Read Nyishi JON 9 Bible Online

JON 9 - Nyishi bible

JON 9

¹Kokw so Jisu lamta ho wdul dooi yikho ko bwwiywk hoqgv nyiqca dvb bwwnam nyi ak kaapanum.

²Ho mwwg buu tulungv mwam toxnum, “Tomswrbo hiyvg nyic nyia nyigam gab soq nyi sam nyiqca dvb ko bwwpan, mwwg atwg nyic nyia gab yv, ma mwwg ann-abwg nyigam gab?”

³Jisu birwqnum, “Mwwg nyiqcanamv mwwg nyic nyia nyigam gab kama, ann-ab nyigam gab kama, hvbmabde Pwnbog nyis tulungam nyidul doonam atoram mwwg galoqkv kaapa mvdwb sulak nyipan.

⁴Ngam kanam bog bonam ngulv aal huto deeda so nyidwb nyidwn, aiyv hoodu do, ho hiyvkam nyis tulungam nyiny kuram.

⁵Ngo gvda gvtso doody deedib, ngo gvda gvt soq hutongv.”

⁶Sam mwv bexo kokw so Jisu kedho tacoram curxab tvl suiyub mvtwl mwv nyi ak hoq vnyiqho suiyungv neetwl kanam banv benum,

⁷hoo mwam benum “Wgdvl noqg nyuqm mam siloam swnyiq al moomiqta.” (Hvgdvn hv kanamnam) Ho nyi akv wknv nyuqm mam moomiqnum hoo vnyiqngv kaapa tukul wkur kunum.

⁸Ho mwwg gutu-gorangv la mwam otuqho kodul doonam mam kaanbov benum, “Soq nyi aksi dootwl konbo hvvmas i?”

⁹Tuugin benum, “Mwv sulak.” Asaqkv benum, “Ma hvvma, hvbmabde mwam kvviyiq bogo.” Nyi ak hvviya atv besnum, “Ngo sulak hoq nyi akv.”

¹⁰Bulv mwam toxnum, “Noqg vnyiqkam hoggub nyil mvko kunum?”

¹¹Mwv birwqnum, “Jisu ngvk hvl benam nyi ak hv suiyu ata go mvbnv vnyiq si neetwl ngam benum, “Siloam wgdvl noqg nyuqm mam moomiqtak hvl betwl hoo ngo hoqb wnv moomiqnum, hoo ngo moomiq daqkalam kaapa kunum.”

¹²Bulv mwam toxnum, “Mwv hogloq ho?” Nyi akv birwqnum, “Ngo cengma.”

¹³Ho bulv nyiqca bo nyi akam Parisi tulug dookub boanum.

¹⁴Jisu suiyu neel nyi ak hoqg vnyiqngam mvkol mwpko aal hv Doonu ko aalwb nyinum.

¹⁵Ho Parisi tulungv nyi akam hoggub nyil kaapa kunum hvl lokta toxnum, mwv bulam bekinnum, “Mwv suiyu atago ngoqg vnyiq si neenum, hoo ngo ngoqg nyuqm mam moomiqnum, hoo ngo kaapa dukun.”

¹⁶Parisi tulu hoqg tuugin benum, “Soq sam nyinbo nyi ak si Pwnbog galoqkv haaram, hoggab mwv Doonu aalam vrr ma.” Hvbsujaqkam tuugin benum, “Nyic nyia nyinbo nyiv hoggub nyil soq svk ator alwb nyimanam mam swrdorxeqb nyilatayin?” Hoqgab bulug pengko ho hang pwsaq pwsaqb mwwnyianum.

¹⁷Hoqgab Parisi tulungv nyi akam lokta toxnum, “Noqg begamv mwv noqg vnyiqngam mwv mvko pan hvdo hvnyiloqkam no mwwg pagoqsam hog hvl bedwn?” Mwv birwqnum, “Mwv nyiqry benbov.”

¹⁸Hvbsujaqkam Juhudi tulungv nyi nyiqcal doon bov sija kaapa dukun hvl nyi ak hoqg ab annam goqnam gob mwwjw dvb mwwmanum

¹⁹hoo bulv bulam toxnum, “Soq si nulug nyega kov i? Nulv mwam nyiqca dvb ko bwwjaqnum? Hvnyiloqkam mwv sija hoggub nyil kaapa dukun?”

