Read Nyishi ROMAN 11 Bible Online

ROMAN 11 - Nyishi bible

ROMAN 11

¹Hoqgab ngo toxdvn, Pwnbog mwwg atwg nyi tulungam haqxianum i? Hvbma, hoggub belakam haqxia maanum. Ngo atv Israel nyiv, Abraham gv ko hosiq hoqg Benjaminwg dvpar hoqgv.

²Pwnbov nyerab nyik hoqgv gvda gvtam pwma daab mwwg xuqnam nyi tulungam mwv haqmanum, nulv Dvrwq potalo xeqpnam mam cengdo, Ilija hoggub nyil Pwnboam Israel nyi tulug bvrwqngam betamnum.

³“At Sw, bulv noqg nyiqry benbo tulungam mengpa kun hoo yugwg pvvbam saxia paku, ngo twqku sija doodwn, hoo bulv ngam mengdwb meekar do.”

⁴Pwnbov mwam hog hvl birwqnum, “Ngo at gab lwwyw kvn go xaalyo bo Baal pwnboam xuma boam nyi tulu gon ngo xuqlin apaqpan.”

⁵Soq sib kalam soolo Pwnbov nyi jaqnyo koggo xuqlin banv mwwg anya ko-gab xuqlin ap pan.

⁶Mwwg soq nyi tulu sam xuqnam si bulam anyo ko-gab xuqpan, hvbmabde bulv hog nyis ak nyigam gabma. Hoggab Pwnbov nyiam bulug nyinam mam kaal swwb nyiloqkam mwwg anyanamv jvqtw anyanam hvb nyiram.

⁷Hvnyiloq hognvkv? Israel nyi tulungv hognvkam meegaqnum ham bulv kaapa kumanum. Hvbmabde nyi dvpar parnyo gon Pwnbog xuqnam nyi tulungv ham kaapa kunum; hoo bulv Pwnbog goqnam mam tapa kumab ruutar tarl doonum.

⁸Dvrwqbo potalo xeqpwl apnamv doodwn, “Pwnbov bulug vnyiq hangam paca dvb mvnum, hoqgab bulv soolog aal godab bulug vnyiqkv kaapa nyoma dvn, hoo bulug nyurungv tapa nyoma dvn.”

⁹Debid kam benum; “Bulam bulug durumko ho nootu tvka, bulv bwdw hotka, bulam laqm-baqm tvka!

¹⁰Bulug vnyiqkam kaapa mvma dvb mutum tvka, hoo bulam nwrba gob hentwram henla maadwb looxiam nyimto.”

¹¹Hoq gab ngo toxdvn, Juhudi nyi tulungv duqtup geqyikho bulv twrb looda twrknum? Twrnv bulug nyinam hoqgab ywwt ywwnamv Nyoodo nyi tulu gab haaknum ho Juhudi nyi tulungam Nyoodo nyiingam hang baqm dvb mvnum.

¹²Juhudi nyi tulug nyic nyinamv gvda gvt gab alboam baqnum. Bulug yal lo jwwgwnamv Nyoodo nyiingam nyet mvdwb jinum. Ho nyiloqkam sija xipa maanam Juhudi nyi mwlwngam xitaq baloqkam hog hwdgo soq lvqcnam si koi yaatayin!

¹³Ngo sija Nyoodo nyi tulungam bedwn; ngo Nyoodo nyi tulu gab xuqnam pui benbob nyil swwdy deedib hoo swwgam gab ngo atam ngoqg bon nyik gab xitor gob mwwdwn.

¹⁴Ngoqg bon nyik hoqgab Pwnbov looxiam ngoqg nyi tulu gon ywwm dvb ngo atwg nyobam mwwdwq dvn.

¹⁵Bulam Pwnbov haqpaq yukam gvda gvtv Pwnbog ajin swwknam bulug nyia ko ajinv bulug ceebio nyiknum ho soq si sik bov swwgwb turab kunam hvb nyitayin.

¹⁶Pwnboam wtw pintu gon jib nyiloqkam wtw tvqpwngv Pwnbo gab doodkun. Svvn rwbv Pwnbo gab nyib nyiloqkam, hoq torab bvkam Pwnbo gab doodkun.

¹⁷Liinam Olib svvn hoqg haqbam tuugin paxiatvl mooro Olib svvn hoqg haqbam liinam Olib svvn hoqg paxia ko ho liisiql liitin dvn Nyoodo nyi tulu nulv hoq mooro Olib svvn hvb nyidwn. Hoqgab nulv sija Juhudi nyi tulug atoram la swwg nyetam tvba dvn.

