Read Nyishi BON 24 Bible Online

BON 24 - Nyishi bible

BON 24

¹Aal loongwg kokw so Nyub But Ananiyas nyi nyiixa ata go hoo nyegam belaqbo Tertullasvk hvl eminam nyi akwg lvgab Sijariyab wnum. Bulv laat saab Peliks dookub haabnv Poulwn yolu hwwnum.

²Tertullasnvn goqbnv Poulwn yolu berab mvnum. “Bir ab! No swwlaqb swwg banv ngulam hwdgo swrsomalob swwg pakun, ho vigo ngulug nyicwngam alman boam mvdar jibnv ngulug gvdangam swwgam kwly jipa kun.

³Ngul mwlwngv soq sib nyinam sam kvtaqdo hvl gvda mwlwg nyi vxiv loodwn, hoo nam paqyalinco hvl bedwn.

⁴Ngo sija noqg mood moomangam bepaq dvb mwwma, hvbjaqkam, ngo nam xuml ngulug pui sam otuqb bekinam sam anya mwwpa gvdwl tagab tvbka.

⁵Ngulv soq nyi ak sam guunyi nyiib, gvda gvtwg Juhudi tulug pengko ho yolu swcin dul hur-marab nyirabov, hoo mwv Najaretwg dvpar hoqg peelo abv.

⁶Mwv ngulug Xumk nammam nyibur nyicil kac dvbkam mvtanum, ho ngulv mwam nootunum, ngulv mwam ngulug atwg pvvbwb yolu bvrwqngam hwwdy tanum.

⁷Hvbmabde gaml jinbo Lisiyas haabnv mwam ngulug pengko hoqgam twqreq banv naal wgnum.

⁸Kokw so Lisiyas mwam yolu doodnvk hvl benbov noqg dookub wgdvl yolungam betwk hvl gaml jinum. No soq nyi ak sam tox bvnyiloqkam, no atv mwwg agam hoqgv ngulug mwam yolu begdvn mwlw sam cengs tayin.”

⁹Ho Juhudi tulungv mwwg lvgab bemin gvl soq begdvn mwlw si jvqtwngv hvl benum.

¹⁰Kokw so Laat saab Peliks Poulwn gootwk hvl benam gab Poul berabnum. “Ngo cengdwn no hvd vnyw go soq nyob sam yolu pw-hwwnam mam hwwky paku, hoqgab ngo noqg agaho ngo atam hemp alwb bidy dvn.

¹¹Sool aal looyw leq loonyig otuqho ngo Jerusalemb wnam mam no atv cengs do.

¹²Juhudi tulungv hiyvg lvg bvkam ngam Xumk nam ura gol haqyaq minsul doodub kaapa maanum, hoo ngo nyi tulungam ol gokam lubur wbur namgo kaapa maanum, ho Sinagog nam hookam, bopamg cuukiq bvrw golokam hoqhvb nyidub kaapa maanum.

¹³Hvbmabde bulv sija ngam yolu bek pagoq samkam nam bekin nyoram,

¹⁴Ngo nam bekin dvn, ngo ngulug ab apa tulug Pwnboam xumnam, bulug hvvmak hvl benam mam xumjaq sudwn. Hvbmabde ngokam Mojesg pvvbam, hoo nyiqry benbo tulug xeqpnam mam mwwjwdvn.

¹⁵Ngokam soq nyi tulug sib bulug mwwgwnam akinam hingw dvn, ho nyi mwlwngv albo ge alman ge sinam hoqgv turkur tayin hvl ngo mwwjwdvn.

¹⁶Hoqgab ngo looxiam hingxw cwrwl Pwnbog kaaga hoojaqkam ho nyi kaaga hoojaqkam nyidil nyidwn.

¹⁷“Hvd vnyw go Jerusalem hoqgv aado ho yvpekul, ngo ngoqg nyi tulu gab twngk naatab la hirin rintab wnam.

¹⁸Ngo soq sam nyidul doodu yikho bulv ngam Xumk nam uraho kaapanum, ho ngo kokw so ngoqg nyedarnam mam nyixo aalho ngam bulv kaapanum. Nyi gokam ngoqg lvgab yvmanum hoo hur-marab bvkam dumanum.

¹⁹Hvbmabde Asiya gvda hoqgv Juhudi nyi tulungv yvnum. Bulv soolo noqg agaho daqtwl bulug ngam yolu bes doonam mam bekin yinpv.

²⁰Ho soq nyi tulu sam Dookum ho ngo daqdwkho ngo hognvk yolungv nyipanum ham bulam bekin mvto.

²¹Hvbmabde bulug agaho ngoqg daqtwl; bulam pw-hwwjo kotwl nulv ngam sool sik bov turkur tainvk hvl mwwjw ko-gab mvl bedo hvl benam mam bema jaqb.’”

²²Kokw so Peliks atwg Lamtangam hindib cengam gab mwv hoq aalho mvlam ho beturnum. Mwv bulam benum, “Ngo nulug bvrwqngam gaml jinbo Lisiyasnvn hvvc mvtwl kaatayin.”

²³Mwv Poulwn kaaya bo Saabam mwam rvkybo nyi daqg mvdwb gaml jinum, hvbmabde mwam pvtwq hoqgv lingyi lengcal yvm dvb la ho mwwg ajin tulungam mwam jis bwsam jim dvb gaml jinum.

²⁴Apo go oyu yoomab dooxo kokw so Peliks mwwg nywxwngam Drusillanvn boal haanum. Mwwg nywxw Drusilla Juhudi nyiv. Mwv Poulwn goqa banv mwam Jisu Kriston mwwjwnam pagoqkam bem tvl tanum.

²⁵Hvbmabde Poul alnam, atam cwqsnam hoo haata bo pw-hwwd aalwg pagoqkam bekin yukam, Peliks bos sobnv benum, “Sool gab no wnuk. Ngo lokta nam moodv doobaloqkam goqtayin.”

²⁶Hoq ditaqho mwam Poul lokam twngk meeg jitwqto mwwnv mwv hingwl doonum; hoqgab mwv Poulwn goqda kvla banv mwam mwwg wgab gookinum.

²⁷Vnyi nywnyig wxo kokw so Pelikswg kwlib Porsiyas Pestas Laat saab swwnum. Peliks mwam Juhudi tulungam paqk dvb mwwnum, hoqgab mwv Poulwn pvtwq hv tuml ap peel wleqnum.