Read Nyishi BON 5 Bible Online

BON 5 - Nyishi bible

BON 5

¹Hvbmabde Ananiyas ngvk hvl eminam nyega akv mwwg nywxw Sappira bunyiv gumn ak puqnum.

²Hvbmabde mwv twngk palgon mwwg nywxwngv cengdwb aptvl, palgon xuqnam hvvky tulug dookub bwa jinum.

³Hvbmabde Pitor mwam benum, “Ananiyas, no hog nyitwl noqg hang uraho uiyam haal xaalyob Dvrwqbo Yalam noqg gumnam puql twngk naanam mam palgon ap pel no xaalyob bedwn.

⁴Noqg gumnam puqma daai yikho noqg gab doonum, hoo puqxo kokw so twngkv noqg gab hvraqb doonum. Hvnyiloqkam hoggub nyil noqg hang uraho soq sib nyitws mwwnum. No nyiam vm mvvma sulak, hvbmabde Pwnboam no vm mvvdo!”

⁵Ho Ananiyas mwam soq benam sam tapa daqkalam mwv tabtol ked ho geqp kunv siknum. Hoo soq pui sam tapa bo nyi mwlwngv bos soma vrram sonum.

⁶Kokw so yaapa tulungv mwwg svmangam tumtwl joolayil svma liiknum.

⁷Mood wm swlw duum gob nyiyik kokw so mwwg nywxwngv hog nyinam mam mwn cengmab haanum.

⁸Hoo Pitor mwnwn benum, “Ngam betamto, soq siitwq i nywxw nyol nunyig gumnam puqnam twngk bumpwngv?” Mwn birwqnum, “Vv siitwq.”

⁹Hvbmabde Pitor mwnwn benum, “Hog nyitwl nywxw nyol nunyiv At Swg Yalam pooka-yirka dvb mwwdwn? Noqg nyolam svma liinbo nyi tulungv sija yabg si hvvc paku, bulv namkam joolayil liitab wgtayin!”

¹⁰Ho dara mwn mwnwg haabo lwkw ho geqp kunv siknum, yaapa tulungv haabnv mwnwg sil doonam mam kaapa tvl svmangam joolayil mwnwg nyegangam svma liik nyubu beyam ho mwnwn liiknum.

¹¹Hoo dvrwq namlo hog nyi mwlwngv hoo nyi asaq mwlwngv soq sam tapa tvl bos soma vrram sonum.

¹²Hvvky tulungv nyi tulug pengko ho vigo swrdorxeqb nyimanam mam nyibnv yvnum. Hoo bul mwlwngv lokub Solomonwg pupum pamto ho hookumnum.

¹³Nyi tulungv bulam paqxo yarol paqs bakam bulv xuqnam tulug lvgab yvba dvb hiyvkam hamp mwwpa maanum.

¹⁴Hvbmabde At Swn mwwjw bov nyemv la nyegangv nyiitw mvqlw kunum.

¹⁵Hvvky tulungv nyi vcboam mwpnam mam kaatwl, nyi tulungv nyi vcboam lamta hv joolin banv kartaqnan aoho, upiq aoho joop tvl Pitor wpeq yukam mwwg yalbobo gojaqkam bulug gv aoho dudaq mvdwb mwwnum.

¹⁶Jerusalem ogum hoq doonbo bopam tulu hoqgv nyi tulungv nyi vcboam la hoo sony cenam nyiam baqanum nyi mwlwngam mwp kunum.

¹⁷Ho Nyub Butv la mwwg nyi tulungv la Sadusi tulungv xuqnam tulungam ceebiob hang baqbnv bulam nootu dvb hvl hwwbwq kunum.

¹⁸Kokw so bulv xuqnam tulungam nootul nyi nyiisam mam tumk pvtwq uraho lwqknum.

¹⁹Hvbmabde hoq aiho At Swg gumtw ak pvtwq viyap pam mvko tvl xuqnam tulungam agab boolin banv bulam benum.

²⁰“Wg dvl xumk nam ura alo daqtwl nyi tulungam soq nit swwg pagoqsam bekin ta.”

²¹Hvvky tulungv ham tapel ar komc xumk nam urab haabanv tomswr swrabnum. Ho nyub but akv la mwwg ajin tulungv Juhudi nyiixa tulu mwlwngam lvkin gob goqkum banv Dookum ak doody lalal doodub hvl goqnum, ho xuqnam tulungam bulug agaho boa tvk hvl sipai tulungam gaml jilwqnum.

²²Hvbmabde saab tulungv pvtwqngam wcwl kaaknamv xuqnam tulungam hiyv nvkam pvtwq uraho doodub kaapa kumanum. Hoqgab bulv Dookumb wkur kunv puiyam bekinnum.