¹⁸Hoqgab nulv haqb hvb nyidwb paxia kunam nyi tulungam benyi-beya maab. Ho no hoggub xitor yaagob nyidwn? No svvn haqb gon twqlak. No rwbam daqdwb svka maadwn. Hvbmabde rwbv lak nam daqgdvn.

¹⁹Hvbmabde ngo bedwn, “Haqb torabpam paxianamv ngoqg dook gab lak mvnum.”

²⁰Hv jvqtwngv jaqsu. Bulam paxianam hvnyiloqkam bulv mwwjw mwwgam gab nyinum. Hvbmabde nulv mwwjw doogam gab nyipa. Hvbmabde soq pagoq sam mwwl xitor yaagub mwwmab hvbmabde bos soto.

²¹Pwnbov svvn haqb hvb nyil doon boam Juhudi nyi tulungam kam apaq maanum, nulam mwv apaq jiyi nvp mwwdwn i?

²²Soq soqgv ngulv kaacin do Pwnbov hog hwdgo ayadvn ho hog hwdgo kor dvn. Hvbmabde no mwwg aya ko ho dooky baloqkam mwv nam aya tayin. Hvbmabde no mwwg ayako ho dooma baqloqkam, nam kam svvn haqb hvb paxiatayin.

²³Hoo Juhudi tulungv mwwjw maab nyinam mam apaq kubaloqkam bulam otuqho bulug dookho lokta doom tayin.

²⁴Nyoodo nyi tulu nulv mooro Olib svvn papaq kunam hvb nyidwn, hoo lok guugab mvdwb puutinum, swwdin swwm dvb liidumnam Olib svvn hvb nyimanum, hog hwdjaqgo soq tulu si koi taikun, hwdlo bulug atwg liinam Olib swwcwb guutinl swwk baloqkam.

²⁵Ngoqg vbw-bor tulu, ngo nulam ura bvrwq ak cengm dvb mwwdo. Soq si nulv hog hwdgo cenglaq dvn ham nulam cengdwb jitayin. Hoqhv Israel nyi tulungv kuiyum godab hang vdwl dooram. Hvbmabde Nyoodo nyi tulungv Pwnbog dookub haatwrnam gob dootayin.

²⁶Soq sib nyil Israel nyi tulungam ywwdwb nyitayin. Dvrwqbo potalo xeqpwl apnamv doodwn; “Ywwt ywwn bov Jaiyon hoqgv haatayin, mwv almab nyinbo mwlwngam Jakub ko hosiqkam naapaq tayin.

²⁷Ngo bulam birmins tayin, hwdam ngo bulug nyicam naapaq tayin.”

²⁸Juhudi tulungv Tugu Puiyam haqpaqnum bulv Pwnbog ceebiongv. Hvbmabde Pwnbov xuqgam gab bulug at ab tulungam hentaql bulv Pwnbog ajinv.

²⁹Hoggab Pwnbov nywywngam xuqnam ho lvqcnam nyiig aoho mwwg hangv kwly maadwn.

³⁰Hvbmabde Nyoodo nyi tulu nulv kol otuqho Pwnbog benam mam tamanum; hvbsujaqkam nulv sija Pwnbog ayangam kaapa pakun hoggab Juhudi tulungv mwam tvjw kumanum.

³¹Hoq hvbkalam nulv Pwnbog ayangam kaapa pakun. Ho Juhudi nyi tulungv kam sija Pwnbog ayangam kaapa dukub bulv mwwg benam mam tvjwmab nyiknum.

³²Hoggab Pwnbov nyi mwlwngam mwwg ayangam kaakin dvb bulam mwlw jaqkam tama bo nyuurug nyumwb mvl apnum.

³³Pwnbov jvqtw jaqb mwlwngam aya al dvn. Pwnbov mwlwngam pumb rwlaq yaadwn hoo cenglaq yaadwn! Hiyv mwwg pvvb mvnam mam bedar nyotayin? Hiyv mwwg nyinam wnam mam cingc nyodwn?

³⁴Dvrwqbo potangv bedwn, “Hiyv At Swg hangam cengdwn? Hiyv mwwg tomswr-hony bob nyitayin?

³⁵Hiyv nyiv mwam lok hog ak jika dvn, mwam jikur kodwb nyidwn?”

³⁶Hoggab hog mwlw luuxiam mwv pwnam. Ho hog mwlw luuxiv mwwg galoqkv swwdwn hoo mwwg gab doodwn. Nwrba gob Pwnbog eminam yuunka! Amen.