Read Nyishi BON 9 Bible Online

BON 9 - Nyishi bible

BON 9

¹Soul hoq apo ho godab At Swg buu tulungam hvraqb ceebiob baqbnv mengdwb nyilam-nyicam banv nyidunum. Mwv nyub but dookub wbnv

²hoo mwv Damaskaswg Sinagog tulu hoqgv, hoqho Jisun mwwjwbo nyi tulungam, nyem ge nyega ge kaapa baloqkam nootu gvdwl tag lvgab kargab tvl leel Jerusalemb boadvb jit bek hvl gaml pota naatab wnum.

³Mwv Damaskaswb lamta ho wknv, bopam mam wnwq svqtwqb wikukam doonyi ao toloqgv doonyi lvlaq huto ak mwam taqg-loosaqb huuyiql huulubnum.

⁴Kokw so mwv ceriot hoqgv hatib geql kunum, hoo mwv agam yal ak tapanum, “Soul, Soul! No hoggub ngam mvnyi-mviya dvn?”

⁵Soul toxnum, “At Sw, no hiyv?” Agam yal akv benum, “Ngo noqg mvnyi-mviyanam Jisu.

⁶Hvbmabde gorab tuku, hoo bopam urab haato, hoq kokwngam no hog nvkam nyidub nyitayin ham ngo nam bekin tayin.”

⁷Kokw so Soulwg lvgab wba bo nyi tulungv hog gokam gombeq maab rodul daqnum. Bulv agam yal goonam mam tapa sunum, hvbmabde hiyv nvkam bulv kaapa maanum.

⁸Kokw so Soul ked hoqgv daqrab kunv mwwg vnyiqngv nyiqbiol kaanum, hvbmabde mwv hog vcwr gokam kaapa nyok maanum. Hoqgab bulv mwwg alaqngam gvbwtvl Damaskaswb boal haagnum.

⁹Hoo mwv aal loum namgob dvma twwma bvla kaapa kumab doonum.

¹⁰Ananiyas ngvk hvl eminam buu ak Damaskas ho doonum. Mwv nyiqry ak kaanum, hoqho At Sw mwam benum, “Ananiyas! Mwv birwqnum, At Sw, vv ngo doodwn.”

¹¹At Sw mwam benum, “Gorabto, Dinda bo lamtab wgdvl Judaswg nam alo Tarsas hoqgv Soulvk hvl benam nyi akam toxta; mwv xumdul doodo,

¹²hoo mwv nyiqry kaanv Ananiyas ngvk hvl benam nyi akv haabnv mwwg aoho alaqngv idaql swgw yikam mwv lokta kaapa dukub nyinum.”

¹³Ananiyas birwqnum, “At Sw, nyiv vigo ngam soq nyi soq puiyam bekinnum, hoo mwv hog nvkam Jerusalem alo noqg nyi tulungam henla kaala maadwb hentwr kaanyi dvb mvknum ham ngo tatkun.

¹⁴Hoo sija mwv nyub buda tulu galoqkv gaml pota naalayil nam mwwjwbo nyi tulungam nootu taab Damaskaswb haado.”

¹⁵Hvbmabde At Sw mwam benum, “Wno, hoggab mwam ngoqg bonam nyim dvb xuqpa kun, ho ngo mwam ngoqg eminam Nyoodo nyi tulug dook hoola lvpw at tulug agaho, ho Israel nyi tulungam ngoqg eminam bekin mvdwb jitayin.

¹⁶Hoo ngo atv mwam ngoqg emin gab hog hwdgo hentwram hendwb nyitayin ham ngo mwam kaakin tayin.”

¹⁷Hoqgab Ananiyas kokw so wknv nam urab haabnv mwwg alaqngv Soulwg aoho idaqnum. Mwv benum, “Bor Soul, noqg soqb hoodul doodho lamta alo noqg kaapanum At Sw Jisu mwv ngam kanam pan. Mwv noqg vnyiqkam lokta kaapa mvdkub, ho Dvrwqbo Yalam kaapa mvdwb hvl ngam kanam pan.”

¹⁸Hoo dara Soulwg vnyiq hoqgv ngui kuxuq hvb nyinbo ak yoqlinum. Soul kokw so lokta kaapa kunum. Mwv gorab kunv baptijum naaknum;

¹⁹hoo kokw so mwv dvxo twwxo so mwv ator torab kunum. Soul apo go Damaskas ho doonbo buu tulug lvgab doobanum.

²⁰Mwv Sinagog nammwb haabnv Jisug Puiyam bekin banv benum, “Mwv jvqtw jaqb Pwnbo Ko Tuupv.”

²¹Mwwg benam mam tapa boa hvnamv benum, “Soq nyi ak sima yv Jerusalem alo Jisug eminam bel xumn bo tulungam mengbo nyi akv? Hoo soq pagoq goqkin gab mwv nyi tulungam nootul nyub but hwdwg dookub bool wg dvb haama nam yv?”

²²Hvbmabde Soulwg bekinamv nyi tulungam meeg yaiya vi yaada go tvjw dukub benum, hoo mwv Jisu Ywwnbo akv hvl bid lalal Damaskas ho doonbo Juhudi tulungam mwam birwq nyoma dvb benum.

²³Oyu go dooxo kokw so Juhudi tulungv dookumnv Soulnvn mengdwb hvl ywrsnum.

²⁴Hvbmabde bulv hognvkv nyitanum ham Soul cengknum. Hoqgab Soulwg nootul mengdwb hvl bulv bopam viyap ho ai tooiyal doonum.

²⁵Hvbmabde mwwg buu tulungv ai golo mwam poa urahv soolwq tvl bopam hoqg wlw sulu uko galo mwam swwcoq banv tvpoqnum.

²⁶Soul Jerusalemb wbnv mwv buu tulug lvgab yvba dvb mwwnum. Hvbmabde bulv mwam buu ngvbo hvl mwwjw maanum, hvbmab bul mwlwngv mwam bos sokumnum.

²⁷Kokw so Barabas mwam svka banv xuqnam tulug dookub mwam boanum. Mwv Soul hoggub nyil lamtaho At Sw Jisun kaapanum ham bekinnum, ho At Swn mwv hog hvla xeq benum ham hog mwlwngam bulam bidil bekinnum. Mwv Soul hoggub nyil haakam alwb Damaskas ho Jisug eminam bekinnum ham bul mwlwngam bekinnum.

²⁸Kokw so Soul bulug lvgab doobanum, hoo Jerusalem mam taqg-loosaqg wiywq wxeq banv haakam alwb At Swg eminam bekin banv yvnum.

²⁹Mwv Gwrik agam goonbo Juhudi nyi tulug lvgab goonum, hoo bulug lvgab yolu bvkam bel haqyaq minsnum, hvbmabde bulv mwam mengdwb sur bwnum.

³⁰Kokw so mwwjwbo nyi tulungv ham cengtkul, bulv Soulnvn Sijariyab bool banv mwam Tarsaswb kanam tukul wwm kunum.

³¹Hoq apoho Judiya, Galili ho Samariya dvrwq namlo hoqg nyi tulungv swrsomalob swwl doonum, Dvrwqbo Yalv svka kaagam gab la At Swn bosil swwgam gab bulug pvtw ho nyi mwwjwbo nyiv meeg yaiya jaqt yaiyab goorob kunum.

³²Pitor gvda mwlwb gaqkar yvbnv, hoo mwv lok Liddaho Pwnboam mwwjwbo nyi tulu dookub haanum

³³Hoqho Ainiyas ngvk hvl eminam nyi ak vnyw piin go gorab nyokmab lviya laqyal vcil dook bo ak kaapanum.

³⁴Pitor benum, “Ainiyas, Jisu Kristo nam aldvb mwp paku. Gorab gvdkul noqg kartam mam naarabto.” Ho dara Ainiyas gorab kunum.

³⁵Lidda hoola Saronho doonbo nyi tulungv mwam soq sib nyinam mam kaatwl mwwkur kunv At Swn bulv mwwjw kunum.

³⁶Joppa ho Tabita ngvk hvl eminam nyem mwwjwbo ak doonum. (Gwrikv mwnwg eminam Dorkas hvl benum, hvgdvn si “sudum.”) Mwnwg swwnam mwlwngam nyis tulungam alwb nyik gab la jwwgw homa nyi tulungam svka kaak ho nyipaqnum.

³⁷Hoq apo ho mwn vc kunv siknum, hoo nyi tulungv mwnwg svmangam hwrxaqtvl nam ao dook cwwrwgon ho joopnum.

³⁸Lidda hoqgv Joppangv aado haajaq maanum, hoqgab buu tulungv Pitornvn Lidda ho doodwk hvl tapa tvl bulv mwwg dookub nyi vnyi go kanam banv pui bilwqnum, “Vnwq jaqb oyu maab ngulug dookub haato.”

³⁹Hoqgab Pitor mwx-mvaq banv bulug lvgab wknum. Hwdlo bulug dookho mwv wc yukun, mwam nyi tulug dookub aob boocal caagnum. Ho xwwmy mwlw jaqkv mwam pumbum tvl, Dorkas sima daqdwkho mwnwg lvlwq mvnam mam la kamt vj mvnam mam mwam kaakin banv xabnum.

⁴⁰Pitor bul mwlwngam cwwrw hoqgv roolin tvl, mwv kumbw tvl xumnum; kokw so mwv svma dook taqcib nywkur banv benum, “Tabita gorab tuku!” Ho mwnwg vnyiqngv nyiqbiol piorab kaanv Pitornvn kaapa tvl gorab dooknum.

⁴¹Kokw so Pitor mwnwg alaqngam gagab tvl mwnwn purabnum; mwwjw boam la xwwmy tulungam goqkum kunv mwnwn turdkub bulam jiknum.

⁴²Soq pui si Joppa gvdaho wiywq yukam nyi tulungv vigo At Swn mwwjwnum.

⁴³Pitor Joppa ho soopin jem mvnbo Simon ngvk hvl benam nyi akwg lvgab oyu go doomin gvnum.