²³“Ngulv pvtwqngam wc yikho pvtwq nammam talangv twng hvdwb korcup tvl doodub kaapanum, rvkybo tulungam viyap haagaho daqdwb kaapanum, hvbmabde viyap pam mvkol kaaknamv hiyv nvkam uraho doodwb kaapa maanum!”

²⁴Xumk nammam kaaya bo rvkybo tulug saab akv la nyub buda tulungv soq pui sam tapa tvl bulv xuqnam tulungv hoggub nyiknum yu mwwnv hendar kumab nyiknum.

²⁵Hoo nyi ak haabnv bulam benum, “Tagabto! Nulug pvtwq lwqnam nyi tulungv xumk nam ura vv daqtwl nyi tulungam tomswr swrdul doode lak.”

²⁶Ho saab akv mwwg sipai tulungam boolayil xuqnam tulungam nootul bookur haag kunum. Hvbsujaqkam bulam nyi tulungv wlw hurkam dvn mwwnv bulv bos banv bulam vc apy dvb mvmanum.

²⁷Kokw so bulug xuqnam tulungam urab boolwq banv bulug Dookum agaho daqm tvl, Nyub But akv bulam benum,

²⁸“Ngulv nulam dwr bitwram bebnv soq nyi ak soqg eminb hiyv nvkam tomswr mabwk hvl gaml jitkun, hvbmabde sija nulv kaakat hog nyipa kun! Nulug tomswrnam puiyam Jerusalem gvda tvqpwngam wiywq kunv puiyv goopor paku, hoo nulv ngulam mwwg sik gab yolu baqtwk hvl bedo!”

²⁹Pitor la xuqnam tulungv birwqnum, “Ngulv Pwnbog benam mam tadwb nyiky dvn nyiig benam mam ma.

³⁰Ngulug at ab tulug Pwnbov Jisun nulv daapo aotv dvvcw silo lvgab taqtinl mengxo kokw so mwam sik boam turkur dvb purab kunum.

³¹Pwnbov mwam turkur dvb purab tukul mwwg lvqbwq taqc ho Nyig wgbo bvla Nyedar dardwb doom tvl, Israel nyi tulungam mwwkur gvdkul wkur mvtwl bulug nyic nyiangam axia jidwb mwwnum.

³²Hoo ngulv soq pagoq tulu gab hvvkiv, hoo Dvrwqbo Yalam kam hvvkib nyidwn, hiyam Pwnbov jipa kun mwam tvjw bo nyi tulungam.”

³³Ho Dookum hoq nyi tulungv bulug soq benam sam tatwl hang lingtwr banv bulv xuqnam tulungam mengdwb hvl goor kunum.

³⁴Hvbmabde bulug pengko hoqgv akin pvvb tomswrbo bvla, nyi mwlwngv xikum poqkumnam nyi, Gamaliel ngvk hvl eminam hv Dookum ho daqrab banv benum. Mwv xuqnam tulungam Dookum hoqkam agab boolin gvnwk hvl gaml jitwl,

³⁵Dookum mam benum, “Israel nyi tulu, nulv soq nyi tulu sam hog mvta dvn ham hengab sula ka.

³⁶Oyu maadab Tiyodas ngvk hvl nyi ak haabnv mwv atv atam koibo nyivk hvl benum, hoo nyiv lwwpy gob mwwg dookub haanum. Hvbmabde kokw so nyiv mwam mengknum. Mwwg buu tulungv asaqtwqb nyidwb mvda kalam mwwg bvrwq goonam pui pota ngvkam niinkun.

³⁷Hoq kokwb Galili hoqgv Judas kam mwv nyi nyiminam xiqd moodho haabnv mwwg dookub nyi ata go yvgnum. Kokw so nyiv mwam mengknum, hoo mwwg buu tulungv asaqtwqb nyiknum.

³⁸Hoqgab sija soq sib nyigam gab ngo nulam bedwn, nulv bulam hog gokam mvmab, bulam hvb kaaya to; soq nyinam wnam si nyi galoq kvnyiloqkam nyiis nvco;

³⁹hvbmabde soq si Pwnbov galoq kvnyiloqkam nulv bulam hoggub nyilakam munyiub nyoram. Hvbmabde nulv atv Pwnboam nyob panam hvb nyitayin!” Hoq Dookum hoq nyi tulungv Gamaliel tomswrnam mam tanum.

⁴⁰Bulv xuqnam tulungam urab goqlwq banv xipwql mvtwl bulam lokkam Jisug eminb bik maabwk hvl yvtw patwl bulam toxa kunum.

⁴¹Hvvky tulungv Jisug emin gab hvnyw-har hendwb jigam gab bulv hemp pobnv Dookum hoqgv wknum.

⁴²Aal looxiam bulv xumk nam uraho nyi tulug namho tomswr banv Ywwnbo Jisug Tugu puiyam hvraqb bel yvnum.