Read Nyishi JON 6 Bible Online

JON 6 - Nyishi bible

JON 6

¹Soq kokw so Jisu Galili swnyiqg Tiberiyas ngvk hvl benam kvtin gonwb rabknum.

²Mwv nyi vcboam mwpnam mam kaatwl mwwg kokw kokwb nyi acam camt algo wmin gvnum.

³Ho Jisu puutu ao golo caaknv mwwg buu tulug lvgab doonum.

⁴Ho Juhudi tulug Nyedarko Durum moodv hvvnwq kunum.

⁵Ho Jisu nywrabl kaanamv, nyi acam camt algo mwwg dookub hoodul doonum, Jisu Pilipnvn benum, nyi torabsam dvm dvb dvs rvdwb hogloqkv kaapa tayin?”

⁶Mwv vm yaab Pilipnvn pookal soq sam toxnum, hvbmabde mwv atv hoggub mvtayin ham cengsnum.

⁷Pilip bvrwqnum, “Soq nyi mwlw si vcwr saqb vxiv dvjaqkam twngk lwwg wtwb rvjaqkam dwpwram.”

⁸Mwwg buu tulug pengko soqgv Simon Pitorg bor Andriyo ngvk hvl benam ak hv mwam bekinnum.

⁹“Himy ak tanyeq wtw taqang gola ngui cinyi go baqnbog doodwk hvl bekinnum. Hvbmabde hvd nyi gab hoq hwiyw ko ham hoggub mvtayin?”

¹⁰Jisu bulam benum, “Nyi tulungam doa mvto.” Ho ditaqho nwmwngv vijaqg doonum. Hoqho nyiv lwwyw ang-go yvnum.

¹¹Ho Jisu wtwngam naarab banv bvvtwl Pwnboam paqnum, ho doonbo nyi tulungam hornum, nguiyam kam hvb mvnum; hoo bulug kepongv dvdeqnam gob dvnum.

¹²Kokw so bulam dvtar namgob dvmtvl mwv buu tulungam benum, “Mwciq-mwiyiq tamab wtw dvleqkam dorkum darpato.”

¹³Ho bulv nyi tulug dvtar tvl apaqnam tanyeq wtwngam dorkumnv huc cwyw leq cinyi go dorkumnum.

¹⁴Ho nyi tulungv Jisug soq swrdorxeq dvb nyil kaakin namsam kaatwl bulv bemin sunum, “Jvqtw jaqb soq nyi ak si gvda gvtwb haady bo nyiqry kaanbo akv!”

¹⁵Jisu nyi tulungv mwam nootul gumlil Lvpw at gob mvtanam mam cengtwl mwv lokta puutub vp-cwkwb caaleqnum.

¹⁶Hwdlo ariyumv haai kukam, mwwg buu tulungv swnyiqb iyabanv,

¹⁷swpho caobanv swnyiq kvtinwg Kaparnahum wnum. Ho kan kunum hvbsujaqkam Jisu hvraq bulug dookub hvvc maadanum.

¹⁸Hoq ditaqho dooiyv vcib yilayil issam biimnum.

¹⁹Buu tulungv mail doum dvvpy gob swpam kool wdu yikho, bulv Jisun iss aoho wgaql bulug dookub hoodul doonam mam kaapa tvl bulv lomb nv bosnum.

²⁰Jisu bulam benum, “Bos maabv, ngo sulak.”

²¹Ho bulv mwam swp aob cao mvdwb mwwnum. Kokw so Jisu oyu maadab bulug swpwb bulv wdy ko gvdangam wc kunum.

²²Aal loogwn so nyi tulungv swnyiq kvtin ho doonbo nyi tulungv swp pwkin go dootwq dvb kaapanum. Jisu mwwg buu tulug dookwb swp uraho caol wmanum hvl bulv cengnum, hvbmabde buu tulungv mwam apaqpel vpwb wnum.

²³Hvbmabde Tiberiyas hoqgv haanbo swp torab pv nyi tulungam At Sw wtwngam paqxo tvl dvkho haaknum.

²⁴Kokw so nyi tulungv hoq ditaqho Jisun nvla mwwg buu tulungam kaapa maaikam, bulv swpwb cao kunv Jisun meekar taab Kaparnahum wknum.

²⁵Kokw so nyi tulungv Jisun swnyiq kvd gonho kaapa tvl bulv mwam toxnum, “Tomswr bov, hwdlo no rabknum?”

