Read Nyishi BON 19 Bible Online

BON 19 - Nyishi bible

BON 19

¹Apollos Korinti ho doodwkho Poul ked aob wbnv Ipisi ho wcnum. Mwv mwwjwbo nyi tulu ata go kaapanum.

²bulam toxnum, “Nulv mwwjw dvk kokw so Dvrwqbo Yalam kaapa pa i?” Bulv birwqnum, “Ngulv Dvrwqbo Yalv doodnvk hvl, ngulv tapa kama.”

³Poul bulam toxnum, “Hvnyiloqkam nulv hoggub nyil baptijum naanum?” Bulv birwqnum, Jonwg baptijum.

⁴Poul benum, “Jonwg baptijum hv hvbaloqkam nyic nyia hoqgv wkur kunbo nyi tulu gab sulak, hoo Israel nyi tulungam bulam mwwg kokwb hoodul doonbo akam, Jisun mwwjw tvk hvl benum.”

⁵Bulv sam tapa tvl At Sw Jisug eminb baptijum naanum.

⁶Poul mwwg alaqkv bulug dumpo ho idaq yvkam Dvrwqbo Yalv bulug aoho ipoqnum, ho bulv agam oksub benum, ho bulv Pwnbog agam mam bekinnum.

⁷Bulv nyiv wyw leq vnyi gob nyinum.

⁸Poul Sinagog nam urab haabnv mwv pool borum paqta go haakam alwb nyi tulungam benum, ho bulam mwwjw mvdwb bid lalal Pwnbog lvpw hatig pagoqkam bekinnum.

⁹Hvbmabde bulug pengko ho hang vdwbo nyi tulu go doonum, bulv mwwjw maanum, hvbmabde bulv bec-beyal Atwg lamta pagoqkam nyi maqpar aga hv benum. Hoqgab Poul bulam apaqpel buu tulungam mwwg lvgab boolayil Tairannaswg tomswrko nam hv aal looxiam goodul doonum.

¹⁰Soq sib akin vnyw nywnyi go nyidul doogam gab Asiya gvdaho doonbo Juhudi tulungv la Nyoodo nyi tulungv At Swg agam mam tapanum.

¹¹Pwnbov swrdorxeqb nyimanam hog mwlwngam bonam Poulwn jitwl nyim dvb jinum.

¹²Mwwg haaxor tixaq naadwb bvvnam vjam la gv koonam vjam nyi vcbo dookub bwa yukam bulug vcv bulam wleqnum hoo alman yalv kam agab lengknum.

¹³Juhudi tulu go wkar banv yal alman boam ruqlin bo nyi tulu ngvkam At Sw Jisug eminb soq sam nyitamnum. Bulv yal alman boam benum, “Ngo Poulwg bekar yvnam Jisug eminb gaml jidwn.”

¹⁴Bulv Juhudi tulug Nyub Buda akwg Iskeba ngvk hvl eminam ko tuup kvn go soq sib nyil yidunum.

¹⁵Hvbmabde yal almanbov bulam benum, “Ngo Jisun cengdwn, ho ngo Poulwg pagoqkam cengdwn; hvbmabde nulv hiyv?”

¹⁶Almanbo yalam doogbo nyi akv bulam ruqmin gvbnv yolu paiyaq minsnum, hoo bulam mwv mviyanum, bulug vjam twqjornum, hoo bulam mwv un mvg yukam mwwg nam hoqgv keleqnum.

¹⁷Ipisi ho doonbo Juhudi tulungv la Nyoodo nyi tulungv soq pui sam tapanum. Bulv bosnum, ho kokw so At Sw Jisug eminam meeg vi yaiyab yuunum.

¹⁸Mwwjw kunbo nyi tulungv haabnv bulug tadwb bulug at atwg nyiknam mam nyi tulug aga hv xaqlin nyiaknum.

¹⁹Nyioky mvkybo nyi tulungv vigo bulug potangam bwwkum banv hoq pota torabpam mwlwg kaagaho wm parknum, hoo ham xikum xipal xika kunamv twngkwb lwwyw camg gob nyiknum.

²⁰Soq sib alwb nyiknv At Swg agamv meeg yaiya goopor banv ator yaiyab swwrabnum.

²¹Soq mwlw sam nyixo kokw so Mesidoniya la Akaiyab wpeq layil Jerusalemb Poul wdkub mwwnum. Mwv benum, “Ngo alo wxo kokwngam, ngo Roman bopam ngamkam kaadwb nyiky tayin.”

²²Hoqgab mwam svka bo Timoti nvla Irastusnvn vnyiam Mesidoniyab kanam tvl, mwv apo go Asiya gvdaho doonum.

²³Hoq apo ho Ipisi ho Atwg swwg lamtangam bebnv yolu swcin rooxonum.

