Read Nyishi BON 13 Bible Online

BON 13 - Nyishi bible

BON 13

¹Antiok dvrwq namlo ho nyi tulug pengko ho tuugin nyiqry benbo tulungv hoo tuugin tomswrbo nyi tulungv doonum; Barnabas, Simon (kaiya bo hvnam hv) Siren hoqgv Lukiyas, Lvpw Herodg sokamnam Manayin hoo Soul.

²Bulv At Swn paqbnv dery reebanv doodwkho, Dvrwqbo Yalv bulam benum, “Barnabas nvla Soulnvn ngoqgab xuqbwql xuqlinto, ngo bulam nyim dvb goqnam bonam nyim tayin.”

³Bulv dvmab vrr banv xumnum, ho bulug aoho bulv alaq idaql xumtwl bulam kanam tvl wnum.

⁴Barnabas la Soul Dvrwqbo Yalam kanam kotwl Seleyusiyab hoqgv bulv Saipras diipwb wnum.

⁵Kokw so bulv Salamisam wc yukam bulv ho Pwnbog agam mam Juhudi tulug Sinagog namho betamnum. Bulv Jon Marknvn bulug bon nyikho svka kodwb hvl bulug lvgab bool yvgnum.

⁶Bulv diip tuurgon hoqgv tuurgonwg Papas bopam nagub wnum; hoqho bulv nyiqry kaanbo nyioky nyub Bar Jisu ngvk hvl eminam nyi ak kaapanum. Hoq nyi ak hv ngo nyiqry kaanbovk hvl atam besnum.

⁷Bulv hoq diip hoqg laat saab Sergiyas Pouloswg ajinb nyinum, ho mwv nyebia sora pwbw albo nyiib nyinum. Laat saab akv mwv Pwnbog agam mam tvnw layil Barnabasnvn la Soulnvn mwwg ogumb goqanum.

⁸Hvbmabde nyioky hiqnbo Elimas (Gwrik agamb benam) bulam haam dvb benam mam tamanum; mwv Laat saab akam Pwnbog agam mam mwwjw mvma dvb mwwnv alwb nyikanum.

⁹Hoq apo ho Poul hvl benam Soul nyioky hiqnbo akam kaagab lalal ho

¹⁰hoo benum, “No uiyig kongv! No lak albo luucw-luutam ceebio baqnbov. No hog mwlw almab gwwly nyinanam doogbov, hoo lwxiam At Swg jvqtwngam vm yaab mvvkub dvn!

¹¹Noqg aoho sija At Swg alaqngv idaqtayin, hoo no nyiqca tayin hoo mood gob no doonyiam kaanyi kuram.” Ho dara Elimas mwwg vnyiqngv kaapa kuma dvb kaaya bo hog haapam hvb nyinbo ak mwwg vnyiqngam juqcw dvb hempanum. Ho mwv nyiqca tukul meekar banv mwam alaqkam gvbwl bool wg kodwb mwwnv mwv nyi hubkarnum.

¹²Laat saab akv hoqhvb nyinam mam kaapa tvl mwwjwnum; ho At Swg pagoqkam tomswrnam mam tatwl mwv lomnum.

¹³Poul la mwwg ajin tulungv Papos hoqgv Pampiliya gvdag Pargab swpwb rabnum; hvbmabde Jon Mark bulam apaqpel mwv Jerusalemb wkur kunum.

¹⁴Bulv Parga hoqgv hvraqb wknv Pisidiya gvdag Antiok ho wc kunum. Bulv Doonu dvk aalho Sinagog nam urab haabnv doonum.

¹⁵Mojesg pvvbam hoo nyiqry benbo tulug xeqpwl apnam potangam poory-rixo kokw so Sinagog hoqg tomswrbo nyi tulungv Poulwn la Barnabasnvn nyi kanam tvl bemnum, “Vbw-bor tulu, nyi tulungam biywr-bebam sanamv doop nyiloqkam beto.”

¹⁶Poul daqrab banv mwwg alaqngv meiyab banv berabnum. “Pwnboam xumn bo ngoqg Israel nyi tulu, hoo Nyoodo nyi tulu, ngoqg benam sam tagabto!

