Read Nyishi ROMAN 14 Bible Online

ROMAN 14 - Nyishi bible

ROMAN 14

¹Nulug pengko ho mwwjwngv ator maanboam ayab cumto; hvbmabde mwwg mwwjwnam mam haql hoq pagoqho mwwg lvgab goomab.

²Nyi akwg mwwjwnamv mwam mwwtaqb dvnam gotwq bolo dvm dvb jidwn, hvbmabde mwwjwnamv ator yooma bov mwv oo arongam dvdwn.

³Mwwtaqb dvnbo nyi akv dvma bo akam bepaq taiyaql benyi-beya dvb nyima dvn. Ho oo arongam dvnbo nyi akv mwwtaqb dvnbo akam pw-hwwdwb nyima dvn, hoggab Pwnbo mwam svgagvrwq kunv naapa kun.

⁴No nyi asaqg nyerangam pw-hwwdwb no hiyv? Alwb nyinam nyimangam nyerag Nyiit atv sulak bibwq tayin. Hoo bulv niqtuq lengtayin, hoggab At Sw bulam niqtuq lengdvb mvdwn.

⁵Nyi akin mwwdwn, aal loogwn aal loosaq gon ham xibin yaadwb hvvtwngv, hoo nyi akin mwwdwn aal looxiam aiyin xidwb nyidwn hvl bedwn. Nyi vxiv mwwg atwg hangam mwwdil ap sudwb nyidwn.

⁶Hiyv ak gon aal loogwn xibin yaan bov nyi ak hv mwv At Swn paqgam gab nyidwn, hoo mwwtaqb dvnbo ak hv kam mwv At Swn paqgam gab dvdwn, hoggab mwv Pwnboam mwam dvdwb jigam gab paqdwn. Hoo hiyv nyiv hog akin dvdwb mwwma bov mwv kam ham At Swn paqgam gab nyidwn, hoggab mwv Pwnboam paqdwn.

⁷Hoggab ngulv at gab aro swwma dvn, hoo ngulv at gab aro sima dvn.

⁸Ngulv swwd nyiloqkam, At Sw gab swwdwn, hoo ngulv sidnyiloqkam ngulv At Sw gab sidwn. Hoqgab ngulv sijaqkam ho turjaqkam, ngulv At Sw gab doodwn.

⁹Hoggab Kristo siknum hoo kokw so swwgwb turkur kunum, hoqgab mwv sinbo gabla sima bo gab At Swb nyidkun.

¹⁰Hoqgab nulv atwg boram noqg bvrwqngam pw-hwwdwn? Ho noqg boram no hog nyitwl bepaq taiyaq dvn? Ngul mwlwngv Pwnbog dook agaho lok mwam pw-hwwk dvb daqdwb nyitayin.

¹¹Dvrwqbo potangv bedwn, “At Sw bedwn, ngo doody deedib, nyi vxiv, lwbw kumbw tvl ngoqg agaho xumtayin, hoo nyiv ngam Pwnbo hvl betayin.”

¹²Ngulv vxiv atv atwg bvrwqngam xisam Pwnboam lok jidwb nyitayin.

¹³Hoqgab ngulv akwn akwn pw-hwwmin sunam mam apaq tukuj. Hvbmabde ngulv bor tulungam duqtup geqma dvb ho nyic nyim dvb bulug ceebiob hog gokam nyiram hvl bedwb nyipa.

¹⁴Ngoqg At Sw Jisug lvgab lokub doobanamv ngam jvqtw jaqb hog akukam kacbo dooma dvn hvl mwwjw baloqkam hoqhv mwwg gab kacbov.

¹⁵No hog ak doogam gab noqg vbw gon nyimur pak nyiloqkam no hoqham abil nyikma. Noqg dvs ak dvgam gab Kristog swlywnam nyi ak ham yuum ma.

¹⁶Nulv hognvkam aldvb mwwnam ham almadwb nywywngam nyimab.

¹⁷Hoggab Pwnbog lvpw-hativ dvnam twwnam aro ma, hvbmabde Pwnbov hognvkam albov hvgdvn ham nyidwn, hoo dvrwqbo Yalv jinam swrsomalo ho hang hemp alnamv.

¹⁸Hiyv nyiv Kriston kanam tadwn mwv soq sib nyil Pwnboam hang xumdwb jidwn ho nyiv kam keleqdvb nyidwn.

¹⁹Hoqgab ngulv looxiam swrsomalongam akinam ator svkangam jidy boam ngul lvgab nyijtayin.

²⁰Dvnam gab aro Pwnbog bonam nyinam mam twrm maabv. Dvs mwlwngam dvdwb nyidwn, hvbmabde dvnam gotwq bolo dvnamv hiyv ak gonam nyic nyidwb jib nyiloqkam, hoq hvb nyinamv nyixiaqdvn.

²¹Kvtaq jaqb nyidynamv vdin dvmab ho opo twwmab doonamv aldvn, hvbmabde nyinam gotwq bolo nyil noqg bor akam bwdw hom dvb nyinamv almadwn.

²²No soqg agam soqgv noqg la Pwnbog pengko ho hognvkam mwwjw pakun ham hengab apto. Mwwg atwg nyinam mam kvtaq pan hvl benbov. Ho ham pw-hwwk pagoq doodwb nyimabo nyi hvvjaq lak hemp ponam nyiv.

²³Hvbmabde mwv hognvkv dvdwn ham mwv mwum baloqkam, Pwnbov hoq tulu ham dvbnyiloqkam yolu betayin, hoggab dvnamv mwwjwnam hoqgv ma. Hoo hog luucw luutv mwwjwnam ho dvqgw maaloqkam hv nyicv.