Read Nyishi BON 20 Bible Online

BON 20 - Nyishi bible

BON 20

¹Hur-marab pv xooyiq yuk kokw so Poul mwwjwbo nyi tulungam lokub goqkum banv bulam biywr bebia banv alwb dooiyak hvl bepel mwv Mesidoniyab bulam wleqnum.

²Mwv hoq gvdab wpeq banv mwwjwbo nyi tulungam biywr bebial bulam haakam bepanum.

³Hoqgv mwv Akaiya haabnv pool borumgo ho doonum. Mwv Siriya wdub mwx-mvaq kunum, hvbmabde Juhudi tulungv mwam mvdwb ywrsnam mam tapa tvl, mwv Mesidoniyab wpeql wkur gvdkul wdwb mwwnum.

⁴Beriya hoqgv Pairas ko tuup Sapatar; hoq hvbkalam Tissolonika hoqgv Aristarkas la Sekundas, Darbe hoqgv Gaius la Timoti, Asiya gvda hoqgv Taikikas la Tropimas mwwg lvgab wbanum.

⁵Bulv wco banv ngulam Troas hv kaaya yaal doonum.

⁶Ngulv opap ciqlwq maanam wtw Durum kokw so Pilipi hoqgv iss jaajib wknum, hoo aal loong kokw so ngulv bulam Troasho kaapanum. Ho ngulv hapta gob doonum.

⁷Nyiai aalwg ariyumho ngul mwlwngv dvnam lokub dvbam dvb hookumnum. Poul nyi tulungam goonum, ho mwv gooknv gooknv ai nywywra namgob goodunum, hoggab aal loogwn so mwv bulam wleq tanum.

⁸Ngulug dookumko nam aoho mur wmv vigo huul doonum.

⁹Yaapa ak Iutikas ngvk hvl eminam hv pupumho doodunum. Poul hvraqb goodul doonum, Iutikas yumy kunv yubtab tabknv yubngaq banv mwv nam nommum gob ao mvcanam hoqgv hatib hol namgob yub tabnum. Kokw so bulv mwam sidkub joorab kunum.

¹⁰Hvbmabde Poul ipoq banv mwam cegabtvl mwv benum, “Mwwdwq maab, mwv sija godab sima da i!”

¹¹Hoq kokw so mwv nam aob cookur kunv wtwngam pintul dvnum. Mwv bulug lvgab oyu jaqg doonyiv caalin daqnam gob goopekul wleqnum.

¹²Bulv yaapa akam nammwb turdkub hemp alwb bool wgkunum.

¹³Ngulv Poulwn aadob wg tak iss jaajib caonum hoo Assosub jaal wleqnum. Ngulam wiyatvk hvl betwl mwv kedwb winvk hvl benum.

¹⁴Mwv ngulam Assosho wrwq yukam ngulv mwam jaajib cao mvtwl Mitileneb wknum.

¹⁵Ngulv jaaj hoqgv wknv Kiyosam loogwn so wc kunum. Loonyi deenso ngulv Samosub haanum. Hoqgv loogwn so Miletasam wc kunum.

¹⁶Poul Asiya gvdaho mood moomangam meceqgokam wwm tamab mwv Ipisib hvraqb ws wda dvb mwwnum. Mwv Jerusalemho vnwq kvtaqb wc dvb mwwnum, nyorib wdub nyibaloqkam Pentikost aal jaqkam wc dvb hengnum.

¹⁷Poul Miletas hoqgv Ipisig dvrwq namlo hoqg nyiixa tulungam mwwg dookub wtwk hvl nyi kanam banv pui bilwqnum.

¹⁸Bulv kokw so mwam kaapa yukho mwv bulam benum, “Ngo Asiya gvda so wc aal jaq hoqgv hoggub nyil hwd moodam nulug lvgab doobanum ham nulv cengdo.

¹⁹Juhudi tulungv ngam ywrsil nyis wsbakam ngo hentwram henl nyiqs tanap dijol At Swg nyerab nyil hog mwlwngam hentwr mwlwngam hent kun.

