Read Nyishi BON 7 Bible Online

BON 7 - Nyishi bible

BON 7

¹Hoo Nyub but akv Istepennvn toxnum, “Soq beg dvnsi jvqtwngv jaq yv?”

²Istepen birwqnum, “Vbw-bor tulu hoo ab tulu ngoqg benam sam tagabto! Yuunam Pwnbov ngulug at ab wma daab Mesopotamiya ho doodwkho mwwg dookub,

³haabnv mwam benum, “Noqg vbw-bor tulungam la gvdangam apaqpel nam ngo gvda kaakin takub wto.’

⁴Hoqgab mwv Kaldiya gvdangam apaqpel Haran gvdaho dootab wnum. Hoo mwwg abv sixo kokw so, Pwnbov mwam mwwg sija doodu ko gvdab wnum.

⁵Hvbsujaqkam Pwnbov mwam hoq gvda hoqg kedam vcwr gokam mwam at gvsu hvl bedwb loqd tuugkam jimanum; hvbmabde Pwnbov mwam jitayinwk hvl dingrnum, ho hoq ked hv mwwg gab la mwwg ko hosiq tulu gab dootayinwk hvl benum; Pwnbov soq sam dingrnam gob mwv ko akkam dooma daqnum.

⁶Soq siilak Pwnbov mwam benamv, “Noqg ko hosiq tulungv nyiig gvda golo nyerab bulv swwtayin ho bulam vnyw lwwpy gob mvnyi-mviyal mvl doog tayin.

⁷Hvbmabde ngo bulug nyera swwgw ko gvda hoq nyiam pw-hwwtayin hvl Pwnbov benum, hoo kokwngam bulv hoq gvda hoqgv lengta yukun, hoo ngam bulv soq nyook so ngam xumtayin.’

⁸Ho Pwnbov Abrahamnvn pepaql-mux mvnam mam goor minsul daapo dingr minsnam hvb mvnam. Hoqgab Abraham mwwg ko Aisaknvn bwwxo kvn aal dooxo kokw so mux mvnum; Aisak mwwg Jakubnvn mux mvnum; hoo Jakub mwwg ko wyw leq vnyiam mux mvnum, hiyv ngulug ab yuunam gob nyiknum.

⁹“Kokw so vbw-bor tulungv Josapnvn hang baqrab banv mwam nyera gob Ijipt gvdab puqnum. Hvbsujaqkam Pwnbov mwwg lvgab doobanum.

¹⁰Hoo mwv hog mwlw nyelin dors hoqgv mwam ywwk-gooknum. Ho kokw so Josap Ijipt gv lvpw at Paro dookho haaikukam Pwnbov mwam Parog agaho mwam jubtin gabtin dvb bem dvb lvqcnum. Hoo Paro Josapnvn mwwg gvdag laat saab bvla ho mwwg nam rongongam kaaya bo atwb mvnum.

¹¹Ho Ijipt gvda hoola Kanaan gvdaho dwr poot jaqg wggam gab, ngulug ab tulungv dvs twws vcwr gokam dvd twwdub kaapa maagam gab, kano hvngwr hemanam mam hentwram henum.

¹²Jakub Ijipt gvdaho dvsv dood yuk hvl puiyam tapa tvl, mwwg ko tulungam, ngulug ab tulungam, otuqjaqb kanam nomt nomlul kanamnum.

¹³Lwnyi dvb haaikukam Josap mwv atam mwwg vbw-bor tulungam bekinnum, ho kokw so Paro Josapg vbw-bor tulungam la mwwg imiq nyiam cengknum.

¹⁴Hoqgab Josap mwwg ab Jakubnvn la imiq dvpar pvrpwngam Ijipt gvdab haatwk hvl goqnum. Bulug imiqho nyiv cam kvn leq ang go doonum.

¹⁵Hoqgab Jakub Ijipt gvdab innum. Ijipt gvdaho mwv la ngulug ab tulungv siknum.

¹⁶Hoo bulug svmangam sekem gvdab baql kunv Abraham gv twngk jitwl Hamor nyob hoqgv rvnam nyubu ho liiknum.

¹⁷“Pwnbov Abrahamnvn dingrwl ap kunam mam niqtuq nyilin sv moodv hvvnwq yukam, ngulug nyiv Ijipt hoqgv doon bov jaqt alkunum.

¹⁸Kokw so Josapnvn cengma bo nyiv Ijiptho lvpw atwb swwrabnum.

¹⁹Mwv ngulug nyiam sur bwbnv ngulug ab tulungam nyijab-nyiyap banv nyinum. Binin beya banv bulug ko hoiyinam sim dvb nam hoqgv agab joopaql mvnum.

