Read Nyishi JON 5 Bible Online

JON 5 - Nyishi bible

JON 5

¹Soq kokw so Juhudi tulug dormo durum ak doota kolo Jisu Jerusalem wnum,

²Jerusalemho Sviya Toggoq ogumho iss sviyin ak doonum, ham Hibru agamv Betesda hvl benum, hvgdvn si taabo bong go mutum tvl doonum.

³Nyi vc aibo vijaqgo nyiqca bo, lvca bov hoq iss biinam mam kaaya yal doodunum.

⁴Lok lokub Atwg Gumtwngv ipoql iss sviyinam mvdinum. Issiv biida kalam otuqjaqb ipoq coonbo nyi akv vc hoqgv al kunum.

⁵Hoqho vnyw cammum leq piinwg vc cil doonbo nyi ak doonum.

⁶Jisu hoq nyi akwg hvd vnyw go vcil doonam mam cengtwl, mwv toxnum, “No mwp kunw do i?”

⁷Vcbo nyi akv birwqnum, “Tomswrbo hiyvkam iss sviyinv biida kalam ngam sviyin bol boolwq jinbo dooma; ngo iss lo hvvc maadab nyiv haaco dukun.”

⁸“Jisu benum, Gorabtuk, noqg kartaqngam naarab gvdvl wnku.”

⁹Hoo dara hoq nyi akv al kunv mwwg kartaqngam naarab kunv wknum. Soq aal si Doonu ko alnum.

¹⁰Hoqgab Juhudi nyi tulungv mwpkunam nyi akam benum, “Soolo Doonu dvk aalv, hoo Doonu dvk aal so kartaqngam jool wngam maab vrr dvn.”

¹¹Mwv birwqnum, “Ngam aldvb mwp jinbo akv ngam benum, noqg kartaqngam naarab gvdvl jool wnku.”

¹²Bulv mwam toxnum, “Hiyvg nyiv nam atwg kartaqngam naarab gvdvl wnkuk hvl benbov?”

¹³Hvbmabde nyi akv hiyv mwam mwpkunum ham cengmanum, hoggab nyiv vijaqgo yvgam gab Jisu wleqnum.

¹⁴Kokw so Jisu mwam xumk namhv kaapa tvl mwam benum, “Kaato, no sija al paku no nyic-nyia lokta nyitin kumabv, lokam ham alyama bov nyitin twqto.”

¹⁵Ho nyi akv wkur kunv Juhudi nyi tulungam mwam aldvb mwpbov Jisuk hvl betamnum.

¹⁶Doonu dvk aal so soq nyi aksam mwp ko-gab Juhudi tulungv Jisunvn raqd-puqdwb nyirabnum.

¹⁷Hvbmabde Jisu bulam birwqnum, “Ngoqg Abv sija godab bonam nyidul doodo, hoqgab ngo kam bonam nyidul doodwn.”

¹⁸Jisu Doonu dvk aalwg pvvbam juqbo twqma hoq aoho Pwnboam mwwg Abv hvl bebnv mwv Pwnbog simpv hvl beaql hvl Juhudi nyi tulungv Jisun mengdwb hengnum.

¹⁹Ho Jisu bulam birwqnum, “Ngo jvqtw jaqb nulam bedwn, Ko Tuupv atv hog nyimadvn hvbmabde Abv hognvkv xeq nyidwn ham kaatwl mwv nyidwn, Abv hognvkam nyidwn hvbkalam Ko Tuupv kam nyinam akinam nyidwn.

²⁰Abv Ko Tuupam aby dvn hoo mwam hog mwlwngam mwwg nyinam wnam mam kaakin dvn. Mwv mwam soq sam koi yaan boam nyis tulungam nyim dvb kanam tayin hoo nulv mwlwngv lomdwb nyitayin.

²¹Abv sik boam turkur dvb pwrabnam hvbkalam Ko Tuupv kam mwwg hvb mwwnam mam bulam swwdwb jidwn.

²²Hvbkalam Abv hiyv nvkam mwv atv pw-hwwdil hwwma dvn. Hvbmabde mwv mwwg Ko Tuupam pw-hwwdy mvdwb jil ap pakun.

²³Ho mwlwngv Abam xumnam hvbkalam Ko Tuupam kam xumdwb nyitayin; hiyv akgon Ko Tuupam xuma dvn hv mwam kanambo Abam kam xuma dvn.

