Read Nyishi BON 3 Bible Online

BON 3 - Nyishi bible

BON 3

¹Pitor la Jon bunyiv ariyum golo xumd mood ho Jerusalem xumk nammwb swgwtab oum moodho wnum.

²Hoo Jerusalem xumk nammwg Anyabo Toggoq ngvk hvl benam viyap haagaho nyi tulungv ko bwwlin daq hoqgv lutubo nyi ak looxiam baql aptvl, xumk nam urab haanbo nyi tulu hoqgv mwv kogaqbo akgob nyinum.

³Ho mwv Pitor nvla Jon bunyiam xumk nam urab haasv twqb nyinam mam kaapa tvl bunyiam mwv hog jitbvk hvl kunum.

⁴Hoo bunyiv mwam kaagab lalal banv Pitor benum, “Ngulam kaagab to!”

⁵Hoo mwv hog jitayin mwwnv bunyiam rogab lalal doonum.

⁶Hvbmabde Pitor benum, “Ngo hun gokam ho rup gokam dooma, hvbmabde ngo nam ngoqg doognam mam jitayin; Najaretwg Jisu Kristog eminho gorabl wto.”

⁷Hoo Pitor mwam alaq lvqbwqngam gagab tvl purabnum. Ho dara mwwg lvpiangv la lwpubngv ator kunum.

⁸Hoo mwv daqrab banv wkar yvnum. Ho kokw so bulug lvgab mwv xumk nam urab haabnv wkarl pojuq juqkar banv Pwnboam paqnum.

⁹Hoo nyi tulungv mwam wkar banv Pwnboam paql yvnam mam kaapanum,

¹⁰hoo bulv mwam xumk nammwg “Anyabo Toggoq” yabg ho dootwl kodul doonbo nyi hv kunyi hvl kaacin kunum. Hoqgab mwv hog bvxeq nyiknum ham bulv kaatwl lomb nv swrdorxeqgob mwwnum.

¹¹Ho lutu boam mwp kunam nyi akv hvraqb Pitor nvla Jon bunyiam gagab tvl yvikam nyi mwlwngv Solomonwg Pupum ngvk hvl benam booyab ho bulug dookub haanum.

¹²Hoo Pitor nyi tulungam kaapa tvl bulam benum, “Israel nyi tulu, hog nyitwl nulv soq sam lomdwn, ho ngulam kaagab jinjinl rodul doodwn? Nulv soq nyi ak sam ngulam atwg ator doogam gab hoo ngulv dvrwqbo nyiib nyigam gab mwam wkar yvdub mwp pan mwwdwn?

¹³Hvbmabde, Abraham gv Pwnbov, Jakubg Pwnbov, Aisak gv Pwnbov, ho ngulug at ab tulug Pwnbov mwwg ko Jisun, Pwnbog yuugnam mam jipan. Nulv mwam haqpaqnum hoo Pilat mwam tolin dvb mwws bakam nulv mwam Pilatg aga hookam haqpaqnum.

¹⁴Mwv dvrwqbo bvla nyedarbo nyiib nyinum. Hvbmabde nulv mwam haqpaqtvl Pilatnvn nulv nyi mengnbo nyi ak yaangam tolin tvbwk hvl konum.

¹⁵Hoq hvbsulak nulv swwgbo At akam meng nukun. Hvbmabde Pwnbov mwam sik boam pwrab kunam mam kaanbov ngulv si doodwn.

¹⁶Soq lutubo nyi ak sam ator jinbov mwwg emin ngvslak. Soq si hvbaloqkam mwwg emin gab mwwjw ko-gab sulak sam nulv kaapa tvl kaacin sudwn; Jisun mwwjw ko-gab sulak mwv al pakun.

¹⁷“Vbw-bor tulu, sija ngo cengdwn nulv la nulam nyig wgbo tulungv Jisug nyinam wnam hvnyiloqkam nulv atv cengs maagam gab nyipa kun.

¹⁸Pwnbov kol otuq hoqgv nyiqry benbo tulungam mwwg Kristog nyelin dors hen tayin hvl bekinnum. Hoqgab mwv ham niqtuq nyilin mvnum.

¹⁹Mwwkur gvdkul Pwnbog dookub haag dvl mwam nulug nyic nyiangam nyedar koto,

²⁰ho At Sw galoqkv yal atoram haam dvb koto, hoo mwam Jisun Kristo ngvk hvl benam ham mwv nulgab xuql ap kunam mam jipoq kodwb koto.

²¹Pwnbov mwwg dvrwqbo nyiqry benbo tulug agam hoqgv kol otuqho bekinam hvbkalam mwv hog mwlw luuxiam nitib mvdwb moodv haama deedib mwv ao gvda tolo dooky dvb nyitayin.

²²Hoqgab Mojes benum, “Nulug At Sw Pwnbov nulgab nyiqry kaanbo ak, mwv ngam kanamnam hvbkalam kanam tayin mwv nulug atwg nyiv su. Nulv mwwg hog luuxy benam mam tagab dvb nyitayin.

²³Hiyv akgon hoq nyiqry kaanbo akwg benam mam tagab maanboam Pwnbog nyi tulug pengko hoqkam naalin gvdwl vmwq-yumgub mvpaqtayin.’

²⁴Samuyel hoqgv naarab layil mwwg kokwb haanbo nyiqry benbo mwlwngv benum, swnyw-soolog aal so nyidynam mam puiyam bekinnum.

²⁵Pwnbov mwwg nyiqry benbo tulug agaho dingrwl apnam hv sija nulug gabkam doodwn hoo Pwnbov nulug ab tulug lvgab gaml birwl apnam mam nulv sija nyimin gvdo. Mwv Abrahamnvn benum, ‘Ngo noqg ko hosiq hoqgv gvda gvtwg nyi tulungam lvqc citayin.’

²⁶Hoqgab Pwnbov mwwg nyerangam otuqcob xuqbnv nulug dookub kanam tvl nulug nyic nyiangam apaqpel noq lamta hoqgv nulam wkur mvtwl lvqc cidwb mwwbnv kanamnum.”