Read Nyishi BON 11 Bible Online

BON 11 - Nyishi bible

BON 11

¹Hvvky tulungv la mwwjwbo nyi tulungv Nyoodo nyiingv Pwnbog agam mam tapa tvl mwwjw pak hvl Judiya hoq doonbo nyiv tapanum.

²Pitor Jerusalemb hookur yukam, Nyoodo nyi tulungv pepaql-mux mvdwb nyikin pa mwwn bov mwam benum.

³“No pepaql-mux mvmanam Nyob namlo nyiinwb doobnv bulug lvgab dvba peen!”

⁴Kokw so Pitor bulam hogbvxeq nyiknum ham hog mwlwngam bekinnum.

⁵“Ngo Joppa bopamho xumdul doodwkho nyiqry ak kaanum. Ngo vj pogam golo cuukiq vpiam hoqgab tvl ao gvda toloqkv ngoqg dookub tvpoq dvb kaapanum.

⁶Ngo kvvdy lalal kaat gvl uraho lvpia lwpybo sudum svrv, gwn-xarnbo, tvb-tapeq ngvla mooro hoqgv pvtangv doonum.

⁷Hoo agam yal ak ngam bedwb ngo tapanum, Pitor gorab gvdwl meng dvl dvto!’

⁸Hvbmabde ngo benum, “At Sw hvbjaq ma! Ngo lokam mubur mvcnam gokam ho kacbo dvnam hoolu go ngoqg agam lwqkama!

⁹Ao toloqgv lokta agam yalv benum, “Pwnbov dvrwqbov hvl benam mam kac dvnwk hvl akukam mwwmab.’

¹⁰Soq sib akin luum go nyixo kokw so hog mwlwngv lokta ao gvdab siikurl seeca gvnkun.

¹¹Hoqhvb nyidu dvkjaq ho nyi oum go Sijariya hoqgv ngoqg dookub kanamnam nyi tulungv ngoqg dooknam ho wc kunum.

¹²Yalv ngam bulug lvgab mwum maab wbanvk hvl bekinnum. Soq mwwjwbo nyi ax siikam ngoqg lvgab Joppa hoqgv Sijariyab wbanum, hoo ngul mwlwngv Korneliyaswg nam urab haaknum.

¹³Mwv hoggub nyil ao gumtw ak mwwg nam uraho daqtwl mwam bedwb kaapanum ham mwv ngul mwlwngam bekinnum. Joppab nyi kanam tvl Simon Pitor rvk hvl benam nyi ak ham goqmto.

¹⁴Mwv nam la noqg imiq nyi mwlwngv hoggub nyil ywwtayin hoq pagoqkam gootayin!

¹⁵Hoo ngo goorab yukam Dvrwqbo Yalv bulug aoho ngulam otuqho nyinam hvbkalam ipoqnum.

¹⁶Hoo At Sw hog hvla xeq benum ham ngo mwwpa kunum, Jon iss lvgab baptijum jinum, hvbmabde nulam Dvrwqbo Yal lvgab baptijum jitayin!

¹⁷Sija jvqtw jaqb kaadar looda dvb Pwnbov Nyoodo nyi tulungam kam ngulv At Sw Jisu Kriston mwwjw yukho, ngulam jinam akinam bulamkam jipa kun! Hvnyiloqkam, ngo hiyv, Pwnbog nyitanam mam bitur deenbo nyiv?”

¹⁸Bulv soq benam sam tatkul benyi-beyal benam mam bengo tukul apaq kunum, hoo Pwnboam paqbnv bulv benum, “Pwnbov nyoodo nyi tulungam kam mwwkur mvdwb mood jitwl bulam swwgam jipa kunyi!”

¹⁹Istepennvn mengxo kokw so mwwjwbo nyi tulungam mvnyi-mviyal mvgam gab bulv cwrsaq-bvraq twqb nyinya kunum, tuugin Poinisiyab, tuugin Saipraswb hoo Antiok wbnv Juhudi nyi tulu arongam puiyam bekinnum.

²⁰Hvbmabde mwwjwbo nyi tulu gon, Saipras hoqgv la Siren hoqgv Antiok wbnv Nyoodo nyi tulungam kam bulam At Sw Jisug Tugu puiyam bekinnum.

²¹At Swg atorv bulug lvgab doobanum, hoqgab nyiv vijaqg mwwkur laikul At Swn mwwjw kunv mwwg dookub hookurnum.

²²Soq pui sam Jerusalemho doonbo mwwjwbo nyi tulungv tapanum, hoqgab bulv dvrwq namlo hoqgv Barnabasnvn Antiokwb kanamnum.

²³Mwv wc kunv Pwnbov nyi tulungam hog hwdgo anyal lvqc kunum ham kaapa tvl mwv hemp albanv bul mwlwngam hindy jijaqb mwwjw gvdwl dootwk hvl biywr-bebamnum, hoo jvqtw jaqb At Swn mwwjw gvdwl atwg hang uralo aptvk hvl tomswrnum.

²⁴Barnabas nyi albo nyiib nyinum, mwv Dvrwqbo Yal rooxonum, hoo mwwjw jwwtw twiya bo nyiib nyinum. Nyiv vijaqg At Swn mwwjw kunum.

²⁵Hoqg kokw so Barnbas Tarsas bopamb Soulnvn meekar taab wnum.

²⁶Mwv Soulnvn meepa kunv mwam Antiokwb bool wgnum. Kokw so bunyiv dvrwq namlo hoqgv nyi tulungam vnyw nywpw go nyi acam camt algo tomswr banv dooba sunum. Ho Antiok ho buu tulungam otuqjaqb Kristan hvl goqt goqlwl goqconum.

²⁷Hoq apo ditaqho Jerusalem hoqgv nyiqry benbo acam go Antiokwb innum.

²⁸Bulug pengko hoqgv Agabusek hvl eminam ak hv yalwg ator lvgab daqrab banv gvda gvt hoo dwr poot jaqg wta yik hvl bekinnum. (Hoq apo ho Klodiyas Lvpw abwb swwnum.)

²⁹Buu tulungv Judiya hoq doonbo mwwjwbo nyi tulungam svka dvb hvl hwwbwqnum. Bulv nyi akinv hog hwdgo jidwb nyiyinum hwdgo vx-cwrv jidwb hvl goor minsnum.

³⁰Bulv sam bekjaqb hvraqb nyiknum; kokw so bulv twngkam Barnabas gvla Soulwg alaqb Judiya ho doonbo nyi tulu dvrwq namlo hoq nyi axa tulug alaqb jim dvb jilwqnum.