Read Nyishi BON 14 Bible Online

BON 14 - Nyishi bible

BON 14

¹Ikonium hookam Poul la Barnabas bunyiv Juhudi tulug Sinagog nam urab haabnv Tugu Puiyam bekinnum, ham tatwl Juhudi nyiv la Nyoodo nyi tulungv vigo mwwjwnum.

²Hvbmabde mwwjw maanbo Juhudi nyi tulungv Nyoodo nyi tulungam ol lubur tvl bulam mwwjwbo nyi tulungam hang baqrab banv ceebiob nyinum.

³Hvvky tulungv hoq gvdaho apo jaqg doonum. Bulv haakam alwb At Swg puiyam bebnv mwwg anyangv jvqtw jaqb doodnvk hvl kaakin banv bulam swrdorxeqb nyimanam mam nyibnv kaakin mvdwb bulam ator jinum.

⁴Hoq bopamho nyi tulug hangv pwnyi gob mwwnum, tuugin Juhudi nyi tulug taqlwb, hoo tuugin xuqnam tulug taqlwb mwwnum.

⁵Kokw so Nyoodo nyi tulungv la Juhudi tulungv lokub nyiyin akin gob nyil xuqnam tulungam hvnyw-har nyipa dvb hvl bulam wlw hurdwb nyig wgbo nyi tulungv goormins kunum.

⁶Kokw so xuqnam tulungv soq pui sam tapa tukul bulv Listrab la Darneb Likaoniag bopam tulu hoola ogum bviywrho doonbo bopam keknv,

⁷hoo bulv Tugu Puiyam bekin kunum.

⁸Listra nampamho nyi ak ko bwwiywk hoqgv lukum kuml gorab nyomab doonbo nyi akv Poulwg benam mam tal doodunum Poul mwwg mwwjwnam mam kaatwl, mwam mwp jikin do mwwnv, mwam kaagab jinjin banv

¹⁰vc alwb benum, “Daqrabto!” Ho dara nyi akv daqrab banv wgaql yvnum.

¹¹Hoo soq sib Poulwg nyiknam mam nyi tulungv kaatwl, bulv sogoq, goqrab nyiabnv benum, “Nyiib pwnbo tulungv nyiknv ngulug dookub ipoq paku!”

¹²Hoqgab bulv Barnabasnvn Jisu, ho Poulwn Harmes hvl eminum, hoggab Poul mwv agam xilo goonbo gob nyinum.

¹³Jisu Pwnbog xumk nam bopam bviywrho doonum, ho Jisu Pwnbog nyub akv svv hvvb hoq la opungam xumkumko viyap haagab bwa banv, mwv la nyi tulungv xuqnam tulungam xuml xumtab haanya tanum.

¹⁴Kokw so nyi tulungv hoqhvb nyitanam mam Barnabas la Poul tapa tvl, bulv nyi pvtwg lvpa rajaqb xara banv bulug vjam twqjorl sogoq goql benum,

¹⁵“Nyi tulu, nulv soq sam hoggub nyidwn? Ngulv kam nulug hvk nyiv sulak! Ngulv nulam swcw nyodongam, sa-svlongam hoo hoq aoho doonbo mwlwngam pwnbo Pwnbog Tugu Puiyam nulam, sima bo Pwnbog dookub murty ui panam hoqgv mwwg gab wkur tukuk hvl bekin dvn.

¹⁶Kol otuqho Pwnbov nyi tulu mwlwjaqkam bulug mwwlwqkob at atwg mwwkub nyim wmnum.

¹⁷Hvbmabde aalwg looxiam bon al kvda boam nyibnv mwv doodnvk hvl kaakin doodwn, mwv ao toloqkv nyodongam hodwb jidwn; mwv nulam mood jaqkam am temiam jidwn ho mwv nulam dvsam jidwn, hoo nulug hangam jubxo-yaro dvb hemp pol swwdwb jidwn.”

¹⁸Hvvky tulungv hoqhvb bed kulinkam bulam xuma mvdwb miceq gokam bitur nyok maanum.

¹⁹Juhudi nyi tulu go Pisidiyag Antiok hoqgv la Ikonium hoqgv haanum; bulv nyi tulungam ol lubur tvl bulug nyemaqb twqkub banv Poulwn wlw hurnum hoo kokw so mwam bopam agab sidkun go mwwnyia banv seelinum.

²⁰Hvbmabde mwwjwbo nyi tulungv mwwg ogumho doqkum doqlum yukam mwv gorab kunv bopam urab haaknum. Loogwn so mwv la Barnabas Derbvb wknum.

²¹Poul la Barnabas Tugu Puiyam Dere gvda hv bekin yukam nyiv vigo mwwjwnum. Kokw so bulv Listra, Ikonium, hoo Pisidiyag Antiokwb wkur kunum.

²²Bulv mwwjwbo nyi tulungam biywr bebia banv bulam atorb mwwg dvl hindib mwwjwl dootwk hvl benum. Bulv bulam tomswrnum, “Ngulv Pwnbog lvpw haty lo haadwb hentwr lwwywngam hendwb nyitayin.”

²³Dvrwq namlo vx gab bulv nyig wgbo nyiam bul gab xuql ap jinum, hoo bulv swgw banv hoo dery reebnv bulam bulug mwwjwnam At Swg alaqb gvqlwq jinum.

²⁴Pisidiya gvdangam wpeq laikul bulv Pompiliya gvdangam wc kunum.

²⁵Bulv Tugu Puiyam Parga hoola hoqgv Attaliyab ibnv bekinnum,

²⁶hoqgv bulv Antiokwb issib jookur kunv bulam Pwnbog alaqb gvqlwql jitwl bulug niqtuq nyilin kunam bonam nyirabko ho wc kunum.

²⁷Kokw so bulv Antiok ho wc yukam, bulv dvrwq namlo ho nyi tulungam goqkum banv Pwnbov bulug lvgab doomin gvl hog mwlw nyinam wnam mam, ho hoggub nyil mwv Nyoodo nyiam mwwjw mvdwb lamtangam mvko jinum ham bekinnum.

²⁸Bulv Antiok ho mwwjwbo nyi tulug lvgab apo go doomin gvnum.