Read Nyishi BON 21 Bible Online

BON 21 - Nyishi bible

BON 21

¹Ngulv bulam alwb dooiyak hvl bepekul wleq kunum. Ngulv jvvs jaada banv Kosub haanum, hoqgv loogwn so ngulv Rodes wcnum, hoqgv Patarab wnum.

²Hoo ngulv Ponisiya ho iss jaajv ak wpeqnam mam kaapanum, hoqgab hoqb caobanv wleqnum.

³Ho ngulv Saipras sam kaapa dvb akob jaal banv Saipraswb wnum. Jaajv dupum dvrab pam paapoq tvl Taiyar ho ngulv ipoqnum.

⁴Ngulv hoq gvdaho mwwjwbo nyi tulu go kaapa tvl bulug lvgab aal kvn go doobanum. Bulam Dvrwqbo Yalv ator jigam gab bulv Poulwn Jerusalem wma bvk hvl betornum.

⁵Hvbmabde ngulv wd moodv haaikukam, ngulv bulam apaqpel ngulug wtub hvraqb wknum. Bul mwlwngv bulug nywxw-kongam bootwl ngulug lvgab bopam bviywr godab lengmin gvnum. Ngulv swnyiq bviywrho lwbwngv kumbw tvl xumnum.

⁶Kokw so akwn akwn alwb dooiyak hvl bepekul ngulv jaajib caol wleq kunum, bulv bulug nammwb wkur kunum.

⁷Ngulv hvraqb jaajib jaaknv Taiyar hoqgv Tolemayis ho wc kunv mwwjwbo vbw-bor tulungam Salam jitwl, bulug lvgab aal loog doobanum.

⁸Loogwn so ngulv hoqgv wknv Sijariya wc kunv, ngulv pui bekinbo Pilipg nammwb wbnv ngulv mwwg lvgab doobanum. Mwv Jerusalemho xuqnam nyi tulug kvnwg pengko hoqg akin.

⁹Mwv nyem ko nyijwr vpy go nyem wma daqn bov doognum, bulv nyiqry benum.

¹⁰Ngulv Pilipg namho apo jaqg doodu yukam Judiya hoqgv nyiqry kaanbo Agabusek hvl eminam ak haanum.

¹¹Mwv ngulug dookub haabnv, Poulwg vj tonangam naabnv mwwg alaqngam atv leetu tvl mwv benum, “Soq sam Dvrwqbo Yalv bedwn, soq tona atam Juhudi tulungv Jerusalem alo soq sib kalam leedaql aptayin, hoq kokwb bulv mwam Nyoodo nyi tulug alaqb gvqlwq tayin.”

¹²Ngulv sam tapa tvl, ngulv la mwwjwbo nyi tulu gon Poulwn Jerusalem wma bek hvl mvnyi-moiyul benum.

¹³Hvbmabde mwv birwqnum, “Nulv hoggab soq sib xabl ngoqg hangam bik-bimul begdvn, “Ngo Jerusalem alo ngam leek dvb mwwtwq ma, hvbmabde ngo At Sw Jisu gab sid bvkam mwwr saqkwl doodwn.”

¹⁴Ngulv mwam bitwr nyokmab nyigam gab ngulv bekmab apaq kunum, hvbmabde ngulv hvl benum, “At Swg mwwlwqkob nyimto.”

¹⁵Meeg apo go dooxo kokw so ngulv mwx-mvaq layil Jerusalem wleqnum.

¹⁶Sijariya hoqgv ngulug lvgab mwwjwbo nyi tulu go wbanum, bulv ngulug doota ko Nasonwg nammwb ngulam bool wgnum. Mwv Saipras hoqg nyiv, mwv otuqjaq hoqgv mwwjwl doonum.

¹⁷Ngulv Jerusalemho wc yukam mwwjwbo nyi tulungv ngulam hookuml svgagvrwqnum.

¹⁸Loogwn so Poul ngulug lvgab Jemsnvn kaatab wmin gvnum, hoqho dvrwq namlo hoqg mwwjwbo nyiilo nyi tulungv hookum banv doonum.

¹⁹Poul bulam salam hvl betwl bulam Pwnbov hoggub nyil mwwg lvgab doomin gvl Nyoodo nyi tulug pengko ho bon nyinum hoq hog mwlwngam bulam bidil bekinnum.

²⁰Mwwg bekinam mam tatwl bulv Pwnboam paqnum. Kokw so bulv Poulwn benum, “Bor Poul no kaaka to, hoggub nyil hwdgo Juhudi nyiv lwwyw lwwywb mwwjw nyiadkun, hoo bul mwlwngv bulug pvvbam apaq majaqb bugum bwiywr nyidwn.

²¹Bulam nyi tulungv nam Nyoodo gvdaho doonbo Juhudi tulungam Mojesg pvvbam apaq tuku, ho bulam bulug ko tulungam mux mvmabvk hvl, ho Juhudi tulug nyicwngam nyik maabwk hvl tomswr yvdnvk hvl nyi tulungv bekin pakun.

²²Bulv nam haapa kunyi hvl tapa keeta yi; hvnyiloqkam sija hoggub nyikin pa.”

