Read Nyishi ROMAN 15 Bible Online

ROMAN 15 - Nyishi bible

ROMAN 15

¹Ngulv ator mwwjwbo nyi tulu ge ator mwwjw maanbo nyi tulungam bulug igin vi baqk ho svka dvb nyiky dvn. Ngulv atv xumtwq dvb nyima buj.

²Hvbmabde ngul mwlwngv asaq mwwjwbo gab bulug al ko-gab nyituj, hoqhvb nyinamv mwwg mwwjwngam koi mvdwb svka dvn.

³Hoggab Kristo mwv atam hang xumdwb nyimanam, hvbmabde hoqhvb xeqpnam doodwn, “Nulam bej beparnamv ngoqg aosi haapa kun.”

⁴Hoggab dvrwqbo potalo xeqpwl apnam luuxiv ngulam tomswr dvb doodwn, ho dvrwqbo potalo xeqnamv ngulam cengm dvb jidwn hoo ngulam hindil doom dvb jidwn.

⁵Ngulam cwqdwb jinbo Pwnbo hoo ngulam haakam al mvdwb jinbo Pwnbov ngulam mwwnam akinam ngulug pengko ho mwwyin akinam mwwg dvl Jisu Kristog kaag dvb nyil kaakinam mam nyito,

⁶hoqgab nulv mwlwngv lvkin gob agam googdvl ngulug Pwnboam la At Sw Jisu Kristog Abam paqto.

⁷Pwnboam yuum dvb Kristo nulam naaknam hvb nulvkam akwn akwn nvvrwq minsto.

⁸Ngo nulam bekin dvn Kristo Juhudi tulungam Pwnbov hog hwdgo mwwjw dvb nyidwn ham kaakin dvb Juhudi tulug nyerab swwnam ho at ab tulungam Pwnbov birnam mam niqtuq lengm dvb mwv mwwnum,

⁹hoo Nyoodo nyi tulungam mwwg aya ko-gab Pwnboam paqm dvb jinum. Dvrwqbo potalo xeqpnamv doodwn, “Hoggab nam ngo Nyoodo nyi pengko hoqgv paqtayin, ngo noqg eminam bemin bel paqtayin.”

¹⁰Akta xeqnamv bedwn, “Nyoodo nyi tulu nulv Pwnbog xuqnam nyi tulug lvgab hemp poba to.”

¹¹Akta xeqnamv, “Nyoodo nyi tulu nul mwlwngv At Swn paqto, hoo nyiilu mwlwngv mwam vc alwb paqto!”

¹²Hoo Aijaya lokta bedwn, “Jesse ko hosiqkv haatayin, mwam Nyoodog nyi gora abwb swwm tayin, hoo bulv mwwg aoho hingw tayin.”

¹³Hingwnam Pwnbov nulug hang uraho hemp al mvdwb la swrsomalongam nulv mwam mwwjw ko-gab jignvka, hoo nulug hemp ponam mam poyul swwm dvb dvrwqbo yalwg atoram nulam jignvka.

¹⁴Ngoqg vbw-bor tulu, ngo nulug alnam puiyam tapa tvl ngoqg hangv xumtw-twiya do, ho nulv mwlw gonam cengtwl akwn akwn tomswr minstvk hvnam mam tapa tvl ngo mwwpa do.

¹⁵Hvbmabde soq pota taq so ngo haakam alwb hog goos ak nulam goopal goqg yin, ngam Pwnbov Jisu Kristog nyerab Nyoodo nyi gab bon nyitwk hvl ngam jigam gab ngo haakam al mwwpa dvn

¹⁶ngo nyub akgob nyil Pwnbo galoqkv Tugu Puiyam naalayil bekar dvn hoo Nyoodo nyiv Pwnboam guunam mam Pwnboam nvvrwq mvdwb ho dvrwqbo Yalam ham nyedar darxaq mvdwb nyidwn.

¹⁷Kristo Jisug, ho ngo Pwnbo gab bonam nyinam mam xitor yaagub mwwdwn.

¹⁸Ngo haakam alwb binwdvn, Pwnbov hognvkv Kristo ngoqg goloqgv nyob luusaqngam Pwnboam bugil swwm dvb agamv bitwqmab swrdorxeq twqb nyinamv hoo dvrwqbo yalwg ator lvgab bon nyil kaakinum.

¹⁹Ho hoqhvb lamta dvvpwngam Jerusalem hoqgv Illirikum nagub ngo Tugu Puiyam Kristog pagoqkam mwlwngam bekar yvnum.

²⁰Ngoqg looxiam tuugabnamv Tugu Puiyam hogloq nyook hooxeq Kristog bvrwqngam tapa maada pan hoqho bekar dvb ngo tuugab dvn, ho nyi ak gonwg swwrw diigab apnam ho mwwgw naadwb mwwnum.

²¹Dvrwqbo potalo xeqnamv doodwn, “Nywywngam mwwg puiyam bekin maanam nyi tulungv kaapa tayin ho nywywngam mwwg puiyam tapa maanbo nyi tulungv tacin tayin.”

²²Soq pagoq gab lok ngam nulug dookub wta boam wmab bitur ap pan.

²³Hvbmabde ngo sija ngoqg bonam soq lywpa soqkam nyiyum pakun, hoo ngo hvd vnyw go nulug dookub wl nulam kvvnwnum.

²⁴Ngo sija ham nyidwb alvku. Ngo nulam Ispen gvdab wjo ywwtwl nulug dookho doonul kaapa dvb mwwdo, ho apo go nulug lvgab dooxo kokwngam Ispen gvdab wdwb nulam svka kodwb mwwdo.

²⁵Sijada ngo Jerusalemb wdeen ho wgdvl Pwnbog nyi tulungam nyis loq ak nyij tade nv.

²⁶Hoggab Mesidoniya dvrwq namlo haam la Akaiya dvrwq namlongv Jerusalem alo Pwnbog nyi doonbo jwwgw nyi tulungam svka dvb hvl bulv mwwlwq sunv ap pa.

²⁷Bulv atv sam nyis dvb hvl bir pakun. Hvbmabde jvqtw jaqb Juhudi tulungv Pwnbog galoqkv kaapanam bulug yal gab albo gumnam Nyoodo nyiingam beyin gvnum. Hoqgab Nyoodo nyi ngvkam Juhudi tulungam bulug gvda gvtwg gumn dvrab pam svka gab bedwb nyidwb nyidwn.

²⁸Ngo soq bon nyis sam nyixo peekul bulam hog hwdgo twngkv kokuml ap pan ham bulam alaqho jip peekul, ngo Ispen gvdab wrab tayin, ho nulam lamta ho Ispen gvdab wikam kaapa tayin.

²⁹Ngo nulug dookub haai kukam, ngo cengdwn, ngo Kristog galoqkv nulam lvqc jidynam vigo baqtayin.

³⁰Ngoqg vbw-bor tulu, ngo nulam ngulug At Sw Jisu Kristog lvgab lvkin gob Pwnboam swgw tabvk hvl bedwn.

³¹Judiya bolo doonbo Pwnbog gamlam tama bo nyi tulug alaq hoqg bon nyinam mam niqtuq lengm dvb ho Pwnbog nyi tulungam kaatwl alpa hvm dvb xumto.

³²Hoqgab ngo hemp alwb nulug dookub Pwnbov anya baloqkam haatayin, ho ngoqg nulam kaatab haanamv nulam hemp pomdvb la mwwngam al mvdwb jitayin.

³³Swrsomalongam doogbo Pwnbov nul mwlw lvgab dooba nvka. Amen.