²⁰Mwwg ab annv birwqnum, “Ngulv cengdwn mwv ngulug nyega kov, hoo ngulv hamkam cengdwn mwam nyiqca dvb ko bwwnum.

²¹Hvbmabde mwv sija kaapa duku ham ngulv cengma. Mwam toxto, mwv akam paku, mwv atv birwqtayin.”

²²Mwwg ab annv Juhudi tulungam bos banv soq sib benum, hoggab, Juhudi tulungv Jisun hiyv akgon Ywwnbo ngvk hvl begam gab Sinagog nam hoqgv ruqlin dvb hvl birwl ywrbnv apnum.

²³Hoqgab mwwg ab ann tulungv, benum, “Mwv akam paku mwam toxto.”

²⁴Lwnyi dvb bulv ko bwwiywk hoqgv nyiqca bo nyi akam goqkur banv mwam toxnum, “No jvqtw jaqb betayinwk hvl Pwnbog aga so dingto! Ngulv cengdwn soq nyi ak si nyic-nyiab nyigbo nyiv.”

²⁵Nyi akv birwqnum, “Mwv nyic nyia nyinbo nyiv suiyv nyima bov nyiv suiyv ham ngo cengma. Hvbmabde ngo sam cengdwn, ngo nyiqcal doonum, sija ngo kaapa dukun.”

²⁶Bulv mwam lokta tox xudarnv toxnum, “Mwv nam hognvkv nyijnum. Noqg vnyiqngam mwv hoggub nyil mvkonum.?”

²⁷Mwv birwqnum, “Nulam kajo oyu maadab bekin tuknvlak, nulv tagab ma. Hog nyitwl nulv sam lokta toxdvn?” Nulv kam mwwg buub swwdwb mwwkam sudco?”

²⁸Bulv mwam bej-bepar banv benum, “No lak mwwg buungv, hvbmabde ngulv Mojesg buungv su.

²⁹Ngulv cengdwn Pwnbov Mojesg lvgab agam goonum, hvbmabde soq nyi ak si hogloqkv haaspan bwdwq ham ngulv cengma.”

³⁰Nyi akv birwqnum, “Hognvk taka maanam pagoq go soq si! Nulv mwv hogloqkv haapan ham cengma, hvbmabde mwv ngoqg vnyiqngam mvko jipan.

³¹Ngulv cengdwn Pwnbov nyic nyia nyinbog xumnam mam tama dvn, hvbmabde mwam xuml mwwg nyimdvb mwwnam mam nyinbog xumnam mam tadwn.

³²Gvda gvt si swwrab dvk hoqgv jaq nyiqca dvb ko bwwnam nyi akam hiyvkam mvko jinam sija godab tapa ma.

³³Soq nyi ak si Pwnbo galoqkv haama loqkam, mwv hog akam nyinyi ram.”

³⁴Bulv mwam birwqnum, “No ko bwwiywk hoqgv nyic nyia nyiv, hoo nyic-nyiab nyil swwca pan. No ngulam tomswr tadwn i?” Kokw so bulv mwam Sinagog nam ura hoqgv agab ruqlin kunum.

³⁵Bulv nyi akam ruqlinam mam Jisu tapanum, hoo nyi akam mwv kaapanum hoo toxnum, “Nyia Ko Tuupam mwwjw dvn i?”

³⁶Nyi akv birwqnum, “Mwv hiyv ham ngam betamtvb, tomswrbo; ho ngo mwam mwwjwtayin.?”

³⁷Jisu mwam benum, “No mwam kaag nukun; sija noqg lvgab agam goodul doonbo ak siilak mwv.”

³⁸Nyi akv benum, “At Swn, ngo mwwjw dvn,” hoo mwv Jisun xumnum.

³⁹Jisu benum, “Ngo nyiqca boam meegaql kaapa dvb hoo kaapa bo tulungam nyiqca dvb mvtab gvda gvtso haanum.”

⁴⁰Mwwg bviywr-bvcarho yvba bo Parisi tuugin mwwg soq benam sam tatwl mwam toxum, “Ngulv kam nyiqca bov i?”

⁴¹Jisu birwqnum, “Nulv nyiqca nyiloqkam, nulug lvgab mwwmurv dooram; hvbmabde nulv sija begamv, ‘Ngulv kaadwn,’ hoqgab nulug nyiqcangv hvraqb doodwn.”