¹⁷Soq Israel nyi tulug Pwnbov kol ngulug at ab tulug xuqnamv, hoo bulv nyoodo nyiib nyil Ijipt gvdaho doosbakam bulam nyob poot jaqb nyil swwmnum. Pwnbov bulam Ijipt gvda hoqgv mwwg ator hinc-kvvc lamanam lvgab boolin kunum.

¹⁸Hoo vnyw campigo mwv bulug nyinam wnam mam deexa-rara ho cwqnum.

¹⁹Nyob luuxy kvn go Kanaan gvda hoqkam ruqxa tvl mwwg nyi tulungam hoq gvdag atwb swwmnum.

²⁰Vnyw lwwpy gola camg go bulam swwmnum. “Soq kokw so mwv bulam nyegam belaqboam jitwl, nyiqry benbo Samuyel mood nagub doomnum.

²¹Kokw so bulv lvpw at loqk hvl konum, Pwnbov bulam Benjaminwg dvpar hoqg Kiswg ko Soulnvn bulug lvpw atwb vnyw campigo swwmnum.

²²Kokw so mwam lvpw atwb swwm mvmab mvxo so Pwnbov Debidg pagoqkam hvl benum, “Ngo Jesseg ko Debidnvn ngoqg hang mwwlwqko jaqb, ngoqg nyitwk hvl benam mam nyidwkho nyi ak ngo kaapa pakun.”

²³Jisu kam Debid ko hosiqb nyinum. Mwam Pwnbov Israel nyi tulungam Ywwlin mvdwb hvl dingrwl apnum.

²⁴Jisug haama daab Jon Israel nyi tulungam bul mwlwngam bulug nyic-nyia lamta hoqgv wkur gvdkul baptijum naatwk hvl betamnum.

²⁵Kokw so Jon bon bonam nyinya svqtwqb nyidwkho, mwv nyi tulungam benum, “Nulv ngam hiyv vpv mwwdwn? Ngo nulug kaaya yal doodunam ak hvvma sulak. Hvbmabde tato! Mwv ngoqg kokw yaab hoodul doodo, ngo mwwg luxuqngam kam mwwg lvpia hoqgv pilin jidwb simp yaama dvn.’

²⁶“Abraham gv ko hosiq, ngoqg vbw-bor tulu, hoo Nyoodo nyi tulu, Pwnboam paqnbo soq dookum so doonbo nyi tulu, ngul gab sulak soq ywwt ywwnam tugu pui sam ngulam Pwnbov kanam jipan.

²⁷Jerusalem boloq nyi tulungv la bulam nyig wgbo nyi tulungv mwam ywwt ywwnbo akv hvl bulv cengmanum, hoo bulv nyiqry benbo tulungv xeqpwl apnum potangam Doonu dvk aal looxiam poory rinam mamkam tacin kumanum. Hvbmabde bulv nyiqry kaanbo nyi tulug xeqpwl apnam mam niqtuq lengm dvb Jisun mengnukun.

²⁸Bulv Jisun mengk pagoq kaapa maasnum, hvbmabde bulv Pilatnvn mwam mengtwk hvl benum.

²⁹Kokw so bulv hog mwlw bonam nyixo so Dvrwq potag xeqpwl apnam mam niqtuq lengm dvb mwwg buu tulungv mwam daapo hoqgv joopoq kunv nyubu ura golo liiknum.

³⁰Hvbmabde Pwnbov Mwam sik boam purab kunum.

³¹Hoo mwam apo poopw go otuqho mwwg lvgab Galili hoqgv Jerusalem nagub wba bo nyi tulungv mwam kaapanum. Hoq nyi tulungv sija mwwg puiyam hvvkib swwl Israel nyi tulungam bekin dvn.

³²Hoo ab tulungam Pwnbog dingrwl apnam Tugu Puiyam ngulv nulgab baqa jidwn,

³³mwv ngul gab niqtuq nyilinl, Jisun sik boam turkur dukub purab jipa kun, soq pagoq sam Mwmin nwswrwg vnyi deenbv xeqnamv doodwn; “No ngoqg Ko Tuupv, soolo ngo noqg Abwb nyidkun.’

³⁴Pwnbov Jisug pagoqkam mwam sik boam purab yukho mwam lokta sitin mvta kuma hvl benum; “Ngo nulam Debidnvn dingrwl ap kunam mam, jvqtw jaqb lvqc cisam ngo citayin.’

