Read Nyishi ROMAN 12 Bible Online

ROMAN 12 - Nyishi bible

ROMAN 12

¹Ngoqg vbw-bor tulu Pwnbov nulam hwdgo aya gab ngo nulam mvnyi-moiyul bedwn, nulv atam turdwb Pwnboam pwr jipaqto, mwwg bonam nyidwb hoo mwam hang xumdwb jidwb atam mwwg alaqho gvqlwql jipaqto. Soq sib nyinam siilak jvqtw jaqb nulug xuml jidynam jaqkv.

²Soq gvda gvt soqg nyi nyinam mam kaagwl akukam nyil swwmab, hvbmabde Pwnboam nulug hang urangam kwlil nitib mvkto. Ho nulv Pwnbog mwwnam mam la hognvkv aldvn hoo Pwnboam hoggub nyil hang xumdwb nyitayin hoo hognvkv kvtaqdvn ham cengtayin.

³Hoggab Pwnbov ngam anya mwwpal lvqcnam gab ngo nul mwlwngam bedwn. Nulv atam haajaqb koiyv subo mwwl mwwbin maabv. Hvbmab nulv atv mwwdy to ho nyiv vxiv atam Pwnbo hog hwdgo mwam mwwjwngam jipan hvdkalam nyil swwka suto.

⁴Ngulug gv dorpw si al alaq luuxiv doodwn. Soq torab soqg at atwg nyis wsv luusaq luusaq kalam dooxy dvn.

⁵Hoq hvbkalam ngulv naleq sujaqkam Kristog tolo gv dorkin gob nyil ngulug gv so all alaqngv gv dorkin ho doonam hvb ngul mwlwngv akinv, hoo akwn akwn gv ho kaqbaqtvl gv vp hoqg all alaq akgob nyidwn.

⁶Hoqgab ngulv Pwnbog anya mwwpal jinam lvqc cinam sam ngulv nyintuj. Ngulam Pwnbov mwwg puiyam bekar mvdwb lvqc cipnyiloqkam, ngulv sam ngulug mwwjwnam hwdkalam nyintuj;

⁷bon nyim dvb jipnyiloqkam, bon nyintuj, tomswr dvb jipnyiloqkam tomswr swrtuj;

⁸nyi asaqkam sam biywr bebiab naadwb jipnyiloqkam, biywr bebiab natuj. Hiyv akgon jidnyiloqkam, haareq alwb jito. Hiyv akgon nyig wg dvloqkam, hwrcw lvgab nyig wgto, hiyv akgon nyi asaqkam ayangam kaakin dvloqkam, hemp-hvnyir lvgab nyito.

⁹Aby bok bopaqmab jvqtw jaqb abyto. Alman boam oyum to, alboam gvbwl doogto.

¹⁰Akwn akwn aby bomin sul vbw-bor hvb Kristog tolo akwn akwn ximin sunam mam kaakin gvdwl dooto.

¹¹Kwrwb bon nyito, sepy maabv. At Swn hangv mwwjw swsw gvdwl nyuum jaqb bon nyil xumto.

¹²Nulug hingwnamv nulam hemp alwb aptvka; nulug vs-axaq yukam cwqto, hoo looxiam swgwl dooto.

¹³Xuqlinam nyi tulug pwwma cimako lo svka to hoo nyiam haabia tatal svgagvrwq to.

¹⁴Nulam mvnyi-mviya bo nyi tulungam Pwnbov anya tvk hvl xumj to; vv, bulam beemab hvbmabde anyato.

¹⁵Hemp ponbo nyi tulu lvgab hemp pomin gvto; xabn bo nyi tulu lvgab xabmin gvto.

¹⁶Mwlw jaqkam aiyinb kaato. Nyeram yaagub nyikar maabv, hvbmabde nyis anyo kongam lool nyito. Nulv atam cengbin yaanbo gob mwwl nyimabv.

¹⁷Nulam nyi ak almab nyibaloqkam nulv mwam almab kalam nyilwq maabv. Nyi mwlwngv hog nvkam aldvn hvl benam mam ham nyito.

¹⁸Nyi mwlwg lvgab swrsomalob doodwb nulug bon nyiyinam luuxiam nyidwb mwwto.

¹⁹Ngoqg ajin tulu, nywywngam ree dvqlwq tvnvp mwwmabv hvbmabde, Pwnboam ham ree daqmto. Hoggab Dvrwqbo potangv bedwn, “Ngo ream daqtayin, ho ngo ham nyilwq tayin hvl At Sw bedo.”

²⁰Hoq baloqkam mwam dvdwb jito, mwv hvngwr baloqkam mwam twwm dvb jito. Hoq hvb nyibnyiloqkam no mwam hvnyw nyipa tayin.”

²¹Alman boam mviya komab hvbmabde alman boam albo lvgab mviyato.