²⁴“Ngo jvqtw jaqb nulam bedwn; hiyv ngoqg agam mam tatwl ngam kanambo akam mwwjw dvn, mwv nwrba cwtam swwgam kaapa pakun. Mwam pw-hwwdil hwwk dookma hvbmabde, sig hoqgv swwgam kaapa pakun.

²⁵Ngo nulam jvqtw jaqb bedwn, moodv haadku sijakam haapa ku, sik bov Pwnbog Ko Tuupwg agam mam tapa tayin; hoo ham tapa bo tulungv swwtayin.

²⁶Abv mwv atv swwg ogungam doognam hvbkalam.

²⁷Mwv mwwg Ko Tuupam hwwdil hwwm dvb jipan hoggab mwv Nyia Kov.

²⁸Nul sam tatwl lomabv nyubu ho sil dook bov mwwg agam mam tapa tayin hoq moodv haadku

²⁹hoo bulv nyubu hoqgv alwb nyinbo tulungv swwgwb hoo alwb nyimabo tulungv sigwb turkur taikun.

³⁰“Ngo atv ngoqg galoqkv hog gokam nyismadwn, ngam Pwnbov pw-hwwtak hvl begam gab ngo pw-hwwdwn, ngoqg pw-hwwnam si nyedar dvn, hoggab ngo ngoqg atwg hinglwq kob mwwkwb nyimadvn; hvbmabde ngam kanambo akwg hinglwq kob ngo nyidwn.

³¹Ngo atv ngoqg puiyam baqs bvnyiloqkam ngoqg puiyv jvqtwngvk hvl tvjw dvb nyimadvn.

³²Hvbmabde ngoqg puiyam ngoqgab bedar jinbo ak doodwn, hoo mwv ngoqg puiyam betamnamv jvqtwngv hvl ngo ham cengdwn.

³³Nulv Jonwg dookub nyi kanam tvl tox mvto hoo mwv jvqtw jaqb puiyam bekinnum.

³⁴Ngoqg pui beg dvn si nyi galoqkv bema gvdwn, hvbmabde nulam ngo nyedar mvmdvb bedwn.

³⁵Jon gudul doonbo mur hvb nyinum, hvbmabde nulv mwwg huto ko ho apo go hemp potwq dvb mwwnum.

³⁶Hvbmabde ngo pui ak baqg dvn si Jonwg puiyam koi yaan bov, ngoqg nyis tulungam nyigdvn si ngoqg Abwg ngam nyitwk hvl jinamv, hoo ngoqg Abv ngam kanam panwk hvl ngoqg nyis tulungam nyinam pui si bedar dvn.

³⁷Ngam kanambo Abv ngoqg puiyam bekin dvn. Nulv mwwg agam mam lokkam taka ma ho mwwg nyuqm mam kam kaakam ma,

³⁸hoo nulv mwwg agam mam hang uraho doogma hoqgab kanamnam akam nulv mwwjw ma.

³⁹Nulv Dvrwq potalo nwrba cwtam gob swwgv doodwn mwwl meekar do, hvbmabde hoq tulungv atv ngoqg puiyam bekin dvn.

⁴⁰Hvbsujaqkam nulv ngoqg dookub hvvnwql swwgam kaapal swwtws mwwma.

⁴¹“Ngo nyi galoqkv paqk dvbma ho Pwnboam abynan doomab;

⁴²hvbmabde ngo cengdo nulug lvgab Pwnbog abiam doogma

⁴³Ngoqg Abwg eminb haadwn, hvbsujaqkam nulv ngam svgagvrwq ma hvbmabde nyi asaqkv mwv atwg eminb haaikun nulv mwam svgagvrwq dvn.

⁴⁴Nulv akwn akwn paqmin sudub mwwdwn, hvbmabde Pwnboam paqk nwmadvn, hvb nyibaloqkam nulv hoggub nyil mwwjw nyotayin?

⁴⁵Ngo nulam Abwg yolu betayin mwwl akukam mwwmab. Nulug mwwgwnam Mojes lak nulam yolu bedybov.

⁴⁶Nulv jvqtw jaqb Mojesnvn mwwjw nyiloqkam nulv ngam kam mwwjw supaco, hoggab mwv ngoqg bvrwqngam xeqnum.

⁴⁷Hvbmabde mwv hoggv xeqnum ham nulv mwwjw mabnyiloqkam, hoggub nyil ngoqg agam benam agam mam mwwjw nyiotayin?”