Read Nyishi BON 4 Bible Online

BON 4 - Nyishi bible

BON 4

¹Hoo nyub tulungv la xumk nammam kaayal rvky bov la Sadusi tulungv hvvcnam gab, Pitor la Jon nyi tulungam hvraqb goodul doonum.

²Bulv vcjaqb hang lengnum, hoggab Pitor la Jon Jisun sik boam turkur dvb pwrabnam pagoqkam nyi tulungam tomswrl hoo pui bekin kindunam.

³Hoo bulv vnyiam nootul leenum hoo bunyiam aal loogwn arkomc nagub pvtwq ho tuml apnum, hoggab hoq moodv ariyum kan kunum.

⁴Hvbmabde nyiv vijaqgo hvraqb puiyam tatwl mwwjwnum; ho nyiam xikanamv lwwyw ang gob nyiknum.

⁵Loogwn so bulug nyig wgbo tulungv la nyiixangv la ho nyijwq-nyegam tomswrbo nyi tulungv Jerusalemb hookuml dookumnum.

⁶Bulv Nyub But Annas, la Kaiyapas, hoo Jon la Alekjendar hoo Nyub But tulug dvpar hoq nyi tulungam bookumnum.

⁷Hoo bulv bunyiam bulug agaho daqm tvl toxnum, “Nulv soq sam hoggub nyidwn? Nulv hognvk atorv doog tvl nyidwn, hvbmabde hiyvg emin gab nulv nyidwn?”

⁸Pitor Dvrwqbo Yal rooxo tvl bulam birwqnum, “Nyi tulungam nyig wgbo hoo nyiixa tulu,

⁹ngulam sool lutubo nyi akam mwp jigam gab, mwam hoggub nyil aldvb mwp pan hvl ham hudy deedy nyiloqkam hvnyiloqkam,

¹⁰nulv mwlwngv cengto, hoo Israel nyi tulu ngvkam sam cengto, nulug kaagaho daqnbo soq nyi sam, nulv daapo ao tol mengnam, hoo Pwnbov sik boam lokta turkurbo Najaretwg Jisu Kristog emin nvlak mwam mwp pan.

¹¹Soq Jisu si, nam mvnbo tulug haqpaqnam wlw pwhv, hvbmab soq wlw si mwlwngam xibin yaanam wlw pwgwb nyipa ku.

¹²Hoo ywwlinamv hoglokam dooma dvn, hoggab nyodo nvg niikum so nyia kog pengko so asaq emin jinam dooma hiyv ngulam ywwlin deenbov.”

¹³Ho hwdlo bulv poory-lex cengmabo nyi nyinyiv hvl cengnum, hoq nyi tulungv Pitor la Jonwg haakam alwb mwwnam mam kaatwl lomnum. Hoo bulv jvqtw jaqb Jisug lvgab yvba bade hvl bulv cengnum.

¹⁴Hvbmabde bulv nyi mwpnam akam Pitor la Jonwg lvgab daqnam mam kaapa tvl hog mwwsnam mam benyi maanum.

¹⁵Hoqgab bulv hoq cwwrw hoqgv bulam wleq tvk hvl benum, hoo bulv bulug pengko ho goomin sunum. Bulv akwn akwn tox xumin sunum.

¹⁶“Ngulv soq nyi tulu sam hoggub mvtayin?” Bulv toxnum, “Jerusalem soq doonbo nyi vxiv bulug soq sib nyimanam mam nyil swrdorxeqb nyinam sam cengt kul, ngulv cengma hvl bedwb nyima.

¹⁷Hvbmabde soq pui sam nyi tulug pengko ho yuupw mvma dvb ngulv bulam belam gvdwl hiyv nvkam Jisug eminam bemabvk hvl yvtw pagdvl bitur tuj.”

¹⁸Kokw so bulv urab bulam goqlwq banv bulam hiyv nvkam Jisug eminam bema bvk hvl hoo tomswr kama bvk hvl yvtw pabnv biturnum.