²⁰Soq sib nyil doodu yukho Mojesnvn ko bwwnum. Mwv ko anya alnum. Mwam nam hoqgv joopaq maad daab pool borum go soknum.

²¹Kokw so mwam nam hoqgv joopaq yukho Paro nyem ko akv mwnwg ko hvb sotv kunum.

²²Mwam kokw so nyi tulug nyijwq-nyegam mwlwngam tomswr kunum, hoo kokw so bek-nyik mwlwho mwv nyi koi ko gob nyiknum.

²³“Kokw so Mojes vnyw campy yukho mwv mwwg Israel vbw-bor tulungam hoggub nyigdvn ham gaql kaadwb mwwnum.

²⁴Hoqgab Israel nyi akwn Ijipt nyi ak mvnyi-mviyanam mam kaapanum, hoo mwv hoq Ijipt nyi akam mwlwq banv mvnum.

²⁵Mwv mwwgamv mwwg at nyi torab pv cengd nvpv mwwnum, Pwnbov mwwg lvgab bulam boolin tayin, hvbmabde bulv ham cengd nvpv mwwnum, hvbmabde bulv ham cengmanum.

²⁶Aal loogwn so mwv Israel nyi vnyi go yolu pamin sunam mam kaapa tvl hoo mwv vnyiam swrso dvb bijtvs mwwnv benum, “Vnyiv, taiya to, nunyiv vbw-borwb nyitwl hoggub nyil yolu dumin sudwn?’

²⁷Hvbmabde yolu dunbo akv Mojesnvn tuuxa tvl benum, “Nam hiyv ngulug aoso saab swwl ngulug yolungam pw-hwwtwk hvl benbov?

²⁸No moily Ijipt nyi akam mengnam hvbkalam ngamkam mengdwb mwwdwn?’

²⁹Ham Mojes tapa tvl Ijipt gvda hoqgv keknv Midian gvdaho doorab kunum. Hoo mwv nyega ko vnyig dooknum.

³⁰“Vnyw campy go wxo kokw so ao gumtwngv ak Mojesnvn Sinai yorn deexa-rara ogumho svvn puum golo wm moilib gul kaakinum.

³¹Mojes ham kaapa tvl lomnum, hoo svvn ogumb wnwql hindib kvvdy taab haanum. Hvbmabde mwv At Swg agam mam tapanum.

³²“Ngo noqg at ab tulug Pwnbov, Abraham gv gvla Aisak ho Jakubg Pwnbov.’ Mojes boskunv tvmdwr hwqbnv kaad bvkam hampeq mwwpa maanum.

³³Ho At Sw mwam benum, “Noqg luxuqham pipaqto, hoggab noqg daqg dvk kedhv dvrwqbo kediv.

³⁴Ngo jvqtw jaqb Ijipt boloq ngoqg nyi doonbo nyi tulug hentwr henam mam, hoo nyelin-dorswb nyinam mam, hoo bulam mvnyi-mviyanam mam kaatkun. Hoo ngo bulug siginam mam tatkun, hoqgab ngo bulam ywwt ywwtab ipoqyin sija no haato, ngo nam Ijipt gvdab kanam tayin.’

³⁵“Mojes Israel nyi tulug haqpaq kunam akv. Bulv benum, “Nam hiyv ngulug aoso saab swwl ngulug yolungam pw-hwwtwk hvl benbov?’ Mwv lak Pwnbov ngulug gab kanam kunam gora abv, ho nyedar bov, mwam svvn puum golo wm gudul dookho ao gumtwngv kaakinum.

³⁶Mwv nyi tulungam Ijipt gvda hoqgv swrdorxeqb deedy luuxib nyil boolinum, Ijipt gvdaho Swlw bo sa-svlo ho swrdorxeq gob nyibnv deexa-rara ho vnyw campigo nyimanam mam nyil kaakin banv yvgnum.

³⁷Mojes Israel nyi tulungam Pwnbov ngam kanamnam hvbkalam, nulgab nyiqry kaanbo nyi ak, nulug atwg nyi tulug pengko hoqgv kanam tayin hvl bekinnum!

³⁸Mwv lak Israel nyi tulug lvgab deexa-rara Dookum bo ngulug at ab tulug lvgab doobanum, hoo Sinai yornho mwam kaakin bo ao gumtw lvgab yvbanum; hoqgv mwv Pwnbov galoqkv nwrba cwtam namgub sima bo swwg puiyam gamt tolinl ngulam jisiqnum.

³⁹“Hvbmabde ngulug at ab tulungv mwwg benam mam tamanum, bulv mwam tuupaqnum, hoo Ijipt gvdab wkur kunyiloq al dukde mwwnum.