²⁰Nulv cengdo, ngo nulam nyi rolu hoola nulug namho bekinam hvb la tomswrnam hvbkalam nulam ngoqg svka kaadynam mam hog gokam mwwram maab ngo nyitkun.

²¹Ngo Juhudi tulungam ho Nyoodo nyi tulu mwlwngam aiyinwb bulam nyic nyia hoqgv mwwkur gvdwl Pwnbog dookub wkur tukuk ho ngulug At Sw Jisun mwwjw tvk hvl aljaqb buut xaat kun.

²²Ngo sija Dvrwqbo yalwg benam mam tal, Jerusalem alo hognvkv ngam nyitayin ham cengmab wdwn.

²³Hvbmabde ngam Dvrwqbo Yalv bopam vxho ngoqgab hentwr kaasngv kaaya yaal doodu dvnwk hvl betamnam mam, ngo sam aro cengdwn

²⁴Hvbmabde ngo ngoqg atwg swwgam ngo hog hvvtw maagub mwwl, hvbmabde At Sw Jisug ngam nyitwk hvl jinam bonam niqtuq nyilin gvdwl, mwwg Tugu puiyam bel Pwnbog anyangam bekin tvk hvl benam sam nyinya jitws mwwdwn.

²⁵“Ngo nulug mwlwg pengko ho vigo wgaq kunv Pwnbog lvpw-hatiam bekin yvtwn. Hoo sija ngo cengdwn nulv hiyvkam ngoqg nyuqm mam lokta kaapa nyokram.

²⁶Hoqgab ngo soolog so nulam bid lalal jvqtw jaqb bekin dvn; nulug pengko hoqgv hiyv ak gon ywwma baloqkam, hoq yolungam ngo baqram.

²⁷Hoggab ngo Pwnbog mwwnam bvrwqngam nulam bekin maab hog gokam mvvsil ap maapan.

²⁸Hoqgab nulv atv hengab doonyia sulaka hoo Dvrwqbo Yalv nulug alaqho gvqlwq jiknam pvtwngam hengabl rvkil doogto. Mwwg ko Tuupam hirin rinnam, Pwnbog dvrwq namlongam hindib sviya rvkynam hvb rvky jito.

²⁹Ngo cengdwn, nulam ngo wleq kalam twqda kokw daab svca cvvtwngv nulug pengkob haal nulam hiyv nvkam bulv apaqram.

³⁰Ho lok moodv haatayin nulug atwg nyi tulug acam hoqgv nyi tulungam xaalyo banv mwwjwbo nyi tulungam bulug kokwb wwm dvb nulug acam hoqgv boopin booral bulug dookub wgtayin.

³¹Hoqgab hengab to, hoo ngoqg nulam ai aalwb nyiqs tanap rooxo tvl vnyw nyium paqta go nulam vxiam tomswrnam mam mwwgabl dooto.

³²“Hoo ngo sija nulam Pwnbog alaqb la mwwg anyabo puiywg dookho gvqlwq jig yukun. Mwv nulam ator mvdwb jitayin, hoo mwv mwwg nyi tulungam jidub apnam lvqc cisam mwv nulam jitayin.

³³Ngo hiyv akgonwg rup, hun ho vjam kaaby maatwn.

³⁴Ngo ngoqg soq alaq lvqnyig lvgab ngo bon nyis banv, ngo la ngoqg ajin tulug hog mwlw koos buqs, vj orioqngam hoo dvs twwsam atv door twnwr sul swwnam, nulv atv cengs do.

³⁵Hog mwlwngam ngo nulam nyikin banv nyil kaakinam hvbkalam kwrwb bon nyigdvl jwwgw homabo nyi tulungam ngulv svka dvb nyidwn, At Sw Jisug benam mam mwwgabto, mwv benum, “Naanam mam jinam yaangv hemp ponam jaqkv.’”

³⁶Kokw so Poul mwwg goonam mam goonya tukul, mwv kumbw tvl bulug lvgab xumnum.

³⁷Bul mwlwngv mwam gwrgab tvl xabjol moopup dvtaqnum.

³⁸Mwam bulv kaapa kuram hvl benam mam mwwpa banv mwwdwqnum. Kokw so bulv mwam jaajho godab wlwq mingnum.