²⁴Rup yip pwnbo Demetrias hvl eminam nyem pwnbo Artemis xumkumko nam hoqg murtiam pwbnv mwv twngk vigo bon nyinbo nyi tulu gab paanum.

²⁵Hoqgab bulug hvb bonam nyinbo nyi tulungam goqkum banv mwv bulam benum, “Nulv cengdwn, ngulv soq bonam sam nyibnv nyet tvdwn.

²⁶Nulv atv kaas tas gvdo, soq Poulvk hvl benam nyi aksi hognvkam nyidul doodwn; Mwv begamv nyiig mvnam pwnbo hv jvqtw pwnbo ma, hoqgab mwv Ipisi so la Asiya gvda tvqpwg nyi tulungam vi yannam bigum paku.

²⁷Hoqgab ngulug kor-pam mvnam mvkam nyiita yuku, hoq aoho ngulug kor mvnam sam tanyi-taiya dvb nyita yi, hoq hvvtwqma, xumk nam hoqg koibo nyem pwnbo Artemis nvkam hog xidwb nyikram, ho mwwg ywwnamv la vxig xumnamv Asiya gvda so gvda gvt mwlw so nyiita yukun!”

²⁸Nyi acamv soq benam sam tatwl bulv hang lingtwr twrya nyiabnv sogoq goqrabnum, “Ipisig koibov Artemis!”

²⁹Bopam bumpwngv hur-marab durabnum, yolu dunbo nyi tulungv Poulwg wgnam Mesidoniya nyi vnyiam, Gaius nvla Aristarkasnvn nootu banv bulug lvgab bopam hoqg nyi soomin nam urab boal haagnum.

³⁰Poul mwv nyi nyiitw mvqlw ko dookub haatanum, hvbmabde mwwjwbo nyi tulungv mwam wdub jimanum.

³¹Hoo hoq gvda hoqg mwwg ajin saab swwnbo nyi tulu ngvkam mwam dookum namho nyi tulug kaagaho mwwg gv vpam kaakin maabwk hvl pui bilwqnum.

³²Hoq ditaq jaqho dookum ho nyi tulu go hur-marab gob dubnv: nyi tulu gon asaq asaq pagoqkam goqdunam, ho tuugin pagoq goqsaqkam sogoq goqmin sunum; bulug pengko ho vi yaagwn bulv hoggab hookumnum hamkam cengmanum.

³³Nyi tulu gon benum, soq yolu annv Alekjendar, hoggab mwam Juhudi tulungv nyi tulug aga hv daqrab mvnum. Alekjendar daqrab banv mwwg alaqngv meeyabl nyi tulug agaho ngo yolu nyipabo nyi ak hvvmak hvl betornum.

³⁴Hvbmabde nyi tulungv mwam Juhudi nyi goknyi hvl kaacin tukul bulv gamkin gob mwlwngv sogoq goqyin akin gob sogoq goqnam akinam wm swlw duur vnyi paqta go “Ipisig koibov Artemis hvl sogoqnum!”

³⁵Kokw so bopam hoqg dookum hoq xeqn bo nyi akv nyi tulungam binyub kunum. Mwv benum, “Ipisig nyi tulu, mwlwngv cengdwn Ipisig bopamsi Artemisin xumkv doodwn, ho ao gvda toloqgv yoql bo dvrwqbo wlwngam doogdvn.

³⁶Hiyvkam sam cengma hvl benyiram. Hoqgab nulug hangv sija nyinyiaq tuku, ho hog mwwkub saqxeq maab hog akukam nyimur nyial nyimabv.

³⁷Soq nyi tulu si bulv ngulug xumk hoqgv hog gokam dvco twwla jikam ma ho bulv ngulug pwnboam bec-beya lakam bij maasjaqkam bulam nulv si boa paku.

³⁸Hvbmabde Demetrias la mwwg bon nyibam nyi tulungv hiyv akgon yolu bes dood nyiloqkam lood aalv doodo, ho saab tulu ngvkam doodo, hoq aalam nulv akwn akwnwg yolu doonam mam bemin suto.

³⁹Hvbmabde sam koi yaanbo hog ak bes dood nyiloqkam, ham bopam soq gorangv dookum gvdwl ham bvrwq bicwb bel pvvbam padwb nyitayin.

⁴⁰Soolog nyipan sib nyibaloqkam ngulam yolu dunbo gob beta yi, hiyvkam soolog yolu dunam sam pagoq dootwl dupan benyiram, ho ngulv soq yolu sam dudin dootwl dupan hvl ngulug bek dooram.”

⁴¹Soq sam bexo kokw so mwv nyi tulungam dookum hoqgv bulug nammwb wwm kunum.