Read Nyishi JON 4 Bible Online

JON 4 - Nyishi bible

JON 4

¹Parisi tulungv Jisu nyiam Jonnvn viyago baptijum jil mwwg buub mvdwk hvl tapanum.

²(Hvbjaqkam Jisu mwv atv hiyv nvkam baptijum jimanum, hvbmabde mwwg buu tulungv jinum),

³Jisu soq benam pui sam tapa tvl Judiya gvdangam apaqpel Galili gvdab lok wkurnum.

⁴Hoo lamtaho mwv Samariya gvdab wpeql wdwb nyinum.

⁵Kokw so mwv Samariya gvdag Saikar bopam wc kunum, ho hoqhv Jakub mwwg ko tuup Josapnvn ked ak pengxia jinam hoqgv aado maanum.

⁶Jakubg sokumv hoqho doonum. Jisu lamta wg garv henla maab mwv sokum ho doonunum. Ho doonyiv taab kunum.

⁷Ho Samariya nyem dvn ak hoq sokum hoqgv iss bvtab haanum, ho Jisu mwn benum, “Ngam iss loq twwdwb jitwb.”

⁸(Mwwg buu tulungv bopamb dvs rvtab wnum.)

⁹Samariya nyem akv benum, “No Juhudi go, hoo ngo Samaritanv hoggub no ngam iss kodwn?” (Juhudi nyiv Samaritanwg pwcw ujuq kam dvn-twwn maadwn.)

¹⁰Jisu birwqnum, “No Pwnbov hognvkam jidwn ham cengnyiloqkam noqg lvgab goodul doonbo, nam iss konbo akam cengloqkam, no mwwg galoqkv swwg issam kos paco, hoo nam swwg issam nywywngam xooma boam jis paco.”

¹¹Ho nyem akv birwqnum, “Tomswrbo, no ujuq gokam bvvma, hoo sokumv ura do, hogloqkv no lokkam xooma bo issam bvvtayin?”

¹²No ngulug ab Jakubnvn koi yaadwn? Mwv ngulam soq sokum sam jinum hoo mwv atv kam soqkv issam twwnum, mwwg ko tulungv la mwwg sibin, svv hoo sviyangv twwnum?”

¹³Jisu mwnwn birwqnum, “Soq iss sam twwn bov nyiv lokta hvngwr ngwrtin tayin.

¹⁴Hvbmabde hiyvg nyiv ngoqg iss jinam mam twwnbo akv lokta hvngwr takma, hoggab ngo mwam iss jitanam hv mwwg gab xooma jaqb buqlin dooky bo iss hvb nyil mwam nwrba cwtam swwg issam jitayin.”

¹⁵Nyem akv benum, “Tomswrbo! Hoq iss ham ngam jitwb! Hoggab ho ngo lokkam hvngwr kuram, ho ngo soq sokum so iss bvvtab haadwb nyikram.”

¹⁶Kokw so Jisu nyem akam benum, “Noqg nyolam wgdvl goqta ho soqb wkur taaku.”

¹⁷Nyem akv benum, “Ngoqg nyol dooma.” Jisu birwqnum, “No nyol doomak hvl noqg benamv kvtaq pa.

¹⁸No nyolv ang-go boot kubanyi, hoo sija noqg dooba gvdwn nyi ak hvvkam noqg nyol lodar maanyi. No ngam jvqtw jaqb bekinpa.”

¹⁹Ngo kaatgvl tomswrbo no nyiqry benbo gola nyik hvl nyem akv benum.

²⁰“Ngoqg ab apa tulungv Pwnboam puutu aoho xumnum, hvbmabde, Juhudi nyi tulungv nulug begamv Jerusalem bvvtwq ngulug Pwnboam xumkv hvl bedwn.”

²¹Jisu birwqnum, “Nyem no ngam mwwjwto, moodv lok haatayin, nyi tulungv Abam soq mood ao sookam ho Jerusalem bolkam xumk ram.

²²Samariya nyi tulu nul, hiyvn xumdwn ham cengma; hvbmab ngulug Juhudi nyi tulungv hiyvn xumdwn ham ngulv cengdwn, hoggab ywwt ywwnamv Juhudi nyi galoqkv haadwn.

²³Hvbmabde moodv haadku, sija kam haapa ku, jvqtw jaqb xumn bo tulungv Abam yal lvgab la jvqtwb xumd moodv haadku, sijakam moodv haapa ku. Soq xumn bo torab siilak Abwg mwam xumdwb mwwnum nyi tulungv.

²⁴Pwnbov yalv hoo mwam xumn bo tulungv yal lvgab la jvqtw lvgab xumdwb nyidwn.”

²⁵Nyem akv mwam benum, “Ngo cengdwn Ywwnbo, Kristo ngvk hvl benam akv haatayin. Mwv haaikukam ngulam hog mwlwngam bekin tayin.”

²⁶Jisu birwqnum, “Ngo lak mwv noqg lvgab goodul doonbo ak siilak.”

