Read Nyishi BON 16 Bible Online

BON 16 - Nyishi bible

BON 16

¹Poul hvraqb Derbe la Listrab wnum. Hoqho Timoti ngvk hvl eminam mwwjwbo nyi ak doonum; mwwg annvkam mwwjwbo Juhudi nyiib nyinum, hvbmabde mwwg abv Gwrik nyiib nyinum.

²Listra hoq mwwjwbo vbw-bor tulungv la Ikonium hoq doonbo nyiv Timotinvn nyi albovk hvl xikum poqkumnum.

³Poul Timotinvn mwwg lvgab bool wg dvb mwwnum, hoqgab mwam mux mvnum, hoggab hoq gvdaho doonbo Juhudi tulungv bulv Timotig abv Gwrik nyiv hvl cengnum

⁴Kokw so bulv bopam tulungam wpeq yukam mwwjwbo nyi tulungam bulv hvvky tulungv la Jerusalemho nyiixa tulungam nyicw-mwcwngam hindib bugil swwtwk hvl tomswrnum.

⁵Kokw so dvrwq namlo hoq nyi tulungv hindib atorb swwbnv bulug mwwjwngv jwwkam alkunv nyiv vigo kokw so dooknum.

⁶Bulv hvraqb Prigiya la Galati gvdangam wpeq yukam Dvrwqbo Yalv bulam Asiya gvdaho puiyam begaq mvdwb jimanum.

⁷Kokw so bulv Misiya gvdag vrram wc yukam, bulv Bitinia gvda urab haadwb nyitanum,

⁸hvbmabde Jisug Yalv bulam wdwb Misiyab wpeq layil Troaswb iknum.

⁹Poul hoq aiho nyiqry ak kaanum, hoq nyiqry kaanamho mwv Mesidoniya hoqgv nyi ak daqtwl mwam haato hvl benum, “Mesidoniyab haal dvl ngulam svka tvb!”

¹⁰Poul soq nyiqry kaanam sam kaaxo twqda kalam, ngulv Mesidoniya wdwb mwx-mvaq kunum, hoggab ngulv cengnum ngulam Pwnbov Tugu Puiyam hoq gvda hoqg nyi tulungam bekin mvdwb ngulam goqpa kun mwwnum.

¹¹Ngulv Troas hoqgv Samotres iss jaajib wnum, hoo loogwn so Nipolisub wnum.

¹²Hoqgv ked diipwb Pilipib wnum. Soq bopam si Mesidoniya gvdag otuqjaqb doonum. Soq gvda si Roman hvdwg gvdab nyinum, ho ngulv apo jaqg hoq bopamho doonum.

¹³Doonu dvk aal hoojaq ngulv bopam hoqgv lengb nv pobu soiyoqb Juhudi tulug swgwl mvkv dood nvpv mwwnv wnum. Ngulv doobnv hoq ditaqho dookum nyanbo nyem tulug lvgab gool doonum.

¹⁴Ngulug benam mam tanbo bulug pengko hoqgv Lidiya ngvk hvl benam Tiyatira gvda hoqgv, mwn jilw vj xinam hoq puqn bov. Mwn Pwnboam xuml daql swwnbo nyem akgob nyinum, hoqgab At Sw mwnwg hangam mwwlaq dvb mvko jigam gab mwn Poulwg benam mam tagab jinjin banv tatwl mwwjwnum.

¹⁵Hoqgab kokw so mwn la mwnwg nam hoq nyi tulungv baptijum naanum. Kokw so nyem akv ngulam mwnwg nammwb dvgoq goqbnv benum, “Nulv ngam jvqtw jaqb At Swn mwwjwbo nyi goknyi hvl mwwd nyiloqkam ngoqg nammwb haag dvl dooto.” Kokw so mwn ngulam biguml wg kunum.

¹⁶Aal golo ngulv swgw ko golo wdul doodunum, ho ngulv almanbo yalv doogbo nyem paqn ak wrwqnum, mwn kokwngam hog nyitayin ham nyiqry kaabnv bekinnum. Ho mwn nyiqry kaajo banv twngkv vijaqg mwnwg atam nvvjnum.

¹⁷Mwn ngulug la Poulwg kokw kokwb wmin gvnv sogoq goql benum, “Soq nyi tulu si mwlwjaqkam koi yaanbo Pwnbog nyerangv! Bulv nulam hoggub nyil ywwt ywwdwb nyitayin ham bekin do!”

¹⁸Soq sib akin mwn apo jaqg Poulwg kokw-kokwb wbnv bel yvgam gab Poul haaxaql mwn nywkur banv hoq alman yalam benum, “Ngo Jisu Kristog eminb nam mwnwg ura hoqgv agab lengt kuk hvl gaml jidwn!” Yalv hoqhvb beda kalam mwnwg ura hoqgv agab lengknum.

