Read Nyishi BON 10 Bible Online

BON 10 - Nyishi bible

BON 10

¹Sijariya ho Korneliyas ngvk hvl eminam, Roman sipai tulug pengko ho “Itali Rejiment” ngvk hvl benam pvtw ho kepten saabwb nyi swwnbo nyi ak doonum.

²Mwv la mwwg imiq dvparv Pwnboam bos sol xuml swwnbo nyib nyil swwnum, hoo mwv nyedarbo nyiib nyinum. Mwv jwwgw homabo Juhudi nyi tulungam vijaqg svka kaanum, hoo Pwnboam looxiam xumdul mwv doonum.

³Ariyum golo mood oum duk ditaqho mwv nyiqry ak kaanum. Hoqho mwv kvvdy lalal kaanamv Pwnbog ao gumtw ak mwwg dookub haabnv mwam “Korneliyas” hvl goqdwb kaapanum.

⁴Mwv ao gumtwngam kaapa tvl bos sobanv benum, “Tomswrbo, hognvk go?” Ao gumtw akv mwam birwqnum, “Pwnbov noqg swgwnam mam la noqg nyiam anya mwwpal svka banv bon nyinam mam mwwpa paku.

⁵Hoqgab sija no nyi loq Joppab kanam tvl Simon Pitorvk hvl benam nyi ak ham goqmto.

⁶Mwv sa-svlo bviywrho doonbo soopin jem mvnbo Simon nvk hvl benam nyi akwg namhv nyiinwb doodwn.”

⁷Kokw so mwwg lvgab goodu bo ao gumtw akam wleq mvt kul Korneliyas mwwg nam hoq nyijobo nyi vnyi go hoo Pwnboam bosil swwnbo mwam kanam tvi-tamil mwwjwbo sipai ak goqanum.

⁸Mwv bulam hog bvxeq nyiknum ham bidil bekin tvl bulam Joppab kanam nvmlwqnum.

⁹Loogwn so bulv Joppangam wnwq svqtwqb wdul dooikam, Pitor nam aob xumtab doonyi taab yukho caonum.

¹⁰Hoo mwv kano al yukam mwv dvtanum, nyi tulungv dvsam mudul dooyikho, Pitor nyiqry ak kaanum.

¹¹Hoo mwv ao gvdag viyap pam ciqko dvb kaapanum, hoo vj pogam golo cuukiq vpiam gagab tvl gvda hatwb tvpoq dvb kaapanum.

¹²Hoq pogamho hog luuxy cwr sudum svrv, tvb-tapeq hoo nyook hoqg pvtangv doonum.

¹³Kokw so mwam agam yal ak bedwb tapanum. “Pitor gorab gvdwl mengdvl dvto!”

¹⁴Hvbmabde Pitor benum, “At Sw, hvbjaqma, hoggab ngo lokjijaqkam mubur mvcnam hoo kacbo hoolu dvrwq maanbo hengnam mam dvkama.”

¹⁵Agam yalv lokta benum, “Pwnbov dvrwqbov hvl benam mam kac dvk hvl bemab.”

¹⁶Soq si luum go nyinum, hoqgv kokw so hoq pogam mam ao gvdab lokta nookur banv naaca gvnkun.

¹⁷Pitor mwwg soq nyiqry kaanam sam mwwdar lamab hoggv yu mwwnv mwwdul doodu yikho Korneliyaswg kanam nam nyi oumv Pitor dook nammam tox xujo banv viyap yabg haaga hv doqdunum.

¹⁸Bulv goqbnv toxnum, “Soq nam so Simon Pitor ngvk hvl benam nyiin ak dooma yv?”

¹⁹Pitor hvraqb mwwg nyiqry kaanam ak hv hognvk jaqkv yu mwwl doodunum, hvbmabde kokw so Yalv mwam benum, “Tagabto! Nyi oum go nam meegaql yidu do.

²⁰Hoqgab no mwx-mvaql mwum maab bulug lvgab wban, hoggab ngo bulam kanam pan.”

²¹Kokw so Pitor ipoq kunv nyi tulungam benum, “Ngo sulak nulug meegaqnam nyi akv. Hoggab nulv haaiyin?”

²²Bulv mwam birwqnum, “Kepten Saab Korneliyas ngulam kanam pan. Mwv Pwnboam xumn bo nyi albov, ho Juhudi nyi tulu mwlwngv xikumnamv; mwam Pwnbog gumtw ak mwwg nammwb nam goqa tvl, noqg bes hog nvkvxeq doodwn ham bem tvl mwam tatwk hvl benum.”

²³Pitor nyi tulungam nammwb goqa banv aiho doomnum. Loogwn so mwv mwx-mvaq banv bulug lvgab wbanum, hoo mwwg lvgab Joppa hoqgv nyi mwwjwbo ata go wbanum.

²⁴Hoo loogwn so mwv Korneliyas la mwwg ajin tulungam lvkin gob goqkum banv mwam kaaya yal doodu dvk Sijariya ho wc kunum.

²⁵Hvbmabde Pitor nam urab haasv twqb nyita kalam, Korneliyas wrwq banv mwwg lvpia lwkwho lvpiangam nootu banv xumnum.

