Read Nyishi ROMAN 13 Bible Online

ROMAN 13 - Nyishi bible

ROMAN 13

¹Nyi vxiv gvda loqg sorkarwg gamlam tadwb nyidwn, hoggab Pwnbov gaml jimalo hiyvg sorkarv swwnyiram, hoo hoq sorkari ham Pwnbov doom dvb jipan.

²Hiyvg nyiv sorkaram tama dvn mwv Pwnbog gaml jinam mam tama dvn, hoo hiyv akgon hoqhvb nyidwn mwv mwwg atwg aoho yolungam nyipup sudwn.

³Alwb bon nyinbo nyi tulungv saab tulungam bos sos dooma dvn. Hvbmabde almanbo bon nyinbo nyi tulungv bosdvn. No saab tulungam bos soma dvb mwwdwn? Ho albo bonam nyito, hoo nyi tulungv nam paqyalinco hvl betayin,

⁴hoggab mwv Pwnbog nyerangv, mwv noqg alko gab bon nyidwn. Hvbmabde no almanbo nyis maayam nyibaloqkam no mwam bos dvb nyitayin, hoggab mwv nyiam laqm-baqm dvb jidwb atorv doodwn. Mwv Pwnbo nyerangv hoo Pwnbov almab nyinbo nyi tulungam Pwnbov haaxaqnam mam bulug aoho nyil kaakin gvdwn.

⁵Soq pagoq gab nulv sorkari gamlam tal swwdwb nyidwn; Pwnbov haaxaq ko-gab ma hvbmabde hang mwwcin ko bvrwq gab.

⁶Soq pagoq soqgab sulak nulv gvda nyoogangam jidwn. Hoggab sorkarv Pwnbo gab bon nyidul bulug bonam niqtuq nyilin dvn.

⁷Hoqgab bulam jis doonam mam jito, bulam hoqg atwg jis doonam mam, hoo gumn gab nyooga jisam jito. Ho bulam xuml paql nyidynam mam bulam nyito.

⁸Akwn akwn aby minsul swwnam aoho hiyv nyiv kam nyigo maab. Hiyv nyiv atwg gutu-gorangam abydvn mwv pvvbam bugil swwpa kun.

⁹“Nyiig nywxw nyolam naareq maabv; nyi mengmabv; dvco maabv; kaaby maabv; hvl birnam aoso mwlwngam gamkin gob bisum banv birnamv. Noqg gutu-gorangam atam abynam hvb mwam aby boto.”

¹⁰Hiyv lajaqkam atwg gutu-gorangam aby baloqkam, mwam no nyimur ram, aby bonamv pvvbam mwlwngam bugil swwnam hvb nyidwn.

¹¹Nulv sam nyidwb nyikypa, hoggab nulv cengdo sija hognvk moodv, nulug yubngaql doonam hoqgv huurab dvk moodv haapa ku. Hoggab ngulug otuqho mwwjw dvk moodam sija ywwd moodv ogum yapaku.

¹²Aiyv wnya svqtwqb wpa ku, ho aalv hvvnwq paku. Kan uraho nyis tulungam nyinam sam apaq nyatkuj. Hvbmabde nwwxo uppuqngam naarab gvdwl huto lo nyob panam mam pataju.

¹³Aalwg huto ho doonbo nyi tulu hvb ngulv atam hindib dootuj. Dvl-twwl hang mwwlwqkob yocu-yabio nyimab hoo twwxum maab, yocu-yabio nyimab ho hemp-hvnyirl nyinwnam mam nyimab, yolu dugaqnam mam la kaabynam mam nyimab.

¹⁴Hvbmabde At Sw Jisu Kristog nwwxo svtam bvvto, hoo nulam gv vdinam nyic nyim dvb pagoq jimabv, hoo ham hangam xumdwb nyinam mam apaq tuku.