Read Nyishi BON 18 Bible Online

BON 18 - Nyishi bible

BON 18

¹Soq kokw so Poul Eten hoqgv Korintib wnum.

²Hoo mwv Akila ngvk hvl eminam, Pontas gvdaho ko bwwnam Juhudi nyi ak kaapanum. Mwv Itali gvda hoqgv oyu maadab mwwg nywxw Prisilla mwwg lvgab boolayil haanum; hoggab Lvpw ab bokum Klodiya Roman bopam hoqgv Juhudi tulungam wtkuk hvl gaml jinum. Poul bulam kaatab wnum.

³Bulug lvgab doobanv bon nyibanum. Poul mwv tombu mvl mwwg dvnam mam hvbkalam bulug bonam nyinam kalam hvb nyinum.

⁴Mwv Doonu dvk aal looxiam Sinagog namho Juhudi tulug lvgab Gwrik nyi tulug lvgab, mwv bulam tvjwl mwwjw mvdwb mwwnv alwb bid pwcwl benum.

⁵Kokw so Silas la Timoti Mesidoniya hoqgv wc yukam, Poul aalwg looxiam Jisu Ywwnbo akv hvl bid pwcw banv Juhudi nyi tulungv mwwg benam mam tvjw maab mwam nyi tulungv bec-beyab benum.

⁶Hoqgab mwv mwwg vj hoqgv os-oiyam twqdin banv bulam benum, “Nulv ceeko baloqkam, nulv atv hoq yolungam baqs tvka! Ngo yolungam baqram. Sija galoqkv ngo Nyoodo nyi tulug dookub wde kun.”

⁷Kokw so hoqgab mwv bulug dook hoqgv wknv Titiyas Jastas ngvk hvl eminam Pwnboam xumn bo Nyoodo nyi akwg namho dootab wnum, mwwg nammv Sinagogwg nam bviywr jaqho doonum.

⁸Krispas, mwv Sinagog ho nyig wg bov, mwv At Swn mwwjwnum, ho mwwg imiq nyi tulungv bul mwlwngv la nyiv vigo Korinti ho doon bov Poulwg puiyam tapa tvl mwwjw banv baptijum naanum.

⁹Ai yubg golo Poulwg dookub At Sw haabnv mwam nyiqry ak kaamwl benum, “Bos somabv, hvbmabde noqg nyinam mam apaq maab nyito.

¹⁰Ngo noqg lvgab doodwn. Nam hiyvkam mwdwr nyoram, hoggab soq bopam si ngoqg nyiv vigo doodwn.”

¹¹Hoqgab Poul hoq bopamho vnyw nywg la nywpo go nyi tulungam Pwnbog agam mam tomswr banv doonum.

¹²Galliyo Akaiya gvdaho Roman laat saabwb swwm dvkho Juhudi tulungv lokub nyemaq maqkin gob nyinv Poulwn nootu layil mwam mvl bekwb Galliyo dookub boanum.

¹³Bulv benum, “Soq nyi ak si nyi tulungam Pwnboam pvqcwb paqmab pvvbam juqbol nyim dvb bulam sup pugdo!”

¹⁴Kokw so Poul goota tayin Galliyo benum, “Soq si nyimur-wmurnam gooi nyiloqkam ngo sam nulug Juhudi tulug lvgab cwqg dvl taba dvb nyitayin.

¹⁵Hvbmabde soq si hwwbaloqkam nulug agam, eminho hoo nulug atwg pvvb ho yolu bviyaq minsnamgo, hoqgab nulv atv sam pvvb padwb nyido. Ngo soq svk bvrwq sam goodil pvvb panbo gob nyiram!”

¹⁶Hoqgab mwv bulam nyel hoqgv ruqlin kunum.

¹⁷Kokw so bulv Sinagog ho nyig wgbo Sostenesenvn nootu banv mwam nyel rolug maqparho jinum. Hvbmabde Galliyo hog gokam mwwmab mwwnum.

¹⁸Poul apo jaqg Korinti ho mwwjwbo nyi tulug lvgab dooxo kokw so bulam apaq peekul, Prisilla la Akiula lvgab iss jaajib caol Siriyab wleq kunum. Jaajib caol wma daab mwv dingbnv Cenkriaho mwwg dumpo dummam reqxianum.

¹⁹Kokw so bulv Ipisi ho wc yukam Poul Prisilla nvla Akiulanvn apaqpel mwv Sinagog nam urab haabnv Juhudi tulug lvgab gooiyaq minsnum.

²⁰Bulv mwam bulug lvgab apo gob doot juk hvl benum, hvbmabde mwv ham tamanum.

²¹Hvbmabde mwv wleq ywwtwl bulam benum, “Pwnbov anya bvnyiloqkam ngo lokta nulug dookub hookur tayin.” Hoq kokw so mwv iss jaajib caol wknum.

²²Kokw so mwv Sijariya ho wc yukam ho mwv Jerusalemb wbnv dvrwq namlo hoqg nyi tulungam salam jinum, hoqgv mwv Antiok wnum.

²³Antiok ho apo go dooxo kokw so Galati gvdab la Prigiyab wpeq banv mwwjwbo nyi tulungam atorb dootwk hvl biywr-bebianum.

²⁴Alekjendriya ho ko bwwnam Apollosvk hvl eminam Juhudi nyi ak Ipisib haanum. Mwv nyegam belaq alnum, ho Dvrwq pota lo xeqpwl apnam gonam nugu-pagam hindib cengnum

²⁵Mwam At Swg Dvrwq lamtangam al jijaqb tomswrnum, hoo mwv Jisug nyinam wnam pagoqkam kvtaqjaqb nyi tulungam tomswrnum. Hvbmabde mwv Jonwg baptijum jinam mam cingtwqnum.

²⁶Mwv haakam alwb Sinagog nam uraho goonum. Kokw so Prisilla la Akiula mwam hoqhvb benam mam tapa tvl mwam bulug lvgab nammwb boobnv meegta Pwnbog lamtangam kvtaqb bekinnum.

²⁷Kokw so Apollos mwv Akaiya gvdab wdwb mwwgam gab mwam Ipisi hoqg mwwjwbo vbw-bor tulungv pota xeqbnv Akaiya hoq mwwjwbo nyi tulungam mwam anyab hoocum haapil svgagvrwq tvk hvl bulam xiqlwqnum. Mwv hvvc yukho Pwnbog anya ko-gab mwwjwbo nyi tulu gab mwv svka poot algob nyiknum.

²⁸Mwv Juhudi tulungam Jisu jaqk Ywwnbo akv hvl Dvrwq pota hoqgv bekin banv nyi tulungam beka minsko ho bulam beyanum.