¹⁹Hvbmabde Pitor la Jon bunyiv bulv birwqnum, “Ngulv nyi benam mam tanamv al dvn yv ma Pwnbog benam mam tanamv al dvn yv, ham nulv atv hwwka sutna hogoqya hv Pwnbo gab kvtaqdvn.

²⁰Hoggab ngulv atv hognvkv kaapa kun hoo tapa kun ham ngulv bemab doola ram.”

²¹Hoo dookum hoq nyi tulungv bulam ceceq alwb yvtw panum; hoo kokw so bulam tolin kunum. Bulv cengnum bulam hog yolu dool bulug aoho laqm-baqm dvb pagoq kaapa maanum, hoq aob nyi tulungv hognvkv nyiknum hoqgab Pwnboam mwlwngv paqnum.

²²Swrdorxeqb nyi mwpnam nyi ak hoqg vnywngv campy laleq gob nyiknum.

²³Pitor la Jon, bulam tolin daqkalam bulug ajin tulu dookub wkur kunv bulam nyub buda tulug gvla nyiixa tulug benam mam bekinnum.

²⁴Hoo bulv ham tapa tvl bul mwlwngv lokub dookum banv Pwnboam xumnum, “Swcw nyodongam, sa-svlongam, hoo hoq uraho doonbo hog tulungam Nyiit atwb nyil hoo Twrw tvnbov!

²⁵No kol ngulug at ab, noqg nyera Debidnvn dvrwqbo yal lvgab goonum, hoo mwv benum; “Nyoodo nyi tulungv hog nyitwl hang lengsam dvn, hoo hog nyitwl nyiilungv niqtuq doomab ceebio baqsam dvn?

²⁶Gvda gvtwg lvpw at tulungv atv atam lvpw atwb mvsdvn, hoo nyig wgbo tulungv lvkin gob dookuml, At Sw nvla mwwg Kriston Xuqnam mam ceebio baqdwn.’

²⁷Herod la Pontiyas Pilat jvqtw jaqb nyoodo nyi tulug lvgab hoo Israelwg nyiilug noqg Xuqnam ko dvrwqbo Jisun ceebio baqbnv so bopam si dookum banv goomin sunum.

²⁸Bulv lokub dookum banv noqg kolwg otuq hoqgv nyid mvdkub birwl ap kunam mam nyidub dookumnum.

²⁹Hoo sija, At Sw no noqg nyerangam nyi tulungam bos belamnam mam kaatwl noqg puiyam haakam alwb mwwgdvl ngulam bedwb jitbv.

³⁰Noqg alaqngv irab gvdwl mwpto, hoo noqg dvrwqbo ko Jisug eminb swrdorxeqb nyikin gvdwl kaakin to.”

³¹Hoo hwdlo bulv xumnya yukun, bulug lvkin gob doogw ko kediv hwqdinum. Bul mwlwngv Dvrwqbo Yal rooxo tvl Pwnbog puiyam haakam alwb bidunum.

³²Ho mwwjwbo nyi tulungv nyiipuq-lyol akin gob nyibnv hang pwkin gob mwwnam. Hiyv ak gonkam atwg gumnam, dvrab-pacab pam ngoqgv hvl bemanum, hvbmabde bulv akwg ho hog ak doog panyiloqkam hoq hog mwlwngam goiyab bebamnum.

³³Hoo ator alwb haakam mwwbnv xuqnam tulungv At Sw Jisug turkur kunam puiyam begaql yvnum, hoo Pwnbog anyangv bulug lvgab doonum.

³⁴Bulug pengko ho hiyv ak gonkam jwwgwbo doomanum. Nam rongo doogbo nyi tulungv bulug rongongam twngkwb puqnv hoq puqnam twngkam goiyab pvvk ho bwanum.

³⁵Hvvky tulug dookub bwa jinum; hoo twngkam hiyvn hog hvdwg jidwb nyinum hvbkalam nyiip vxiam horpin-horanum.

³⁶Josapnvn, hvvky Barnabas hvlakam goqnum (hvgdvn hv haakam dvb birwqbo akv), mwv Saipras hog Lebi nyi akv,

³⁷mwwg rongongam twngkwb puqnv, hoo twngkam xuqnam hvvky tulug dookub bwa jinum.