Read Nyishi BON 2 Bible Online

BON 2 - Nyishi bible

BON 2

¹Kokw so Pentikost aalv hvvc yukam mwwjwbo nyi tulungv lvkin gob hookum banv doonum.

²Cengma lvpab doonyi ao toloqgv vc alwb dooi yinam hvb dubnv bulug dook nam nvmpwngam subu paqnum.

³Kokw so bulv wm moily hvb nyitwl gurab dvb kaapanum, hoo nyi vxig aoho wm moily hv gudul doonum.

⁴Hoo bul mwlwngv Dvrwqbo Yal rooxo tvl nyi asaqg agam mam goorabnum, hoggab Yalv bulam bedwb ator jigam gab bulv soq sib benum.

⁵Doa nvg niikum so dormo nyiib nyinbo Juhudi nyi tulungv Jerusalemho hookuml doonum.

⁶Hoo bulv soq yal dunam sam tapa tvl, nyi pvtw twpwngv hookum nyanum. Ho bulv mwwjwbo nyi tulu vxiam bulug agamb goonam mam tatwl bul mwlwngv lomnum.

⁷Hoo bulv lomb nv swrdorxeqb mwwnv benum, “Soq sib goodu bo nyi tulu si Galili nyi nyiv mas i?

⁸Hvnyiloqkam ngul mwlwngv hoggub nyitwl bulam ngulug vxig agamb goodwb tapa dvn.

⁹Ngulv Partiya, Mediya, hoo Elam, Mesopotamiya, Judiya, hoo Kappadosiya, Pontas, hoo Asiya,

¹⁰Prigiya, Pampiliya, Ijipt, hoo Libiya gvda si Sairen gvda ogumho doon bov hoo Roman hoqgv haanbo nyiin tulungv,

¹¹Juhudi ngvla nyoodo nyi tulungv Juhudi dormob nyikbo tulungv, hoo ngul tuugin Kritan gvla Arabiya hoqgv, hvbsujaqkam ngulv bulam ngulug agam lvgab Pwnbog koijaqb nyis tulungam nyinam mam betam tomdu dvb tapa do.”

¹²Hoo lomnv bulv mwwdar saqpar kumab akwn akwn tox mins nyanum, “Soq si hoggv kui yu?”

¹³Hvbmabde nyi tuugin mwwjwbo tulungam bej-bepar banv benum, “Soq nyi tulu sam twwxum pa!”

¹⁴Hvbmabde Pitor wyw leq akin xuqnam tulug lvgab daqtwl vc alwb nyi acam mam benum. “Judiyag nyi tulu hoo Jerusalemho doonyia bo nul mwlwngv ngoqg sija beta gvdwn sam hindib tagabto.

¹⁵Nulv mwwnam hvb soq nyi tulu si twwxum ma, hoggab sija doonyiv caada kama ta.

¹⁶Hvbmabde nyiqry kaanbo Joyel benum:

¹⁷“Pwnbov begamv, ngo kolam vtwr-anya aalam hvbjaq nyitayin, ngo ngoqg Yalam nyi mwlwg aoho jitayin, hoo nulug nyega kov la nyem kov nyiqry kaapan hvb betayin, hoo nulug yaapa tulungv nyiqry kaanam mam kaatayin, hoo nulug nyekam-xox tulungv yuma maatayin.

¹⁸Ho ngoqg nyera-paqn tulug aoho hoq aalam ngo ngoqg Yalam bulam jitayin, hoo bulv nyiqry kaal betayin.

¹⁹Hoo ngo doonyi aoho tolo kaama tamanam swrdorxeqngam kaakin tayin, ho swcw nvg aoso nyimanam mam nyil kaakin tayin, ywlw-swtwb, hoo wmmwb, hoo mwkv haapamv juuda kvla tayin.

²⁰hoo At Swg koi alwb yuunam aalv hvvc maadab, hoo doonyiv kan puatayin, poolv ui hvb lwwcw tayin.

²¹Hoo hiyv lajaqkam At Swg eminam bepal xumn boam ywwtayin.’

²²“Israel nyi tulu, nulv ngoqg benam sam tagabto! Najaretwg Jisu Pwnbog xuqnam akinv, mwv nulug pengko ho mwam kaadar cekar dvb swrdorxeqb nyis tulungam nyimanam mam nyil, Pwnbov mwwg galoqkv kaakinum, ham nulv atv cengxol doodo, hoggab hoq mwlw nyinam wnamv nulug pengko ho nyinum.

²³Pwnbov mwv atwg mwwlwqkob mwwpwl apnam hvb Jisun nulug alaqb gvqlwqnum, hoqgab nulv mwam nyic nyia bo nyi tulug alaqho gvqlwq tvl bulv mwam dvvcw silo lvgab daapo aotv taqtin tvl mengnukun.

²⁴Hvbmabde Pwnbov mwam sik boam sig gombu hoqgv lokta turdkub purab kunum, hoggab sigv mwam nootul nyumwb ap nyok maanum.

