Read Nyishi BON 8 Bible Online

BON 8 - Nyishi bible

BON 8

¹Hoo Soul Istepennvn mengnam mam loor jinum. Hoq aal jaq hoqgv Jerusalemho doonbo dvrwq namlo hoqg nyi tulungam mvnyi-mviyal mvl nyelin dorsam ceceq jaqb hengrab kunum. Hvvky tulungam bepa maab, mwwjwbo mwlwngam cwrsaq-bvraq twqb Judiya gvdaho la Samariya gvdab ruqpin ruqra kunum.

²Mwwjw albo nyi tulu gon Istepennvn svma liiknum. Bulv Istepen gab ceceq jaqb nyiqs tanap dil mwwdwqnum.

³Hvbmabde Soul nam nvmxib wbnv dvrwq namlo hoq mwwjwbo nyi tulungam, nyem ge nyega ge bul mwlwngam nam hoqgam seelin banv pvtwq lwqnum.

⁴Cwrsaq twqb ruqknam mwwjwbo tulungv bulug wk mwlwho Tugu Puiyam bekar yvnum.

⁵Pilip Samariya bopam wbnv nyi tulungam Ywwn bog puiyam betamnum.

⁶Hoo nyi tulungv Pilip benam mam hindy jaqb tagab lalal tanum. Bul mwlwngv mwwg benam mam tagab lalal tanum, mwwg swrdorxeqb nyinam mam kaanum.

⁷Sony cenam nyi tulug hoqgv sonyiv vc alwb sogoql lengknum, hoo lviya laqyabo, lvca bo nyiam vigo mwp jiknum.

⁸Hoqgab Samariya gvda hoqg nyi tulungv vcjaqb hemp ponum.

⁹Samariya bopamho Simonvk hvl benam nyi ak hv, apo go mwv dvab naabnv nyi tulungam lomdwb mvnum. Mwv atam nyi koi ab bokum mvk hvl besnum.

¹⁰Bopam hoq akam-anyo nyi vxiv mwwg benam mam hindy jaqb todunum. Bulv benum, “Mwwg ator hv Pwnbog ator go benam, “At ator koibo,” bulv benum.

¹¹Bulam dvab naabnv kaakin banv mwv oyu jaqgo swrdorxeq gob nyi tulungam mwwmnum.

¹²Hvbmabde bulv Pilip Pwnbog lvpwg Tugu Puiyam tatwl Jisu Kristog eminam mwwjwnum, hoo nyem ge nyega ge bulv baptijum naanum.

¹³Simon mwv atv kokw so mwwjw kunv baptijum naaxo kokw so mwv Pilipnvn svqtin banv mwwg lvgab doomin gvnum, hoo swrdorxeqb la nyimanam nyinam mam kaatwl mwv lomnum.

¹⁴Kokw so Jerusalemho doonbo xuqnam nyi tulungv Samariya nyi tulungv Pwnbog agam mam tapa tvl mwwjw pak hvl tapa tvl bulv Pitor nvla Jonnvn bulug doodub kanamnum.

¹⁵Bulv wc kunv mwwjwbo nyi tulu gab bulam Dvrwqbo yalam kaapa mvdwb xumnum.

¹⁶Hoggab Dvrwqbo Yalv ho godab mwwjwbo nyi tulug aoho ipoq maadanum, hvbmabde bulam At Sw Jisug eminb baptijum jitwqnum.

¹⁷Ho Pitor la Jon bunyiv bulug aoho alaqngv idaq banv xumj yukam bulv Dvrwqbo yalam kaapanum.

¹⁸Bulug aoho xuqnam tulungv alaq idaql bulam yalam jinam mam Simon kaapanum. Hoqgab mwv Pitor nvla Jonnvn twngk jitwl

¹⁹benum, “Soq ator sam ngamkam jitbv, ho ngokam nyi tulug aoho idaql swgw yikam bulam Dvrwqbo Yalam kaapa mvdwb jito.”

²⁰Hvbmabde Pitor mwam birwqnum, “No noqg twngkam ui ig gvn, hoggab no Pwnbog jinyinam mam twngkv rvn dvn hvl mwwdo i!

²¹No ngulug lvgab hog nyimin wmin gvdwb nyima, hoggab Pwnbog kaagaho noqg hangv alma.