²⁶Jisu bvrwqnum, “Ngo nulam jvqtw jaqb bekin dvn, nulv ngo nulam swrdorxeqgob nyil kaakin ko-gab ngam meekar maaslak, hvbmabde wtwngam dvdeq dvb dvgam gab sulak nulv ngam meekar dvn.

²⁷Yuupaqbo dvs gab bon nyimabv, hvbmabde nwrba cwtam swwnam gob doody bo dvs gab bon nyito soq dvs sam Nyia Kov nulam jitayin, hoqgab Pwnbo mwam ham nyim dvb birwl ap jipa kun.”

²⁸Ho bulv mwam toxnum, “Hvbnyiloqkam, Pwnbog nyis tulungam nyis sam ngulv hoggub nyil nyinyi tayin?”

²⁹Jisu birwqnum, “Pwnbov nulam bonam nyim dvb mwwnamv mwwg kanamnam akam mwwjwnam hv sulak nulug nyisv.”

³⁰Ho bulv mwam bvrwqnum, “No ngulam mwwjw mvdwb hognvk nyima wmanam swrdorxeqkam nyil kaakin tan? No hognvkv bonam nyil kaakin tayin?

³¹Ngulug at ab tulungv Dvrwq potalo xeqpwl apnam hvbkalam deexa-raraho maanangam dvnum. Mwv ao gvda toloqgv bulam wtw dvdwb jipoqnum.’”

³²Jisu benum, “Ngo nulam jvqtw jaqb bedwn, Mojes nulam ao gvda toloqgv wtw jima sulak, hvbmabde ngoqg Abv nulam ao gvda toloqgv wtw loodangam jidwn.

³³Hoggab Pwnbov jinam wtwngv ao gvda toloqgv ipoqdvn, hoo gvda gvtam swwm dvb jidwn.”

³⁴Bulv mwam konum, tomswr bov, “Ngulam hoq wtw ham lwxiam jitwb.”

³⁵Ho Jisu bulam benum, “Swwgwg dvsv ngo.” “Hiyv lajaqkam ngoqg dookub haanbov kano kuram, hoo hiyv lajaqkam ngam mwwjw bov mwv nywywngam hvngwr kuram.

³⁶Hvbmabde nulv sija ngam kaat lakam mwwjw ma.

³⁷Ngoqg Abv hognvkv xeq ngam jipan hoq tuluhv ngoqg dookub haatayin, hoo hiyv xeq ngoqg dookub haanboam ngo nywywngam ruqxa ram.

³⁸Ngo ao gvda toloqgv ngoqg atwg mwwkub nyitab ipoq ma, hvbmabde ngam kanambo akwg mwwnam mam nyitab ipoqyin.

³⁹Hoo soq si ngam kanam bog mwwlwqkv, mwwg hog mwlwngam jinam sam akukam niim mvma dvn, hvbmabde bulam vtwr-anya aalam turab mvdwb jitayin.

⁴⁰Hoggab soq si ngoqg Abwg mwwnamv, Ko Tuupam kaanbo nyiicwr-cwrxiam mwwjw gvdwl nwrba cwtam swwgam naamdvb, hoo kuiyum mam vtwr-anya aalam ngo bulam turdvb purab tayin.”

⁴¹Jisu begamv, “Ngo ao gvda toloqgv ipoqbo dvsv” hvgam gab Juhudi tulungv budum-beram benum.

⁴²Ho bulv benum, “Soq nyi aksi Josap ko tuup hvvmas i? Ngulv mwwg abamkam hoo annamkam cengdwn. Hvnyiloqkam mwv sija hoggub ao gvda toloqgv ipoq yinwk hvl bedwn?”

⁴³Jisu birwqnum, “Nulug pengko ho budum-beram bemin sunam mam apaqto.

⁴⁴Ngam kanambo Ab jima lo hiyvkam ngoqg ogumb haanyiram, hoo ngo mwam vtwr-anya aalam turab dvb jitayin.

⁴⁵Nyiqry benbo tulungv xeqnum, ‘Nyi mwlwngam Pwnbov tomswr tayin.’ Abwg tomswrnam mam tanbo nyi mwlwjaqkv ngoqg dookub haatayin.

⁴⁶Hiyv akgon kam Abam kaaka maasu, hvbmabde Pwnbo galoqkv haanbo ak hv Abam kaapa kun.

⁴⁷Ngo nulam jvqtw jaqb bedwn, hiyv mwwjw dvn, hoq gab nwrba cwtam swwgv doodwn.

⁴⁸Ngo swwgwg dvsv.

⁴⁹Nulug ab tulungv maanangam deexa-raraho dvpe-twwpe kul hvraqb sinkun.

⁵⁰Soq si ao gvda toloqgv jipoqnam dvsv, ho hiyv akv ham dvnbo nyiv siram.

⁵¹Ngo ao gvda toloqkv ipoqbo swwgwg dvsv. Hiyv akgon soq dvsam dvbnyiloqkam, mwv nwrba gob swwtayin. Hoo gvda gvtam swwm dvb ngoqg jita gvdwn si ngoqg soodinv.”

⁵²Soq sam tatwl Juhudi tulungv hang lingtwr ram lengnum. Bulv benum, “Soq nyi si hoggub nyil ngulam mwwg soodinam dvm dvb jinyi tayin?”

⁵³Jisu bulam benum, “Ngo jvqtw jaqb nulam bedwn, nulv Nyia Ko Tuupwg soodinam la hijum mam dvma-twwma baloqkam nulv atwg swwgam kaapa nyoram.

⁵⁴Hiyv xeq ngoqg soodinam dvdwn hoo ngoqg hijum mam twwdwn hoq nyi ak hv nwrba cwtam swwgam naatayin; hoo ngo vtwr-anya aalam mwam purab jitayin.

⁵⁵Hoggab ngoqg soodin si dvs xinam hvvtwjaqkv, hoo ngoqg hijum si twws hvvtwngv.

⁵⁶Ngoqg soodinam dvnbov la hijum mam twwn bov mwv ngoqg urasi doodwn, hoo ngo kam mwwg uraho doodwn.

⁵⁷Nywywngam sima bo Abv ngam kanam pan, hoo mwwg galoqkv ngo kam swwdwn. Hoq hvbkalam soq sam dvnbo nyi akv ngoqgv.

⁵⁸Soq si ao gvda toloqgv ipoqbo dvsv, nulug ab tulungv wtw dvtwl hoo kokw so sinam hvb nyimadvn. Hvbmabde sam dvnbov nwrba gob swwtayin.”

⁵⁹Kaparnahumho tomswr banv yvi yikho Jisu soq torab sam Sinagog nam uraho benum.

⁶⁰Ho mwwg buu tulug pengko hoqgv sam tatwl benum, “Soq tomswrnam si tacin lama namgo hiyv sam talaq tayin.?”

⁶¹Hiyvkam Jisun betam maasu mwwg buu tulungv mwwg benam mam tatwl budum-beram bemin sunam mam cengtwl bulv kam benum, “Soq si nulgab muurnam gob nyido i?

⁶²Hvnyiloqkam Nyia Ko Tuupam mwwg otuq dook gvdab cookurnam mam kaapa baloqkam nulv hog hvl betayin?

⁶³Yalv swwm dvb jidwn, nyia kog atorv hog gokam nyinyi maadwn. Ngo nulam agam benam hvvsulak yalv la swwgv.

⁶⁴Hvbmabde nulug pengko ho tuugin mwwjw maab doodo.” (Jisu otuqjaq hoqgv hiyv mwwjw maadwn hoo hiyv mwam nyemaq alaqb nyepinl gvqlwq tayin ham cengl doonum.)

⁶⁵Hoo mwv lokta betin banv benum, “Ngo nulam hvlakam betkun, Abv svkal hiyv nvkam ator jima baloqkam ogum haanyiram.”

⁶⁶Hoq kokwb mwwg buu ata gon wkur kunv lokta kokw so mwwg lvgab wmin gvkmab nyiknum.

⁶⁷Ho Jisu mwwg wyw leq vnyiam benum, “Nulv kam ngam apaqpel wdkub mwws i?”

⁶⁸Simon Pitor Jisun birwqnum, “At Sw, ngulv hiyv lvgab wtayin? No nwrba cwtam swwgam jinbo agam mam doog do,

⁶⁹hoo ngulv sija mwwjw dvn, hoo cengdkun, no Pwnbog Dvrwqbo Akv.”

⁷⁰Jisu bulam birwqnum, “Ngo nulam wyw leq vnyi gon goqmanum i? Hvbsujaqkam nulug pengko ho akwn uiyib gwwl doodo!”

⁷¹Mwv Simonwg Iskeriot ko Judasnvn bvrwqngam bidul doonum. Hoggab buu wyw leq vnyig pengko hoq akgonwb mwv nyisbakam mwam nyepin pingpaq tvl nyemaq alaqb gvqlwq bongv.