Read Nyishi ROMAN 16 Bible Online

ROMAN 16 - Nyishi bible

ROMAN 16

¹Ngo Senkriya dvrwq namlo hoqg bwrm Pobe nulam svgagvrwq tvk hvl xumdwn.

²Mwnwn nulv Pwnbog nyib nyil At Swg emin gab nvvrwqto, hoo mwnwn svka dvb nyib nyiloqkam nulv kaata ka, hoggab mwn nyi tulungam vijaqg svkanum ho ngam kam hind alwb svkanum.

³Ngo Prisilla la Akiula Kristo Jisug tolo bonam nyibam bo tulungam salam jidwn.

⁴Bunyiv ngoqgab bulug gv dorpwngam jitwl sitam tanum ngo bulam paqma vrram paqdwn, ngo twqma, hvbmabde Nyoodo nyi dvrwq namlo mwlwngv bulam paqdwn.

⁵Bulug namho hookuml doonbo hamkam salam jito. Ngoqg tumanam ajin Epaenetus ngoqg salam jito, hoggab mwv Asiya gvda soqg otuqjaqb Kriston mwwjw bov.

⁶Ngul gab nyelin alwb bonam nyinbo Meerinvn salam jito.

⁷Ngoqg Juhudi ajin Andronikus hoo Juniya ngoqg lvgab pvtwqho dooiyinbo vnyiam kam salam jito. Bulv ngoqg Kristan swwma daab swwco bov, bulam xuqnam nyi tulungv hind alwb cengdwn.

⁸At Swg tolo ngoqg tumanam Ampiliyatas ngoqg salam mam jito.

⁹Kristog bonam nyibambo ngulug ajin Urbanasnvn, hoo ngoqg tumanam Istakisnvn ngoqg salam mam jito.

¹⁰Kriston hang biinbo Apelesnvn salam jito. Aristobulas bulug imiq nyi tulungam salam jito.

¹¹Juhudi ajin Herodion ho Narsissug imiqho doonbo vbw-bor tulungam salam jito.

¹²At Sw gab bonam nyinbo Tripena hoo Triposa salam jito, hoo At Sw gab xixor jaqb bonam nyinbo ngoqg tumanam Parsis bulam ngoqg salam mam jito.

¹³Atwg bonam nyi mwlwngv poqkum dvb nyinbo xuqnam Rupasnvn salam jito, ho ngam At Swg ko jaqhvb sonbo akam ngo ngoqg salam jidwn.

¹⁴Ngoqg salam mam Asinkritas, Plegon, Hermes, Patrobas, Hermas, hoo bulug lvgab dooba bo vbw-bor mwlwjaqkam salam jito.

¹⁵Pilologas, Juliya, Neriyas hoo mwwg bwrm Olimpas, hoo bulug lvgab dooba bo Pwnbog nyi tulungam salam jidwn.

¹⁶Nulv akwn akwn vbw-bor hvb nyil moopup minsil salam jito. Kristog dvrwq namlo mwlwjaqkv bulug salam mam nulam jilwq do.

¹⁷Ngoqg vbw-bor tulu, ngo nulam bedwn; nulug pengko ho nulam hang pwsaq mvdwb hoo nyi tulug mwwjwnam mam muk mviya bo nyi tulungam hengab to, hoo nulug tagab kunam tomswrnam mam oksub benbo nyi tulu hoqgv aado ho dooto.

¹⁸Hoqhvb nyinbo nyi tuluhv bulv jvqtw jaqb ngulug At Sw Jisu Kristo gab bon nyima dvn; hvbmabde bulv atwg kepo gab nyidwn. Bulv bulug agam tiiswr bviywrbo agam mam bel ho tangam alwb agam gool bulv hang mwws mvdwb nyi tulungam vm mvvpaqdvn.

¹⁹Nyi vxiv nulug Tugu Puiyam hang biinam bvrwqngam tapa do, hoo ngo soq sam tapa tvl nulam hemp al mwwpa do, ngo nulam hog nvkv aldvn ham cengtwk hvl hoo hog nvkv almadwn ham mwwpa mabwk hvl bedwn.

²⁰Ngulug swrsomalongam doogbo Pwnbov oyu maadab uiyam noqg lvpia niikum ho caajab tayin. Nulug At Sw Jisug anyangv nulug lvgab dooba nvka.

²¹Ngoqg bonam nyibam Timoti, Juhudi nyob luukin Lusias, hoo Jason hoo Sosipator bul kam salam jito.

²²Soq pota sam xeqn bo Tirtiyas, ngo nulam ngoqg Kristan salam mam jidwn.

²³Ngulug dvrwq namlo doogw ko nam at Gaius nulam salam jido. Soq lvpw soqg twngk noosungam bwwnbo Irastus la ngulug bor Kuartus nulam salam jido.

²⁴Ngulug At Jisu Kristog anyangv nulug lvgab dooba nvka. Amen.

²⁵Ngulv Pwnboam paqtju! Mwv nulam mwwjwko ho ator daqm dvb ngoqg Tugu puiyam Jisu Kristo bvrwqkam bekin kojaqb, hoo kolwg kvsil apnam uraho jvqtwngam kaakin kojaqb ator jitayin.

²⁶Ho sija jvqtwngam agab nyiqry kaanbo tulug xuqnam hoqgv belin pakun, hoo nwrba cwtam Pwnbov gaml jinam mam nyob mwlwngam cengm dvb hoo mwlwngam mwwjw mvdwb hoo mwam bugil swwm dvb nyinum,

²⁷mwlwngam cingtwrbo Pwnbo akin ciqnyingam Jisu Kriston hentaql nwrba cwtam hoqgv nwrba gob yuunamv dooba nvka! Amen.