²²Mwwkurto hoq hvk mwwc mwwyangam At Swn apaq tvbwk hvl xumto ho mwam apaq jik dvb.

²³Ngo nam kaanamv no mwwc-saqya hang baqdo, hoo aob no nyic nyia nyiib nyibnv nyic nyiag nyumwb swwl doodo.”

²⁴Simon Pitor nvla Jonnvn benum, “Anya mwwpa gvdwl At Sw ngoqgab xumtab ho nunyig benam mwlwngam nyim mvma dvb jito.”

²⁵Bulv bes mwlwngam la Pwnbog puiyam bexo kokw so Pitor la Jon Jerusalemb wkur kunum. Ho bulv lamta wi yikho Samariya nampam tuluho Tugu Puiyam betamnum.

²⁶At Swg ao gumtw ak Pilipnvn benum, “No mwx-mvaql Jerusalem hoqgv ako daiya Gajab inbo lamtab wn.” Soq diixa-rara nyookv.

²⁷Kokw so Pilip mwx-mvaq layil wknv Itiopiya nyiipium bo ak mwwg nammwb wdul doon boam kaapanum. Mwv saab koi akgob nyinum. Mwv vi-koory gumn noosungam kaaya banv doonum. Mwv Itiopiya gvda hoqg dookum ho saab akub nyinum. Mwv Jerusalemb Pwnboam xumtab wpekul mwwg nammwb ceriotwb wkur kunum.

²⁸Mwv ceriot aoho wjo ywwtwl nyiqry kaanbo Aijayag potangam pooril wnum.

²⁹Kokw so Dvrwqbo Yalv Pilipnvn benum, “Toloq ceriot dookub wno.”

³⁰Pilip wnwq banv mwam nyiqry kaanbo Aijayag potangam poory ridul wnam mam tapanum. Ho Pilip mwam toxnum, “Noqg poory gvdwn ham no cengs i?”

³¹Hoo saab akv birwqnum, “Nyiv ngam bekin maabloqkam ngo sam hoggub nyil cengtayin?” Hoo mwv Pilipnvn ceriot aob cao tvk hvl benum. Pilip cao banv mwwg lvgab doobanum.

³²Saab ak hoqg pota pooril wnamv soq tulu si, “Mwv padkub bool wgnam sviya hvb nyiknum; Mwv sviya ko akgon vmmam reqxaq yukam sogoq maanbo sviya hvb nyiknum; mwv agam gambeql vcwr gokam goomanum.

³³Mwam bid kumab mvnyi-mviyal mengnukun. Hiyvkam mwwg ko hosiq lengkam benyi kuram, hoggab mwwg swwgam soq gvda soqgv naareq gvnkun.”

³⁴Saab akv Pilipnvn benum, “Ngam bekin tvb, nyiqry kaanbo aksi hiyvg pagoqkam bedwn? Mwv atam bes dvn yv, ma nyi asaqgon beg dvn?”

³⁵Ho Pilip soq pota poorynam soqgv goorab banv mwam Jisug Tugu Puiyam bekinnum.

³⁶Bulv soq sib gool idul dooikam, bulv iss meeg dook golo wcnum, hoo saab akv benum, “Soq si iss ata go doodo; ngo baptijum nangam maadwb hognvkv doodwn?”

³⁷Pilip mwam benum, “No jvqtw jaqb noqg hang mwlwngv mwwjw dvloqkam baptijum nangam maadwb hog dooma, naato.” Mwv birwqnum, “Vv, ngo Jisu Kriston Pwnbog kov hvl mwwjw dvn.”

³⁸Hoo saab akv ceriotam xornu tvl, bunyiv, Pilip la saab akv iss urab haabnv Pilip mwam baptijum jinum.

³⁹Bunyiv iss hoqgv agab lengda kalam, Pilipnvn At Swg Yalv bool wleq kunum. Saab akv mwam kokw so kaapa kumanum, hvbmabde mwv hemp poknv mwwg lamtab wknum.

⁴⁰Pilip mwv atam Ajotas ho yvdwb hempa suknum, hoo mwv bopam vxib wbnv Sijariyangam wcnam gob Tugu Puiyam bel wnum.