Read Nyishi BON 25 Bible Online

BON 25 - Nyishi bible

BON 25

¹Pestas hoq wc dvk aal loum kokw so mwv Sijariya hoqgv Jerusalem wnum.

²Ho nyub buda tulungv la Juhudi tulungam nyig wgbo tulungv bulv Poulwg yolungam Pestaswn sornum. Bulam aya mwwpal Poulwn Jerusalem kanam tvbwk hvl xuml benum,

³Hoggab bulv Poulwn lamtaho mengpaq dvb ywrsil apnum.

⁴Pestas bulam birwqnum, “Poulnvn nyumwb Sijariya gvdaho nyuum pvtwqho lwqpwl ap pan, hoo ngo vnwqb oyu maadab aloqb wkur taikun.

⁵Hoqgab nulug nyig wgbo tulungam ngoqg lvgab Sijariya wbal nyi ak ham mwv hog yolu nyipa paloqkam pw-hwwto.”

⁶Pestas aal looyw gob bulug dook hv doope kul kokw so Sijariyab wkur kunum. Aal loogwn so mwv pw-hwwk lvpwho doolin banv Poulwn boa mvnum.

⁷Poul pw-hwwk lvpwho hvvc dvkho Jerusalem hoqgv haanbo Juhudi tulungv mwwg taqg-loosaqho daqtwl Poulwg aoho bibum biyiql vigo bigw dooma jaqb tvbwq maadvb yolu benum.

⁸Hvbmabde Poul atam bipy sudub benum. “Ngo hoggub nyilakam daapo gokam dwqma, hvbmab Roman Bir Abam kam hog ceebiob nyimur ma.”

⁹Hvbmabde Juhudi tulungam paqk dvb mwwnv Poulwn toxnum, “Ngoqg aga so nam yolu begdvn sam no Jerusalem wl yolu sam pw-hwwdy kodwb mwwma?”

¹⁰Poul birwqnum, “Ngo Bir Abwg pw-hwwk agaho ngam pw-hwwk dvb ngo daqdwn no atv cengs do, ngo Juhudi tulug ceebiob hog akukam nyimur go nyima.

¹¹Ngo pvvbam daapo korbo paloqkam hoo ngo sig pagoq yolu go nyipa paloqkam, hoqgv ngo keleqtayin hvl bema. Hvbmabde bulug yolu benamhv jvqtw ma, bigw dooma baloqkam hiyvkam ngam bulug alaqho jilwq dvb haakam bo dooram. Ngo Bir Abam sordwn.”

¹²Kokw so Pestas, mwwg nyegam tomswrbo tulug lvgab bvrwqngam tvdy cootwl birwqnum. “No Bir Abam sorpa nyiloqkam, no Bir Abwg dookub wdwb nyitayin.”

¹³Oyu yooma kokw so Lvpw at Agrippa Bernis Sijariyab Pestaswn svgagvrwq taab haaba sunum.

¹⁴Bulv apo jaqg Sijariya ho dooxo kokw so Pestas Poulwg bvrwqngam lvpw atam bekinnum: “Soq pvtwq si Peliks nyi ak nyumwb apaqpel wleqnam nyuum ak doodwn;

¹⁵hoo ngo Jerusalemb caadwkho Juhudi tulug nyub buda tulungv la nyi nyiixa tulungv mwwg aoho yolu pw-hwwnum, ho ngam bulv mwam sim dvb pvvb patwk hvl benum.

¹⁶Hvbmabde ngo bulam benum, Roman nyi tulungv yolu nyipabo nyiam mwam yolu benbo lvgab nyuqm kalamv tuptwl goody mins maad deedib hiyv nvkam jidub nyima dvn.

¹⁷Bulv hvvc twqda kalam, ngo meegkam doonu maab loogwn so mvl ho pw- hwwtab dootwl nyi akam boa mvdwb gaml jinum.

¹⁸Mwam yolu benbo tulungv daqrab benum, hvbmabde bulv yolu poot jaqgo mwam beta dvn go ngoqg mwwnam hvb bulv bemanum.

¹⁹Mwlwngv bulv mwwg lvgab bulug atwg dormo pagoq hoq la Jisu ngvk hvl benam nyi sikbo akwg pagoqho haqyaq minsnum. Hvbmabde mwv hvraqb turl doodnvk hvl Poul benum.

²⁰Ngo mwwbwq kumab soq bvrwq sam hoggub mvbyu mwwnv, ngo Poulwn no Jerusalem caal soq yolu sam pw-hwwdy kob yv hvl toxnum.

²¹Hvbmabde Poul Bir Abam mwam pw-hwwk sutayinwk hvl benum, hoo mwam pw-hwwdy namgob nyi rvkybo daqg sut bvk hvl benum. Hoqgab ngo mwam Bir Abwg dookub kanamnam gob mwam nyi rvkybo daqg yaatwk hvl gaml jinum.”

²²Agrippa Pestasnvn benum, “Ngo atv soq nyi ak soq benam mam tvnw do.” Pestas birwqnum, “Aram no mwwg benam mam tato.”

²³Loogwn so Agrippa La Bernis nyi mwlwngv poqkum dvb Dookum nam urab bopam hoqgv sipai tulug saab lvgab la nyi xinam tulug lvgab haanum. Pestas gaml jitwl Poulwn urab boa mvnum.

²⁴Pestas benum, “Lvpw at Agrippa hoo ngulug lvgab dooba nyi mwlw si, nulv soq nyi ak sam kaato, mwam soq doonbo Juhudi tulungv la Jerusalem boloq doonbo Juhudi tulungv ngoqg aga si mwam soranum. Bulv sogoq kiir banv mwam swwm dvb jima bvk hvl bedo.

²⁵Hvbmabde ngo mwam sim dvb jaqb mwwg hog yolu swcin nyigo wgonam akukam meepa nyoma. Ho mwv atv Bir Abam sorgam gab ngo mwam mwwg dookub kanam dvb mwwl ap pakun.

²⁶Hvbmabde ngo mwwg pagoqkam hog hvvtwjaqgo Bir atam pota xeql jilwqsv meepa nyoma. Hoqgab ngo mwam nulug aga si boa pan, hoo lvpw at Agrippa noqg aga jaqho booduml boa jipan! Hoqgab mwwg yolungam hindib miidil pw-hwwxo tvl, ngo xeqs loq ak naadwb mwwdwn.

²⁷Hoggab nyuumwg yolu pagoqkam hindy alwb bekin maabjaq nyuum mam kanamnam si ngoqgab pagoq alma.”