²⁶Hvbmabde Pitor mwam benum, “Daqrab tuk, ngokam nyiv sulak.”

²⁷Pitor hvraqb Korneliyasnvn goojo ywbnv nam urab haabnv mwv vijaqg nyiv hookuml doodwb kaapanum.

²⁸Mwv bulam benum, “Nulv atv hindy jijaqb cengdwn Juhudi nyiv la nyob luusaq nyiv lokub yvbam maadwn hvl Juhudi dormongv bedwn. Hvbmabde Pwnbov ngam hiyv nyi gonkam mubur-mvcnamv ho kacbov hvl akukam bema bvk hvl kaakin pan.

²⁹Hoqgab no ngam goqyikam ngo hog bidwq bemab haaiyin. Hoqgab ngo nam tox dvn, no ngam hoggab goqdwn?”

³⁰Korneliyas benum, “Soolo aal loumg otuqho doonyi taab yuk mood oumho ngo ngoqg nam ura si xumdul doonum. Cengma golo nyi ak vj kwlwq-kvlaql huuda kvlabog kootwl ngoqg haabo ditaqho daqtwl benum,

³¹“Korneliyas! Noqg svkal anyab bon albo nyinam mam la noqg swgwnam mam tapa do, hoo mwwgabl ap pakun.

³²Joppab nyi kanam tvl Pitor rvk hvl eminam nyi ak ham goqmto. Mwv sa-svlo bviywrho doonbo soopin jem mvnbo Simon ngvk hvl benam nyi akwg namhv nyiinwb doodwn.”

³³Hoqgab ngo cox alwb nam goqm dvb nyi kanamnum, hoo no anya mwwpal haai banyi. Ho sija ngul mwlwngv Pwnbog aga si nam At Sw hog hvla xeq betak hvl bilwqpan ham noqg benam mam tadwb ngulv kaaya yal doodwn.”

³⁴Pitor goorabnum, “Pwnbov nyi mwlwngam aiyin xid kunyi hvl ngo jvqtw jaqb cengpakun.

³⁵Hvbmabde mwam boswl mwwg kaagaho hognvkv aldvn ham nyil swwnbo nyi tulungam Nyoodo nyiib nyis jaqkam mwv xidwn.

³⁶Nul mwlwngv cengyin do Israel nyi tulu gab mwv swrsomalog Tugu Puiyam Jisu Kristo galoqkv tapa mvdwb jinum, hiyv mwlwg At Swb nyidwn.

³⁷Jon baptijum puiyam betam tamxo kokw so Galili gvda hoqgv nyirab banv hoggub nyil Judiya gvda mwlwho hoggub nyinum ham gonam nul mwlwngv cengyin sudo.

³⁸Nulv Najaretwg Jisun Pwnbov hoggub nyil mwam Dvrwqbo Yalam la atoram jinum ham cengyin do; Mwv gvda mwlwb wbnv Pwnbov mwwg lvgab doogam gab bon alboam nyinum, hoo ui alaqho doon boam mwpnum.

³⁹Ngulv mwwg nyinam wnam mwlwngam Juhudi nyi tulug gvdaho la Jerusalemho kaanbov doodwn. Bulv mwam dvvcw silo lvgab taqtin kunv daapo aotv mengnukun.

⁴⁰Hvbmabde mwam Pwnbov aal loum deenso siknam hoqgv purab kunum, hoo kaakin kunum,

⁴¹hvbmabde nyi mwlwngam kaakin maanum, hvbmab ngulam sijag hvvky swwn bo nyi tulu xuqcol apnam aro sam kaakinum. Mwv sipekul turkur yuk kokw so ngulv mwwg lvgab dvba twwbanum.

⁴²Kokw so mwv ngulam Tugu Puiyam, nyi tulungam bekin tak hvl kanam nvmlwqnum, ho Pwnbov mwam turl doonbo ge ho sikbog ge pw-hwwtwk hvl lvpw abwb mvpa kunwk hvl bekin tvl ngulam benum.

⁴³Nyiqry benbo mwlwngv mwwg pagoqkam goobnv benum, mwam mwwjwbo nyi mwlwngam bulug nyic nyiangam mwwg emin gab apaq jitayin.”

⁴⁴Pitor raab goodul doodu dvkho, Dvrwqbo Yalv puiyam todul doonbo nyi tulu mwlwg aoho ipoqnum.

⁴⁵Joppa hoqgv Pitor lvgab haaba nyanbo mwwjwbo Juhudi nyi tulungv Pwnbov Nyoodo nyi tulungam Dvrwqbo Yalam jinam mam kaapa tvl bulv lomnyanum.

⁴⁶Bulv agam oksub bulam goodwb la Pwnbog yuunam mam paqdwb tapanum. Pitor benum.

⁴⁷“Soq nyi tulu si ngulv Dvrwqbo Yalam kaapanam hvbkalam bulv kalam kaapa paku. Hvnyiloqkam, hiyv nyiv bulam iss ho baptijum nam maadwb bitur nyotayin?”

⁴⁸Hoqgab mwv bulam Jisu Kristog emin gab baptijum naamdvb benum, kokw so bulv mwam loonyi loum gob bulug lvgab doomin gvla bvk hvl benum.