Read Nyishi BON 28 Bible Online

BON 28 - Nyishi bible

BON 28

¹Ngulv simab kvtinho ipoqkunv hoq iss boqcum hoqg eminv Malta ngvk hvl tapanum.

²Hoq gvda hoqg nyiv ngulam hind alnum. Kokw so nyodongv hoikam swkwr alnum, hoo bulv wm ak pargab tvl ngul mwlwngam haatwk hvl goqnum.

³Poul wsw xoociq ak gaqgwb dorkum banv ham wmmwb hurlwq yukam tvb soog wm ogam hempa peel lengb nv mwwg alaqngam kargabnum.

⁴Hoq gvdaho nyiv tvbam Poulwg alaqho boiyol doonam mam kaapa tvl bulv akwn akwn bemin sunum, “Soq nyi aksi sony mengbo gokybo mwwnum, mwv iss sa-svlo hoqgv keleq sujaqkam mwam sija jvqtwngv swwm dvb jiram.”

⁵Hvbmabde Poul tvbam pwqduql wmmwb mwam hog gokam mvk maadwb pwqlwqnum.

⁶Bulv mwam hwdam mwwg alaqngv goorob nvdyu, ho hwdam kedho geqpwl sin duiyu mwwbnv bulv kaayal doonum. Hvbmabde oyu jaqg kaaya yaatar tvl mwam hog nyimanam mam kaapa tvl bulv mwwdy banv benum, “Mwv pwnbo goj nyi!”

⁷Bul dook hoqgv aado yooma ho diip boqcum hoqg gora abwg Pabliyaswg kedho doonum. Mwv ngulam mwwg dookub anya kaapal goqa banv, ngulam mwwg namho aal loum go doognum.

⁸Pabliyaswg abv dooi vc bvla aiyeq wbnv karl doonum. Poul mwwg dook cwwrwb haabnv mwwg aoho alaqngv idaql xumbnv mwam al dukub mwp jiknum.

⁹Soq nyinam sam kaatwl, boqcum hoqg vcil doonbo nyi tulungv mwlwngv mwwg dookub haabanv bulug vcamkam al dukub mwp konum.

¹⁰Bulv vijaqg ngulam akiv jinum, hoo ngulv wrab yukho ngulug jaaj uraho bulv ngulam lamta ho dvm dvb dvsv vigo vlwq jinum.

¹¹Pool borumgo dooxo kokw so Alekjendriya hoqgv haabnv tapam pool ho doopel wta bo jaajib ngulv caol wleqnum.

¹²Ngulv Sirakas bopamho hvvc banv aal loum go doonum.

¹³Kokw so hoqgv wrab banv Regium bopam mam wcnum. Loogwn so ako daiya hoqgv dooiyv ywrab yukam ngulv aal loonyi ho Putiyoli bopam mam wcnum.

¹⁴Hoqho ngulv mwwjwbo nyi tulu go kaapanum, bulv ngulam bulug lvgab kvn aal go doomin gvlabvk hvl benum. Hoq kokw so ngulv Romanwb haaknum.

¹⁵Roman ho doonbo nyi tulungv ngulug haanam puiyam tapa tvl bulv ngulam wrwqtab Appiyuswg kwm-kor mvk haty hoola Nyiin Nomum hvl eminko ho lingrwqnum. Bulam Poul kaapa tvl, mwv Pwnboam paqbnv haakam mwwpanum.

¹⁶Ngulv Roman ho wc yukam Poulwn sipai ak rvkil daqg mvtwl mwam vpwb doom kunum.

¹⁷Aal loum go dooxo kokw so Poul Roman hoqg Juhudi nyiidu nyi tulungam goqkum banv dookum ak doognum. Bulam hookum mvtwl mwv benum, “Ngoqg vbw-bor tulu! Ngo hog gokam ngulug nyi tulungam nyimur-wmur jimasu, ho ngulug at ab tulug nyicw-mwcwngam nyixiaq wxiaq jikam maasu, hvbsujaqkam Jerusalemho ngam nootu banv nyumwb leebnv Roman hvdwg alaqb gvqlwq jinum.

¹⁸Bulv ngam hudy tvl tolin jita sunum, hoggab bulv ngam hog gokam sig-dorg daqdwb nyixiaq wxiaqnam go hoo ngoqg sig pagoq meepa maanum.

¹⁹Hvbmabde Juhudi tulungv ham tamanum. Hoqgab ngo Bir abam sordwb nyinum, hvbmabde ngoqg nyi tulungam ngo hog ceebio yolu gode bes dooma sunum.

²⁰Hoqgab soq tagi baqg dvn si hvbaloqkam Israel nyi tulungv mwwgwnam nyi ak gab sulak baqs gvdwn.”

²¹Bulv mwam benum, “Ngulv Judiya gvda aloqgv nam alma hvdwb noqg pagoq gab pota gokam kaapa ma, ho pui baqabo gokam nyi akam ngulug nyi haama.

²²Hvbmabde ngulv noqg goonam mam tvnw do, hoggab ngulv cengdwn gvda mwlwg nyi tulungv noqg dvparam ceebio baqabnv benyi-beyal bedwn hvl ngulv cengdwn.”

²³Hoqgab bulv Poulwg lvgab mood ak xitwl hoq aalho bulug nyiv vijaqg Poulwg dookub haanum. Ar komc hoqgv ai kan nagub mwv bulam bekinnum, ho Pwnbog lvpw hatig puiyam mwv bulam bekinnum. Mwv Mojesg pvvbam la nyiqry benbo tulug xeqpwl apnam hoqgv niitin banv bulam Jisug pagoqkam tvjw mvdwb mwwl benum.

²⁴Bulug pengko hoqgv tuugin mwwg benam mam tvjwnum, hvbmabde tuugin mwwjw maanum.

²⁵Hoqgab bulv atv haqmin sunyia banv Poul soq sam bexo kokw so wpin wral wleqnum, “Kvtaqjaqb Dvrwqbo Yalv ngulug nyiqry kaanbo at ab Aijayanvn bekin banyi! Hoggab mwv benum.

²⁶Hoggab mwv benum, “Wgdvl soq nyi tulu sam bekinto: Nulv tagamv tas tayin, hvbmabde nulv tacin ram; nulv kaagamv kaas tayin, hvbmabde kaaparam,

²⁷hoggab soq nyi tulug hangv mwwcin ma, hoo bulv bulug nyurungam tuuxal ap pakun, hoo bulv bulug vnyiqngam nyiqcw tvl doodwn. Hvb nyima loqkam bulug vnyiqngv kaapa sudco, bulug nyurungv tapa sudco, hoo bulv ngoqg dookub hookur sudco; hoo ngo bulam mwp jis dvco, hvl Pwnbov bedwn.’ ”

²⁸Kokw so Poul bitur benya benum, “Hoqgab nulv sam cengto, Pwnbov mwwg ywwt ywwnam puiyam Nyoodo nyiingam cengm dvb jipa kun. Ho bulvkam ham tvjw banv mwwjw tayin!”

²⁹Soq sam Poul bexo kokw so Juhudi tulungv bulv ceceq alwb haqyaq mins nyiabnv wknum.

³⁰Poul hoqho vnyw nyingo nam ak doojo jibnv doonum, hoo mwam kaatab haanbo nyi tulu mwlwngam mwv svgagvrwqnum.

³¹Mwv Pwnbog lvpw hatig pagoqkam bekin banv At Sw Jisu Kristog gonam haakam alwb hiyam kam bos-haai maab tomswrl dooknum.