²⁷Hoq mood jaqho Jisug buu tulungv hookur kunum; bulv mwam nyem akwg lvgab goodul doonam mam kaapa tvl wna mwwnum. Hvbjaqkam bulv hiyvjaqkam nyem akam “No hognvkv meegaqdvn?” hvl bemanum; ho “No hoggab mwnwg lvgab goorwqdvn, hvl Jisu nvkam bemanum?”

²⁸Ho nyem akv iss uppum mam tvpaqpel nampamb wkur banv nyi tulungam benum,

²⁹“Ngoqg vcwrko hog mwlw nyiknam mam ngam bekinbo nyi akam haagdvl kaato; Mwv Ywwnbo ak hvvmas i?”

³⁰Ho bulv nampam hoqgv Jisun kaatab lengnum,

³¹Oyu maadab buu tulungv Jisun benum, “Tomswr bov dvs loq meeg dvto!”

³²Hvbmabde mwv bulam birwqnum, “Ngoqg dvs doognam mam nulv cengma do.”

³³Ho buu tulungv bulug pengko ho bemin sunv tox minsnum, “Hiyv nyiv mwam dvs bva jipa nui yu?”

³⁴Jisu bulam benum, “Ngam kanam bog mwwlwqkob nyinamv hoo mwwg bonam nyitwk hvl benam mam niqtuq nyilinamv ngoqg dvsv.

³⁵Nulv hvl bema dvn i, “Pool bvrpy goda bolo amv naadwb nyitayuk. “Ngo nulam bedwn rongo rwqtaqb hindib kvvdil kaato; amv sijakam ningpaku hoo naad bvkam nyidku.

³⁶Am naanbo akam mwwg naajongam jipa kun; hoo mwv nwrba cwtam gob mwv ham naadwn; hoo am liinbov la noocum bov bunyi vnyiv lokub hemp poba sutayin.

³⁷Akwn liiya tvl akwn noocum yaadwn hvl benam si jvqtw go.

³⁸Ngo nulam nyi asaqg rongo golo am naatak hvl kanam tukun. Soq si nulug bon nyipnam ma, hvbsujaqkam nyiig nyilv lo nulv naaya dvn.”

³⁹Nyem ak hog betamnam mam tatwl hoq bopam hoqgv Samariya nyiv vigo Jisun mwwjwnum, nyem akv benum, “Mwv ngam ngoqg hog mwlw nyinam wnam mam bekinpa.”

⁴⁰Ho Samariya nyi tulungv mwwg ogum hvvnwql bulv mwam bulug lvgab doot juk hvl begam gab Jisu bulug lvgab loonyi go doobanum.

⁴¹Nyiv vigo hvraqb mwwg puiyam tatwl mwwjwnum,

⁴²Bulv nyem akam benum, “Ngulv sija noqg betam ko-gab mwwjw ma, hvbmabde ngulv atv mwwg benam mam tape kun hoo ngulv cengdkun mwv jvqtw jaqb Kristo kunyi gvda gvtam Ywwnbo.”

⁴³Aal loonyi kokw so Jisu bulam apaqpel Galili gvdab wknum.

⁴⁴Jisu mwv atam besnv benum, “Nyiqry kaanbo akam mwwg gvda lo xima-paqma dvn.”

⁴⁵Jisu Galili gvdaho wc kalam nyi tulungv mwam svgagvrwqnum, hoggab bulv atv Nyedarko Durum gab Jerusalem wnum hoo bulv hog mwlw mwwg nyinam mwlwngam Durumko ho kaaknum.

⁴⁶Ho Jisu Galili gvdag issam roo alab mvk Kana bopamb lokta hookurnum.

⁴⁷Hwdlo Jisu Judiya hoqgv Galilib haata dvk hvnam mam tapanum, ho mwv mwwg dookub wnum hoo mwam benum soqb haag dvl ngoqg nyega ko sam mwptvb, hoggab mwv sisv twqb nyido.

⁴⁸Ho Jisu mwam benum, “Nulug pengko lo hiyv lajaqkam swrdorxeqb nyinam mam kaapa maalo mwwjw maadwn.”

⁴⁹Saab akv birwqnum, “Tomswrbo, ngoqg lvgab ngoqg kov sima daab haato.”

⁵⁰Jisu mwam benum, “Wnku, noqg kov swwtayin. “Nyi akv Jisug benam mam mwwjw kunv wknum.

⁵¹Mwv nammwb wdu yukam lamtaho mwwg nyera tulungv puiyam bekinnum, “Noqg kov swwi ywn paku!”

⁵²Ho mwv bulam toxnum, hwdlogv mwwg kov al kunum. Bulv birwqnum, “Moiyog doonyi hwrj daqi mood akin hoqgv mwwg dooi vcv al kunum.”

⁵³Ho ab akv mwwpa kunum, hoqg moodjaq hobo Jisu mwam, “Noqg kov swwtayin.” hvl benum. Ho mwv la mwwg imiq nyi mwlwngv mwwjw kunum.

⁵⁴Soq si Jisug lwnyi dvb swrdorxeqb Judiya hoqgv Galili gvdab haabnv swrdorxeqkam nyinum.