¹⁹Kokw so paqn ak hoqg at aiyv bulug twngk paak lamtangv nyin kuba mwwnv, bulv Poul la Silasnvn nootu banv bulam bopamg saab dookub siilwqnum.

²⁰Bulv bulam Roman saab tulug dookwb boa banv benum, “Soq Juhudi nyi tulu si, bulv ngulug bopam ura si yolu swcin rooxob bel yvdo.

²¹Bulv ngulug nyicw-mwcwngam ceebiob bel yvnyia do. Ngulv Roman nyiv, bulug nyinam wnam ham ngulv nyijwq wjwq deema!”

²²Nyi acamv mwlwngv lokub bulam ceebio hangwb baqrab banv nyibam nyanum, saab tulungv bulug vjam twqjor twqywql twqxianum, hoo bulam xipwql mvtwk hvl gaml jinum.

²³Bulam xigur gurnyiaql mvtar tvl pvtwqb vlwqtvl pvtwq hoqg saab akam bulam vdwb tag kortum gvdwl ap tvk hvl gaml jinum.

²⁴Pvtwq hoqg saab akv soq gaml sam tatwl mwv bulam pvtwq urajaq cwwrw golo bulug all alaqngam tagv kargab tvl swwrw daat al dvvnyig pengko golo leedaql apnum.

²⁵Ai nywywra ho Poul la Silas bunyi bemin bebnv Pwnboam xumdul doonum, ho pvtwq tumnam nyi tulungv bulug benam mam tal doonum.

²⁶Cengma lvpa golo nyioby bit ak pvtwq nammam yookub-yaaxeq dvb hwqnum; hoqhvb nyida kalam pvtwq nam hoq viyapv yabkonum, ho pvtwq tumnam nyi tulug all alaq hoqgv gaiyv yoqsuq-yoqraq kunum.

²⁷Kokw so pvtwq hoqg saab akv huurab kunv pvtwq nam viyap pam yabkol doodub kaapa tvl mwv mwwgamv pvtwq tumnam nyi tulungv kelin nuknago mwwnv mwv atv mengsul sitanum.

²⁸Hvbmabde Poul vc alwb sogoql benum, “No atam hog mwdw sumabv! Ngul mwlwngv si doodwn!”

²⁹Kokw so pvtwq hoqg saab akv mur rwgab layil Poul gvla Silaswg dookub xara banv tvmdwr hwqbnv bunyig lvpia lwkw ho geqpnum.

³⁰Kokw so mwv bulug agab boolinl toxnum, “Nyiilo tulu, ngo ywwt ywwk dvb hoggub nyitayin?”

³¹Bunyiv mwam birwqnum, “At Sw Jisun mwwjwto! Ho lak no la noqg imiq nyi tulungv ywwtayin.”

³²Kokw so bulv At Swg agam mam mwam la mwwg namho doonbo nyi mwlwngam bekinnum.

³³Hoq ai daraho saab akv bulam boonv bulug unnam hwrxaql mwjkunum, ho mwv mwwg imiq nyi tulu mwlwngam baptijum naag kunum.

³⁴Mwv Poulwn la Silasnvn mwwg nammwb booknv bulam dvs twwsv jinum. Mwv la mwwg imiq nyi mwlwngv kokw so hemp poma vrram poknv doonum, hoggab mwv sija Pwnboam mwwjw pakun.

³⁵Ar huto yukam Roman saab tulungv sipai saabam gaml jibnv benum, “Hoq nyi tulu ham wwm tuk.”

³⁶Hoqgab pvtwq hoqg saab akv Poulwn soq pui sam bepanum, “Saab tulungv nam la Silasnvn tolin tukuk hvl gaml jilwq paku, Hoqgab nulv sija swrsomalob soqgv leng dukul wnku.”

³⁷Hvbmabde Poul sipai saab tulungam benum, “Ngulv hog nyixiaq wxiaqnam meepa maakam bulv ngulam nyi mwlw rolu kaagaho xipwql mvnum, hamkam bvvtwl ngulv Roman nyiv! Hoq kokwb ngulam bulv pvtwqb lwqpa. Ho sija bulv ngulam cooikab kvvsil kanam tvl wwm tadwn!” Hv hogram; Roman saab tulungam bulam atv haag dvl ngulam tolin mvto.”

³⁸Sipai saab tulungv soq pui sam Roman saab tulungam bekinnum, kokw so Roman nyiv hvl tapa tvl bulv bos sonum.

³⁹Hoqgab bulv wknv bulam ngulug nyixiaqnam mam apaq tvbwk hvl beknv bulam pvtwq ura hoqgv agab boolin kunv bulam bopam hoqgv wnkuk hvl benum.

⁴⁰Poul la Silas pvtwq hoqgv wknv Lidiyag nammwb wnum; Ho bulv mwwjwbo vbw-bor tulungam kaapa banv bulam biywr-bebaml agam bepekul wleq kunum.