Read Nyishi BON 22 Bible Online

BON 22 - Nyishi bible

BON 22

¹“Vbw-bor tulu hoo ab tulu, ngo nulug agaho ngoqg yolu dooma hvl benam sam tagabto!”

²Bulv mwam Hibru agamb goonam mam tapa tvl bulv cooikab tud-rwb doonum; hoo Poul benum.

³“Ngo Juhudi nyiv ngam Silisiyag Tarsas bopamho ko bwwnum, hvbmabde ngam Jerusalem bopam so Gamalielg tomswrko ho ngam sotv pan ngam ngulug at ab tulug pvvbam biima dvb hindib tomswrnum, ho soolog nulam soq doonbo nyi tulungam nyinam hvbkalam ngamkam Pwnboam jipaq kunum.

⁴Ngo soq lamtab wnbo nyi tulungam mvnyi-mviyal, bulam nootu banv nyem ge nyega ge, bulam pvtwq bvkam lwqnum, hoo bulam sim dvbkam mvnum.

⁵Nyub Buda akv la Dookum hoq nyi tulungv ngo jvqtwb bedwk hvl bulv bekin deenbo hvvkiv doodo. Ngo bulug galoqkv, Damaskas ho doonbo Juhudi tulungam nootu dvb hvl pota naalayil, hoqb wgdvl bulam nootu gvdwl tag kvrlwq tvl Jerusalemb boal bulam laqm-baqm dvb hvl ngo wnum.

⁶“Ngo wknv Damaskasam ogumb wnwq kunum, hvbmabde aal lvpa ditaqho cengma lvpab doonyi lvlaq huuda kvlabo doonyi ao toloqgv ngam huulubnum.

⁷Kokw so ngo kedwb geql kunum, hoqgv ngo agam yal ak ngam, ‘Soul, Soul! No ngam hoggub mvnyi-mviya dvn?’ hvl bedwb tapanum.

⁸Ngo toxnum, ‘At Sw, no hiyv?’ Mwv birwqnum, ‘Noqg mvnyi-mviyanam Najaretwg Jisu.’

⁹Ngoqg lvgab wba bo nyi tulungv huto lvlaqngam kaapanum, hvbmabde bulv ngoqg lvgab agam yal goon mam tapa maanum.

¹⁰Ngo mwam toxnum, ‘At Sw, ngo hognvkv nyitayin?’ hoo At Sw ngam benum, ‘Gorab gvdwl Damaskaswb haato, hoo nam Pwnbov alo hog nvkam nyim dvb mwwpan ham nam hog mwlwngam bekin tayin.’

¹¹Huto lvlaqkv ngam huuceq ko-gab ngo nyiqca caal doonum, kokw so ngoqg wbamv ngam alaqngam gvbw tvl bulv Damaskaswb ngam bool haagnum.

¹²“Ananiyasvk hvl eminam, Pwnboam boswl swwnbo, dormo nyi ak, ngulug pvvbam bugil swwnbo, Damaskas hoqg Juhudi nyi mwlwngv xikumnam nyi ak doonum.

¹³Mwv ngoqg dookub haabnv ngoqg bviyoqhv daqtwl ngam benum, ‘Bor Soul, lokta kaapa tuku!’ Ho dara ngo kaapa kunum, ho mwam ngo kaagabnum.

¹⁴Mwv benum, ‘Ngulug at ab tulug Pwnbov nam mwwg hang mwwnam mam cengm dvb, mwwg nyedar albo nyerangam kaapa mvdwb la mwwg atwg agam benam mam tapa mvdwb mwv nam xuqpa ku.

¹⁵Hoggab mwv nam mwwg gab no hognvkv kaatkun hoo tatkun ham nam hvvky swwm dvb la nyi tulu mwlwngam bekin dvb nyitayin.

¹⁶Hoo sija hoggab kaaya lyodu dvn? Gorab gvdwl baptijum naato, hoo mwwg emin gab xumg dvl noqg nyicam nyedar darxaq koto.’

¹⁷“Kokw so ngo Jerusalemb wkur kunv Xumk nam uraho xumdul doodu dvkho ngo nyiqry ak kaanum.

¹⁸Hoq nyiqry kaanamv At ngoqg dookub haabnv ngam benum, ‘Nyorib Jerusalem ham apaq pel wto, hoggab soq nyi tulungv ngoqg pagoqkam pui bekinam mam bulv tvjw ram.’

¹⁹Ngo birwqnum, “At Sw, bulv ngam Sinagog nammwb wl nam mwwjwbo nyi tulungam nootul bulam jwwpan hvl ham hindib cengdwn.

²⁰Hoo noqg hvvky swwnbo Istepennvn meng dwkho ngo ham kvtaqb menglaq pan hvl benum, hoo mwam mengbo nyi tulug kamtam koocum tap yaanum.’

²¹Hvbmabde At ngam benam, ‘Wn,’ hoggab nam ngo Nyoodo nyi tulug dookub kanam tayin!’”

²²Nyi tulungv Poul soq sam benam gab tal doonum, hvbmabde hoq kokw so bulv vc alwb sogoq goqrabnum, “Mwam mengpaqto, mwam mengto! Mwam swwm maabv!”

²³Bulv sogoq kiir goqdunyianum, ho bulug vjam lwqyab banv la diikwr tvmwram doonyi aob hwrcal benyanum.

²⁴Ho Roman Sipai tulug gaml jinbo saab akv mwwg Sipai tulungam Poulwn bulug gurum urab boolwq gvdwl xipwql mvtwl mwam hoggub Juhudi tulungv soq sib mwwg ceebiob yolu bedwn ham talin tvk hvl bulam benum.

²⁵Hvbmabde sipai tulungv mwam xipwql mvdwb leedaq yukam, Poul ogumho daqnbo saab akam benum, “Roman nyiam hog yolu dooma boam mwam pw-hwwka majaqb xipwql mvnamhv nulug nyicwngv i?”

²⁶Soq benam sam saab akv tatwl, mwv gaml jinbo saab dookub wnv benum, “No hog mudu dvn? Alo nyi ak vv Roman nyi golak!”

²⁷Hoqgab gaml jinbo saab akv Poulwg dookub wnv mwam toxnum, “Ngam bekin tvb, no Roman nyiv jaqyv?” Poul mwam birwqnum, “Vv, ngo Roman nyiv,”

²⁸Gaml jinbo akv benum, “Ngo loqkam twngk vigo jilayil Roman nyiib nyinum.” Poul birwqnum, “Hvbma ngam nyiloqkam ko bwwtaqnum.”

²⁹Ho dara Poulwn hudytab haanbo nyi tulungv mwwg ogum hoqgv Roman nyi goj kunyi hvl cengtkul, ho mwam gai lvgab leedwb jigam gab mwv bos sonum.

³⁰Gaml jinbo akv Poulwn Juhudi tulungv hoggab yolu biyumnum ham tvdy dvb mwwnum; hoqgab loogwn so mwv Poulwg tagam paqxia mvtwl nyub but tulungam la Dookum hoqg nyi tulungam gaml mvdwb gaml ak jinum. Kokw so mwv Poulwn boobnv agaho daqm dvb jinum.