Read Nyishi JON 7 Bible Online

JON 7 - Nyishi bible

JON 7

¹Soq kokw so Juhudi tulungv mwam mengdwb meekar yukam Jisu Judiya gvdaho gaql yinwmab Galili gvdab gaqtab wnum.

²Ho Juhudi tulug Tombu Durum moodv haaknum.

³Ho Jisug bor tulungv mwam benum, “Noqg buu tulungam noqg nyis tulungam nyigdvn ham kaam dvb no soq ked sam apaqpel Judiya gvdab wn.

⁴Atam yuuk dvb mwwnbov hiyvkam kvs-kapeql nyisil nyima dvn. No soq nyis tulungam sam nyid nyiloqkam gvda gvtam cimpw mvmto.”

⁵Mwwg bor tulungv kam mwam mwwjw maanum.

⁶Jisu bulam benum, “Aal moodv ngoqgab sija godab haama da. Hvbmabde nulug moodv looxiam doos dvn.

⁷Gvda gvtv nulam oyum ram, hvbmabde hoqhv ngam oyum dvn, hoggab hoqham ngoqg almak hvl begam gab hoqhv alman nyis tulungam nyidwn.

⁸Nulv durum kob caaiyan. Ngo durum kob wram hoggab ngoqg moodv sija godab hvvc maada.”

⁹Bulam hvl bvvtwl mwv Galili gvdaho doonum.

¹⁰Soq kokw so Jisug bor tulungv durum rumkub wnum.

¹¹Mwv kaapa dvb wmab kvsil wnum. Juhudi tulungv mwam durumko ho meekar banv yvnum. Bulv toxnum, “Hogloq ho mwv yvdo?”

¹²Nyi tulungv mwwg pagoqkam budum-bvram bidu nyanam, nyi tuugin benum, “Mwv nyi albov,” nyi tuugin benum, “Ma,” mwv nyiam sup gvdo.”

¹³Hvbsujaqkam, Juhudi tulungam bos banv hiyvkam hampeql mwwg pagoqkam bemanum.

¹⁴Durumv ra paqb nyidul doodwkho Jisu xumk nammwb wnv tomswr banv berabnum.

¹⁵Ho Juhudi nyi tulungv lomnv benum. “Soq nyi si mwv tomswrko gokam wma hoggub nyil hwdgo cengdwn?”

¹⁶Ho Jisu birwqnum, “Ngoqg tomswr gvdwn si ngoqg galoqkv ma, hvbmabde, ngam kanambo Pwnbo galoqkv.”

¹⁷Hiyv akgon Pwnbog benam mam tatwl mwwg bonam nyidwb mwwnbo akv ngoqg tomswrnamsi Pwnbog hoqgv bwdwq hvbmab ngoqg atwg galoqkv bes dvn ham cengtayin.

¹⁸Hiyv at galoqkv bes dvn mwv atam yuuk dvb mwwdwn. Hvbmabde hiyv mwam kanam boam yuum dvb mwwdwn mwv jvqtwngv, mwv xaalyo maadwn.

¹⁹Mojes nulam pvvbam jimanam i? Nulug pengko ho akgonkam pvvbam tama dvn. Ho nulv ngam hoggub mwwjw dvn?”

²⁰Nyi tulungv birwqnum, “Nam sonyiv cepa! Hiyv nam mengdwb meekar dvn.”

²¹Jisu birwqnum, “Ngo nyiig nyimanam ak nyit gvl hoo nulv mwlwngv lomdo.

²²Mojes nulam pepaql-mux mvnam mam jinum (soq sam Mojes mvkin maasu, hvbmabde nulug ab tulungv nyirabnum), hoo Doonu dvk aalam nyiam nulv mux mvdo.

²³Mojesg pvvbam Doonu dvk aalam nyiam pepaql-muxnam si daapo juqbo maadnyi, vcboam mwp yukam nulv ngam hoggub nyitwl haaxaqdvn?

²⁴Ao aob pw-hwwtwq maabv, hvbmabde jvqtw lvgab pw-hwwto.”

²⁵Jerusalem hoq nyi tuugin benum, “Soq nyi sima i bulug mengdwb meekarnam hv?

²⁶Hoo mwv si nyi mwlwg agahv agam goodu yvdo, hoo bulv mwam hog akkam gooma! Nyi sam jvqtw jaqb Ywwnbo hvl ngulug nyig wgbo koibo tulungv cengjaqdvn go?

²⁷Hvbmabde ngulv soq nyi aksi hogloqkv haadwn, ham ngulv cengdwn, hvbmabde Ywwn bov haaikukam mwv hogloqkv haatayin ham hiyvkam cengram, hvbmabde mwv hogloqkv ham ngulv cengdwn.”

²⁸Ho Jisu xumk nam uraho vc alwb bel tomswr banv benum, “Ngo hogloqkv haaiyin ham jvqtw jaqb ngam cengjaq dvn? Hvbmabde ngo atwg mwwkwb haama, ngam kanambo akv jvqtwngv hoo nulv mwam cengma.

²⁹Hvbmabde ngo mwam cengdwn, hoggab, ngo mwwg toloqgv haaiyin, mwv sulak ngam kanam pan.”

³⁰Ho bulv mwam nootu dvb mwwnum. Hvbsujaqkam hiyvkam mwwg gv alaq idaqmanum, hoggab mwwg moodv sija hvvc maadanam

³¹Hvbsujaqkam nyiv vigo mwam mwwjw banv benum, “Kristo haaikukam soq nyi nyinam sam nyibin yab mwv swrdorxeqb nyitayin i?”

³²Nyi tulungv Jisug bvrwqngam budum-bvram bemin sunam mam Parisi tulungv tapa tvl nyub buda ngvla Parisi tulungv mwam nootu mvdwb sipai tulungam kanamnum.

³³Ho Jisu benum, “Ngo meegta oyu-yooma goda nulug lvgab yvtayin, hoqgv ngam kanam bog dookub wta yukun.

³⁴Nulv ngam meegaq sutayin hvbmabde nulv ngam meeparam; hoggab ngo hogloqho dootayin hoqho nulv haanyiram.”

³⁵Juhudi tulungv bulv bemin sunum, “Ngulv meejaqkam mwam meeparam mwk hvl, mwv hogloqb wtayin? Juhudi tulug dook Gwrik nampam wl Gwrik tulungam tomswr taab wta dvn yu?

³⁶Mwv hvlakam bedo, “Nulv ngam meejaqkam meeparam hoo ngoqg wl dookub nulv wnyiram, hvgdvn hv hoggv yu?”

³⁷Kokw so durum dvd moodv wnya yuk, hoqg vtwr aalhv xinam jaq aalwb nyinum. Hoq aalho Jisu daqrab banv vc alwb sogoql benum, “Hiyv hvngwr dvn ngoqg dookub haagdvl twwto.

³⁸Dvrwq potalo xeqpwl apnam hvbkalam, ngam mwwjwbo akv mwwg hoqgv swwg issiv pobu hvb tomin dootayin.”

³⁹Mwv Dvrwqbo yalwg pagoqkam benum, mwam mwwjwbo tulungv hiyam kaapa yindwn, hoggab sija namgub Yalam jima tanum, hoggab Jisun swsw yuupw maadanum.

⁴⁰Nyi tuugin mwwg benam mam tatwl benum, “Soq nyi aksi jvqtw jaqb nyiqry benbo hv kunyi.”

⁴¹Tuugin begamv “Mwv Ywwnbo akhv!” Tuugin begamv, “Ywwnbo akv Galili hoqgv lengram!

⁴²Dvrwq potangv begamv Ywwnbo akv Debid ko hosiq hoqgv lengtayin, hoo mwam Debidg dook Betleham nampamho ko bwwtayin.”

⁴³Hoqgab nyi tulug pengko ho mwwg pagoqkam luusaq-luusaqb bemin sunum.

⁴⁴Nyi tuugin mwam nootul leedwb mwwnum hvbmabde hiyvkam mwwg gv aoho alaq idaq maanum.

⁴⁵Ho sipai saab tulungv nyub buda lvgab Parisi tulug dookub hookur yukam bulv toxnum, “Hoggub nyitwl mwam nulv boa ma?”

⁴⁶Sipai tulungv birwqnum, “Hiyv ak jaqkam soq nyi soq benum sib beka ma.”

⁴⁷Ho Parisi tulungv bulam benum, “Nulam ruqb mwam sup kopan i”

⁴⁸Parisi tulungv la gora ab tulungv mwam mwwjw namyv?

⁴⁹Soq nyi tulu si Mojesg pvvbam cengma gab bulv Pwnbog beenam uraho doonam!”

⁵⁰Bulug pengko hoqgv Nikodimasek hvnam hv Jisug dookub otuqho wnum. Mwv bulam benum.

⁵¹“Ngulug Pvvb lo xeqpnamv nyi akwg nyinam wnam mam kvvdy tvdy maalo mwam yolu bed nyid nvi yv?”

⁵²Ho bulv mwam birwqnum, “No kam Galili hoq nyiv yv? Dvrwq potalo miidy kaato, Galili nampam hoqgv nyiqry kaanbo lengnyi ram.”

⁵³Bulv vxiv at atwg nammwb wknum,