³⁵Mwv lokta Mwmin nwswr lo bel apnamv doodwn, “ ‘No noqg Dvrwqbo Akam sim dvb jiram hvl bepan.’

³⁶Debid hvbaloqkam mwv mwwg swwca de ho mwv Pwnbog nyis mvs bonam nyil swwpel kokw so mwv siknum, hoo mwam mwwg at ab tulug nyubu bviywrho liiknum, hoo mwwg svmangv yaaknum.

³⁷Hvbmabde Pwnbov sik boam purab kunam ak hv yaamanum.

³⁸Ngoqg vbw-bor tulu, nul mwlwngv Jisu galoqkv nyic nyiangam apaq kudub haadwn hvl nulam bekinam, hoo hiyv lajaqkam mwam mwwjw bov hog mwlw hoqgv swrso dukun

³⁹hoqgv Mojesg pvvb ho nyic nyia hoqgv nyedar nyomanum.

⁴⁰Hoqgab, nyiqry benbo tulug benamv nulug aoho haam maadwb nulv hengab to:

⁴¹“Tagabto, Pwnbog benam mam benyi-beyabo hoo loml sinbo tulu! Hoggab nulug swwca deeso ngoqg bonam ak nyidu dvn, ham nulam nyi ak bekin jaqkam ham nulv mwwjwram!’”

⁴²Poul la Barnabas bunyiv Sinagog nam hoqgv lengknv wleq yukam nyi tulungv bulam Doonu dvk aal haata bo hookam haag dvl bulam meegta soq gon tulu sam bekin tvbwk hvl benum.

⁴³Nyi tulungv Sinagog nam dookum hoqgv wpin wral wleq yukam kokw so Poul la Barnabas bunyig kokw so Juhudi nyiv la Nyoodo nyiv Juhudi dormo naanbov vijaqg wbanum. Poul la Barnabas bulam anyab nyigdvl Pwnbog anya ho swwl dootwk hvl biywr banv tomswrnum.

⁴⁴Doonu dvk aal loogwn so bopam hoqgv nyiv viyagon At Swg agam mam tatab hookumnum.

⁴⁵Kokw so nyi tulungam haanam mam kaatwl Juhudi tulungv hangv baqbnv bulv Poulwg ceebio baqbnv mwam tob-tai nv mwwg benam mam benyi-beyal benum.

⁴⁶Hvbmabde Poul la Barnabas bunyiv haakam alwb vcib berabnum, “Pwnbog agam mam nulug agaho otuqjaqb bekinamv al yaat banyi. Hvbmabde nulv Pwnbog agam mam haqxia ko-gab atv nwrba cwtam swwgam kaapa nyoyaram hvl mwwgam gab, ngulv sija nulam apaq peekul Nyoodo nyi tulug dookub wde kun.

⁴⁷Hoggab At Sw ngulam soq gaml sam jipa kun: “Ngo nam gvda gvtwg Nyoodo nyi tulu gab huto gob mvpa kun, ho swcw nvg ywwtwr nagub ywwt ywwnam mam bvqmw mvdwb.’ ”

⁴⁸Kokw so Nyoodo nyiingv bulv soq pui sam tapa tvl hemp ponya banv bulv At Swn paqnum; hoo nwrba cwtam swwgam kaapal swwm dvb hvl xuql apnam nyi tulungv bul mwlwngv mwwjwnum.

⁴⁹At Swg agamv hoq gvda gvt ho wiywq yukam nyi mwlwngv puiyam tapa kunum.

⁵⁰Hvbmabde Juhudi tulungv bopam hoq nyi nyig wgbo tulungam hoo Nyoodo nyi tulug nyem xinam tulungv, Pwnboam xumn bo nyi tulungam biurnum. Bulv Poulwn la Barnabasnvn mvnyi-mviyal mvrab banv bulam bulug gvda hoqgv ruqlinum.

⁵¹Hvvky tulungv bulug lvpia hoqg diimwram dadin banv nyi tulu gab mvpaqpel bulv Ikonium bopam wknum.

⁵²Hoo Antiok ho doonbo buu tulungv bulv hemp pomanam mam poknv Dvrwqbo Yal rooxo kunum.