⁴⁰Hoqgab bulv Aaronnvn benum, “Ngul gab pwnbo loq ngulug agab wco mvdwb mvtwb. Ngulam Ijipt hoqgv boolinbo Mojes hog nyis nuknvbadw ham ngulv cengkma.’

⁴¹Hoo bulv svv hvvb ko ak hoq moodho murty mvnum, hoo murtiam pwr jinum hoo bulug alaqho mvnam tulu ham hwnyir-hvmarl nyidu gvdo.

⁴²Hvbmabde Pwnbov bulug dook hoqgv wleq kunum, hoo bulam doonyi aog takar tulungam xumdvb jiknum, soq pagoqkam nyiqry benbo tulug potalo xeqpwl apnam hvbkalam: “Israel nyi tulu vnyw campigo nulug, deexa-rara alo svb svv pal ui panamv ngoqgab nulv ui pamanum.

⁴³Nulv Molekig pwnbog tombungam sulak jool yvgnum, hoo nulv nulug Repan pwnbog takar murtiam sulak, jool yvgnum; hoq guss tulu ham nulv atv xumd beslak pwsnum. Hoqgab ngo nulam Bebilonwg lvvgwb wmtayin.’

⁴⁴“Ngulug ab tulungv deexa-rara ho Pwnbog tombungam doognum. Soq tombu sam Pwnbov Mojesnvn mvtwk hvl bebnv kaakinum hvbkalam Mojes tombu hoq jemmam mvnum.

⁴⁵Kokw so ngulug ab tulungv tombungam bulug ab tulug alaq hoqgv nvvsiq kunum. Bulv ham baqtwl Josuag lvgab wbanum. Pwnbov bulug kaaga hoqgv bulv kaadwb ruqxanam nyob luusaqg gvdangam naareq yuk hoqgv Debidg swwnam gob doonum.

⁴⁶Mwv Pwnbog anyangam kaapal swwnum, hoo mwv Pwnboam Jakubg Pwnbo gab namloq ak mvdwb jit bvk hvl konum.

⁴⁷Hvbmabde Solomon ya mwwg gab nam ak mvnum.

⁴⁸“Nyiqry kaanbog benam hvb, mwlwngam koi yaanbo Pwnbov nyi tulug alaqngv mvnam namho dooma dvn,

⁴⁹“Ao gvdangv noqg dootamv, hvl At Sw bedwn, hoo swcw si ngoqg lvpia datamv. No ngoqgab hoggub nyinbo nammv mvtayin? Ngoqg doonu ko nyookv hogloq ho?

⁵⁰Ngo atwg alaqngv soq mwlwsam mvma namyv?’

⁵¹“Lwwpo xwqda bo nyiilu nul, hang vdw bo hoo nyuru ruutar bo, nulv lwxiam Dvrwq Yalam ceqpaq dvn. Nulug ab tulug nyinam hvb, nulv kam nyinum.

⁵²Nulug ab tulungv nyiqry benbo tulungam mvnyi-mviya maanam ak doon mviyv? Kol otuqho Dvrwqbo Nyera haadynam pui bepa jinbo, Pwnbog gumtwngam bulv mengnum, hoo mwam puql mengnukun.

⁵³Nulv lak Pwnbog pvvbam ao gumtw alaq galoqkv jipoqnam mam nvvrwqbo jaqkv, hvb sutwl ham nulv tamanum.”

⁵⁴Dookum nyi torab pv Istepen benam mam tatwl, bulv vcjaqb hang lengb nv bulug exiam kot-rwqrwq nyianv hang lengnum.

⁵⁵Hvbmabde Istepen Dvrwqbo Yal rooxol ao lvpwngam koodunum hoo mwv Pwnbog yuunam mam la Pwnbog lvqbwq alaq taqctv Jisun daqnam mam kaapanum.

⁵⁶Mwv benum, “Kaato, ngo ao lvpwngam kuqko dvb kaapa do, ho Nyia Kov Pwnbog lvqbwq alaq taqctv daqnam mam kaapa do!”

⁵⁷Dookum nyi torab pv bulug nyurungam alaqkv piitum tvl lvkin gob vcjaqb sogoqnum. Bulv nyiory jaqb mwwg dookub hookumnum.

⁵⁸Hoo mwam bopam hoqkv ruqlinum hoo mwam wlw hurnum. Hoo hvvky torab pv bulug vjam yaapa akwg Soulvk hvl emin nyi akam kaayal daqg mvdwb jinum.

⁵⁹Bulv Istepennvn wlw hurdu dvkho mwv Atwn sogoqnv benum, “At Sw Jisu, ngoqg yalam nvvrwq tuku.”

⁶⁰Mwv kumbw tvl ho vc alwb sogoqnv benum, “At Sw!” soq bulug nyic nyinam kwly daqma bvka hvl sam bejo ywknv mwv siknum.