²³No ngulug bekjaqb tato. Dingkbo nyi vpy go doodwn.

²⁴No bulug lvgab wba gvdwl bulug lvgab nyedar darxaqnam nyik-wkho nyibal bulug hiqsam no hiqj tvl bulug dumpongam reqmta soq sib nyibaloqkam bulv vx cerv noqg puiyam nyi tulungv bekinam hv akukam jvqtw kumanyi hvl bulv cengtayin, hvbmabde no Mojesg nyicw-wcwb nyil swws dvnyi hvl cengtayin.

²⁵Hvbmabde mwwjwbo Nyob luusaq nyi tulungam ngulv pota ak xeqbnv jilwq banv bulam ngulv sam bibwq pakun, mwwjwbo nyi tulungv ui pan nvnam dvnam gotwq bolo dvma bvk hvl, ho uiyam dvma bvk hvl, ho ui lengsor maanbo vdinam dvma bvk hvl, hoo bulam nyiig nywxw-nyolam bwwxin maabv hoqgv atam aadoho ap sutwk hvl bekin pakun.”

²⁶Kokw so Poul nyi tulungam boolayil loogwn so nyedar darxaq dvb nyinam mam bulug lvgab nyiknum. Hoq kokw so Poul Xumk nam urab haabnv bulam nyedar darxo aal loogwn kokwngam bulv vx cerv bulug gab pwr jidwb nyitayin ham mwv bekinnum.

²⁷Aal kvnv wnya svqtwqb nyiknum, ho Asiya gvda hoqgv Juhudi nyi tulu go mwam xumk nam uraho yvnam mam kaapanum. Bulv nyi pvtwngam ol lubur tvl mwam nootunam.

²⁸Bulv sogoq goql benum, “Israel nyi tulu! Svka to! Soq nyi ak siilak gvda mwlwb wgaq banv Israel nyi tulungam, Mojesg pvvbam, ho soq Xumk nam sam ceebio bebnv nyi vxiam tomswrl yvnbov. Ho sija mwv Nyoodo nyi tulu gota bulam soq Xumk nammwb boa banv soq dvrwqbo ked sam mubur paku!”

²⁹Bulv soq benam siiloqkam bulv Ipisi hoqgv haanbo Tropimasnvn Poulwg lvgab bopamho gaql yvdwb kaapanum, hoqgab bulv Poulwn Xumk nam urab mwam boanamgo mwwnum.

³⁰Bopam bumpwngv hur-marab nyirabnum, hoo nyi tulungv xorkum banv Poulwn nootu layil agab Xumk nam hoqgv mwam seelinum. Ho cox alwb Xumk nam viyap pam kuqtumnum.

³¹Nyi tulungv mwam mengdwb nyidu yukam, nyi akgon Roman sipai tulug gaml jinbo saab akam Jerusalem bopam bumpwngv hur-marab poogub yolu dudu dvk hvl pui bepanum.

³²Nyebia alwb Sipai gaml jinbo saab akv sipai saab ata go la sipai pvtw twwg boolayil nyi olumg pengkob juqlwqnum. Nyi tulungv mwam sipai bool haanam mam kaatwl bulv Poulwn jwwngo tvl apaqnum.

³³Gaml jinbo saab akv Poulwg dookub haabnv mwam nootu banv mwam gai soonyi go leetwk hvl gaml jinum. Kokw so mwv toxnum, “Soq nyi aksi hiyv, ho mwv hognvkv nyipan?”

³⁴Ho nyi pvtwngv bulv tulu gon oksub, ho tulu gon oksub sogoq goqnum. Hur-marab rooxob dugum gab gaml jinbo saab akv jvqtw jaqb hognvkv jaqkv nyinum ham meelin nyok maanum. Hoqgab mwv mwwg sipai tulungam Poulwn bulug dookub gurumb bool wg tvk hvl gaml jinum.

³⁵Bulv Poulnvn soobia ho booca kalam nyi tulungv hur-marab nyirab yukam sipai tulungv mwam jool wgnum.

³⁶Bul mwlwngv mwwg kokwb wmin gvbnv sogoq kiirl benum “Mwam mengto!”

³⁷Sipai tulungv Poulwn bulug gurumb boatai yikho mwv gaml jinbo saab akam benum, “Ngo hog ak nam bekin nwwpa?” Gaml jinbo saab akv mwam toxnum, “No Gwrik agam goolaqs i?”

³⁸“Hvnyiloqkam no oyu maadab hur-marab dul nyi sony mengbo lwwyw vpy nyi tulungam deexa-rarab bool wgbo Ijipt nyi ak hvvmas i?”

³⁹Poul mwam birwqnum, “Ngo Juhudi nyiv ngam Silisiyag bopam xinam Tarsas bopamho ngam ko bwwnam nyiv. Ngo nam mvnyi-moiyul bedwn, ngam nyi tulungam bem dvb gaml jitwb?”

⁴⁰Gaml jinbo saab akv Poulwn gaml jinum, ho mwv soobia aohv daqtwl mwwg alaqngv meetor banv ody maab dooiyak hvl benum. Hwdlo nyi tulungam cooikab doodu yin mwv bulam Hibru agamb benum: