Read Nyishi ROMAN 10 Bible Online

ROMAN 10 - Nyishi bible

ROMAN 10

¹Ngoqg vbw-bor tulu, ngoqg hangv mwwdwq dvn ho Pwnboam swgwdvb mwwdwn, Pwnbo no ngoqg nyi tulungam ywwtwb.

²Ngo bul gab hvvky swwdwn, hoqgab bulv Pwnbog hangam xumdwb nyidwb mwwdwn. Hvbmabde bulv Pwnboam hang xumdwb nyitanamv mwwg lvgab al dukub mvdwn.

³Hoqg pagoqkam cengma ho bulv atwg mwwlwqkob nyigam gab bulv atam Pwnbog alaqho jipaqtvl mwwg lvgab al dukub mvdwb jima.

⁴Hoggab Kristo pvvbam ator dooma dukub mvnam ho mwwjwbo nyi vxiam Pwnbog lvgab al dukub mvdwn.

⁵Pvvbam bugil swwl Pwnbog lvgab al dukub mvnam pagoqkam Mojes xeqnum, “Pvvb gaml jinam mam tanbov hoq galoqkv swwtayin.”

⁶Pwnbog lvgab al dukub mwwjwnam hoqgv mvnam pagoqkam soq sib benamv doodwn, “No atam bemabv, hiyv ao gvdab caatayin?” (Hiyv Kriston ao toloqgv boopoq tayin.)

⁷Hvlakam bemabv. Hiyv oram nyookub itayin?” (Hiyv Kriston oram nyookub il sik boam boocatayin.)

⁸Soq sam Dvrwqbo potalo xeqpnamv doodwn. “Pwnbog puiyv noqg lvgab noqg ogum hv doodo. Noqg agam hvvkam hoo noqg hang urahv doodo” Hoq hv lak mwwjwnam puiyam ngulam bekinam.

⁹No agamv “Jisu At Swv” hvl noqg hang uraho Jisun Pwnbov sik boam purab paku hvl mwwjw baloqkam, Pwnbov nam ywwtayin.

¹⁰Hoqgab ngulv ngulug hang urasi mwwjw dvn, ngulv Pwnbo lvgab al dukun. Ho ngulug agamv Pwnbo ngulam ywwpa kun hvl bedwn.

¹¹Hoggab dvrwqbo potangv bedwn, “Hiyv lajaqkam mwam mwwjw bov hvnyw dvb nyiram.”

¹²Soq si nyi vx-cwram bedwn, Juhudi ge Nyoodo nyi ge bulug pengko ho hog asaq ak bel xuqs dooma; Pwnbov mwlw jaqg At Swb nyidwn, ho mwwg eminam mwwjwl bepaboam mwv aya alwb vigo nyi mwlwngam lvqc cidwn.

¹³Dvrwqbo potangv bedwn, “At Swg eminam bepa bo nyi mwlwngv vx-cwram ywwtayin.”

¹⁴Hvbmabde bulv mwwjw maab nyiloqkam hoggub nyil mwwg eminam bepa nyotayin? Hoo bulv hoggub nyil puiyam tapa maab nyiloqkam mwwjw tayin? Hoo bulv hoggub nyil puiyam bulam bekinbo dooma baloqkam tapa tayin?

¹⁵Hoo pui bekin boam kanam maab nyiloqkam hoggub nyil puiyam bekar tayin? Dvrwqbo potangv bedwn “Tugu puiyam baqal haanbo nyi tulu hvvjaq lak hemp ponam nyiv!”

¹⁶Hvbmabde bul mwlwngv Tugu Puiyam bulug hang uraho mwwjw maanum. Hoggab Aijaya benum, “At Sw, ngulug puiyam hiyv tvjwpan?”

¹⁷Hoqgab mwwjwnamv nyuru tak hoqgv haadwn, hoo puiyv Kristog puiyam bekinbo hoqgv tapa dvn.

¹⁸Hvbmabde ngo toxnum, “Bulv puiyam tapa majaqnum? Hvbma bulv puiyam tapanum. Dvrwqbo potangv bedwn: “Bulug agam Yalv gvda gvt tvqpwngam tapa dvb dunam; hoo bulug agamv gvda taqg gon hoqgv taqg gonwb dunyanum.”

¹⁹Ngo lokta toxnum, “Israel nyi tulungv sam cengmanam yv? Mojes otuq jaqb birwqnum: “Ngo nulam Nyoodo nyiingam hang baqdwb mvtayin. Ngo nulam doomabo nyi tulug lvgab hang lengm dvb mvtayin.”

²⁰Aijaya soq sam haakam alwb mwv Pwnbog bid gab benum, “Ngam meegaq maanbo nyi tulungam ngo opaq pakun. Ngam meegaq maanbo nyi tulungam ngo atam kaakin pakun.”

²¹Hvbmabde Israel nyi tulug pagoqkam mwv benum, “Ngo aal loopwngam bugil swwma bo, ngam hang baqnbo nyi tulungam ngoqg alaqngv gaaka tukun.”