²⁵Debid mwwg pagoqkam benum, “Ngo At Swn looxiam ngoqg agaho doodwb kaapanum; mwv ngoqg alaq lvqbwqho dootwl ngam biima tamab rvkynum.

²⁶Hoqgab ngoqg hangv hemp dvn, hoo ngoqg lyolv bengam alwb bedwn, hoo ngoqg gv vdin nvkam hingwl doodwn.

²⁷Hoggab no ngoqg yvjam swwxw-ywlw gvdab apaqram, ho ngoqg Dvrwqbo Akam yaadwb kaapa ram.

²⁸No ngam swwg lamtangam kaatam pakun, no ngam noqg dookho hemp pol doodub jitayin.’

²⁹“Vbw-bor tulu, ngo ngulug ab Debidg bvrwqngam bid lalal nulam bedwn. Mwv sinkun, ho mwwg svmangam liiknum, ho mwwg nyubungv sool godab ngulug kaaga si doodo.

³⁰Mwv nyiqry kaanbo akgob nyinum, hoqgab Debid mwam dingrwl apnam mam ham mwv cengnum Pwnbov Debidnvn mwwg ko hosiq hoqgv mwwg hvbkalam lvpw at ak lvpw atwb swwm dvb mvtayinwk hvl dingrwl apnum.

³¹Pwnbov hognvkv nyitanum ham Debid kaapa tvl, Kristog turkur deenam mam mwv hvl benum, “Mwam swwxw-ywlw nyook ho apaqram, mwwg svmangv nyubu ho yaaram.’

³²Jisun sik boam Pwnbov lokta turkur dvb bvl pwrab pakun, ho ngul mwlwngv ham kaanbov hvvky si doodwn.

³³Mwam Pwnbog lvqbwq alaq taqc tol doom dvb hvl mwam bvl pwrabnum, ho mwwg Abwg dingrwl apnam mam mwwg galoqkv Dvrwqbo Yalam naanum, ho sija nulug kaag-tagdvn hv mwwg ngulam lvqc cinamv.

³⁴Debid mwv ao gvdab atv caama sunum, hvbsujaqkam mwv benum, “At Sw ngoqg At Swn benum, no ngoqg alaq lvqbwq taqc so dooto.

³⁵Ngo nam ceebio baqnbo nyi tulungam, noqg lvpia lwkw caatin dvb jima deedib.’

³⁶“Hoqgab Israel nyi tulungv mwlwngv cengdwb nyidwn, hoggab soq Jisu nvsu nulv daapo aotv dvvcw silo lvgab taqtin tvl mengknam aksam Pwnbov At Swb la Kristob mvpa kun!”

³⁷Soq benum sam nyi tulungv tatwl bulug hangv mwwdwq banv Pitor nvla ho xuqnam tulungam toxnum, “Vbw-bor tulu ngulv sija hoggub nyitayin?”

³⁸Pitor bulam birwqnum, “Nulug nyic nyia lamta hoqgv vxiv mwwkur gvdkul wkurto, hoo Jisu Kristog eminho baptijum naato, ho nulug nyic nyiangam axia kotwl, Pwnbov lvqc cinam Dvrwqbo Yalam naato.

³⁹Hoggab Pwnbov nulgab la nulug ko tulu gab, ho mwwg hoqgv aado ho gaqxar kunv yvnbo nyi mwlwngam mwwg dookub goqa tanam mwlwngam Pwnbo At Sw dingrwl apnum.”

⁴⁰Soq aoso Pitor bulam vigo biywr banv benum, “Almanbo hoolug dvpar soqgv nulv atam ywwlin suto.”

⁴¹Ho bulug pengko hoqgv nyiv vigo mwwg pui benam mam tatwl mwwjw banv baptijum naanum. Hoq aalho nyi lwwyw oum go bulug dvparho vbw yukam bulug lvgab xitaq kunum.

⁴²Kokw so bulv xuqnam tulug lvgab doomin gvbnv bulug tomswrnam mam tabnv dvbam twwbam banv lvkin gob swgwl doobam nyiaknum.

⁴³Hoo swrdorxeqb nyima wmanam mam xuqnam tulungv nyinum, hoo bulug hoqhvb nyinam mam kaatwl mwlwngv lomb nv bosnum.

⁴⁴Mwwjwbo nyi tulungv lokub olum gob doobam banv hoo hog mwlwngam lvkin gob bwbamnum.

⁴⁵Hoo bulug dupum-dvrab pam la gumn-ranam puqb nv bulug pengko ho hiyvn hog hwdgo jidub nyinum ham hvbkalam horpin-horal mvnum.

⁴⁶Hoo looxy-ceram bulv olum gob hang pwkinb mwwnv xumk nam uraho dookumnum, hoo bulug namho lokub vcinam hwnyir-hvmar gob soobnv dvbamnum.

⁴⁷Pwnboam paqbnv nyi tulug kaagaho nyi mwlwngam kaag-tag mvdvb nyil swwnum. Hoo looxy-ceramho At Sw ywwlinum nyiv vigo vbw jil doonum.