkv ko bwwpan hvbkalam nyidwn.”

⁹Nikodimas toxnum, “Soq si hoggub jaq nyitayin?”

¹⁰Jisu birwqnum, “No Israel hvdwg nyijwq-nyegam tomswrbo abwb nyitwl no soq tulu sam cengma dvn i?

¹¹Ngo jvqtw jaqb bedwn, ngulv ngulug cengnam mam bedwn, hoo ngulv hognvkam kaatkun ham bekin dvn, hvbjaqkam nulv ak jijaqkam ngulug puiyam loorwqma.

¹²Ngo nulam soq gvda gvtwg bvrwqngam beikam nulv mwwjw ma, hvbnyiloqkam, ngo nulam ao gvdag bvrwqngam bebaloqkam, nulv ngam hoggub nyil tvjw tayin?

¹³Ao toloqgv ipoqbo Nyia Ko aoho hiyvkam sija godab ao gvdab caamada.”

¹⁴Mojes tvbam deexa-raraho daapo aoho torcal apnam hvbkalam Nyia Ko Tuupam torcal apdvb nyiky tayin.

¹⁵Hoggab mwam mwwjw boa hvnamv nwrba cwtam swwgam naatayin.

¹⁶Hoggab Pwnbov gvda gvtam hwdgo aby kunv mwwg Ko Tuup akin ciqnyingam jipaq kunum, mwam mwwjwbo nyi tulungv siram, hvbmabde nwrba cwtam swwgam naal swwtayin.

¹⁷Hoggab Pwnbov mwwg Ko Tuupam gvda gvtwb nyel pw-hwwdy tak hvl kanam maanum, hvbmabde mwam ywwt ywwtak hvl kanamnum.

¹⁸Ko Tuupam mwwjwbo tulungv nyel pw-hwwk ho haadwb dookma; hvbmabde mwwjw maan tulu gab nyel pw-hwwsam hwwxo pakun, hoggab mwv Pwnbog Ko Tuup akinam mwwjw maanum.

¹⁹Soq siblak nyel pw-hwwnam mam hwwgdvn hutongv gvda gvtwb haapa ku, hvbmabde nyi tulungv hutongam aby maab kan yaangam aby bobindvn, hoggab bulv nyic nyia nyidwn.

²⁰Nyic nyia nyinbov hutongam oyum dvn hoggab mwwg nyic nyiangam kaakin nwwma dvn.

²¹Hvbmabde jvqtwb nyinbo nyiv huto kob haadwn, hoggab mwwg hog mwlw nyinam wnamv Pwnboam mwwgwl nyidwn.

²²Soq kokw so Jisu mwwg buu tulungam boolayil Judiya gvdab wnum. Mwv apo go hoo bulug dookub doobnv baptijum jinum.

²³Jon kam Salim ogum Anon ho issiv vijaqg doogam gab baptijum jidul doonum. Nyi tulungv mwwg dookub hoodul doogam gab mwv baptijum jidul doonum.

²⁴Ho Jonnvn pvtwqho lwqma daanum.

²⁵Jonwg buu tuugin Juhudi nyi akwg lvgab dormo bvrwqho bel hursnam mam benv bviyaq minsnum.

²⁶Kokw so bulv Jonwg dookub wnv mwam bekinnum, “Tomswr bov, Jordon pobu kvtin alo noqg lvgab nyi yvba bo noqg benam nyi akam no mwwpa i? Mwv sija baptijum jidul yvdo, nyi mwlwngv mwwg dook kvdaq wdo!”

²⁷Jon birwqnum, “Pwnbov mwam jima baloqkam hiyvkam hog gokam doog nyoram.

²⁸Nulv atv ngoqg benam mam tanbov doos dvlak, ngo ywwnbo ak hvvma, hvbmabde ngo mwwg otuqyab kanam coonam akv;

²⁹Nyem naaknamv nyega gab doodkun; nyega hoq ajin lvgab daqanv tadwn hoo nyegaho agam mam mwv tapa yukam hemp al mwwpa dvn. Sija ngoqg hemp ponamv niqtuq polin pakun.

³⁰Mwv ngam xibin yaadwb nyitayin hvbmabde ngo anyo taikun.”

³¹Ao gvda toloqgv ipoqbo nyi akv mwlwngam koi yaadwn, gvda gvtso nyiv gvda gvt gab doodwn hoo gvda gvtwg bvrwqngam bedwn. Ao gvda toloqgv ipoqbo akv mwlwjaqkam koi yaadwn.

³²Mwv hognvkam kaaknum hoo taknum ham mwv bekin dvn, hvbjaqkam mwwg puiyam nvvrwq maadwn.

³³Hiyv akgon mwwg puiyam nvvrwq bvnyiloqkam hv Pwnbog jvqtwngv hvl lvdy dvn.

³⁴Hiyvn Pwnbov kanam pan mwv Pwnbog agam mam bedwn, hoggab, mwam Pwnbov mwwg Yalam xikal at xima jaqb jidwn.

³⁵Abv mwwg Ko Tuupam aby dvn hoo hog mwlwngam mwwg alaqho gvqlwq jipa kun.

³⁶Hiyv lajaqkam Ko Tuupam mwwjw bov nwrba cwtam swwgam naapa kun; hiyv lajaqkam Ko Tuupam tama bov swwgam naapa ram, hvbmabde Pwnbog laqm-baqm deenamv mwwg aoho kuiyum godab dootayin.