Read Nyishi ROMAN 2 Bible Online

ROMAN 2 - Nyishi bible

ROMAN 2

¹Ngoqg ajin, no nyi asaqkam pw-hwwma dvn i? Hvb nyiloqkam no hoggub nyilakam ham keleq nyoram. Hoggab no nyi asaqkam pw-hwwdy nyiloqkam namkam bulv hognvkv nyidwn ham nyidwn, ho atam yolu bexab sudwn.

²Pwnbov soq sib nyi nyinbo nyi tulungam pw-hwwdy lalal kvtaqb pw-hwwdwn hvl ngulv cengdwn.

³Hvbmabde ngoqg ajin, no soq sam atv nyi asaqkam pw-hwwgam gab no Pwnbog pw-hwwtanam hoqgv keleqtayin mwwdwn i?

⁴Ho no mwwg ayangam, himwnam mam, hoo cwqnam mam, anyoko gob mwwdo, no jvqtw jaqb cengdwn Pwnbov anya dvn hoqgab mwv nam mwwkur mvdkub ator alwb nyido.

⁵Hvbmabde noqg hangv vdwl doodo, hoo no Pwnbog haaxaqngam la pw-hwwdy lalal pw-hwwd aalam noqg atwg laqm baqsam koi yaiya mvdwb mvdu do.

⁶Hoggab Pwnbov nyi vxiam mwv hognvkv nyipa kun hoq nyis tulungam nyijongam mwam jitayin.

⁷Nyi tuugin albo bonam nyidul doodwn, ho yuunam mam, xinam mam, ho nywywngam sima ko lamtangam meekar dvn. Bulam Pwnbov nwrba cwtam swwgam jitayin.

⁸Hvbmabde nyi tuugin at gab mwwtwq boam hoo albo bonam haqpaq pel alman boam, nyelin boam, Pwnbov bulug aoho mwwg haaxaqngam la hang lengnam mam aptayin.

⁹Almab nyinbo nyi mwlwngam Pwnbov hentwr bvla nyelin-dorsib nyidub jitayin. Otuqcob Juhudi, hoqg kokwb Nyoodo nyiingam.

¹⁰Hvbmabde Pwnbov alwb bon nyin boam yuunam mam, xinam mam hoo swrsomalongam bulam jitayin. Otuqcob Juhudi hoq kokwb Nyoodo nyiingam kam.

¹¹Hoggab Pwnbov hiyvg nyi akgon kam xibin yaama dvn hvbmabde nyi mwlwngam aiyinb xidwn.

¹²Nyoodo nyiingv Mojesg pvvbam doog maadwn. hoqgab bulv nyic nyidwn hoo pvvbam bulam bigw naadwb nyima dvn. Juhudi tulungv Mojesg pvvbam doog gvdwn. Ho bulug nyic nyinam mam pvvb lvgab pw-hwwg dvn.

¹³Hoggab pvvbam nyurungv tvtwq tvl nyiam Pwnbog lvgab kvtaqdvb mvma dvn. Hvbmabde pvvbv hognvkv gaml jidwn ham tanam mvslak Pwnbog lvgab kvtaq aldvb swwdwb mvdwn.

¹⁴Nyoodo nyiv pvvb doog maadwn; hvbmabde bulv atwg mwwlwqkob nyib loqkam bulv pvvbv gaml jinam mam tadwn. Bulug pvvb dooma sujaqkam bulv atv sulak pvvbv.

¹⁵Bulug bonam nyinam mam kaab nyiloqkam pvvbv hognvkv bedwn ham bulug hang uraho xeqpwl ap pan hvb kaapa do. Bulug hang mwwnam mvkam soq si jvqtwngv hvl kaakin do. Hoggab bulug hang mwwnamv lokam, no nyixiaqpa hoo no kvtaq nyilaq pa hvl bedwn.

¹⁶Ngo nam Tugu Puiyam bekinam hvb Pwnbog nyi tulug hang uraho mwwsnam mwlwngam Jisu Kristog galoqkv hoq aalam pw-hwwtayin.

¹⁷Ho sija no Juhudi nyiib nyigam gab no atv Juhudi nyivk hvl no pvvbam hingw do, hoo no Pwnbog nyivk hvl atam xitor yaagub bedo.

¹⁸No cengdo hognvkam Pwnbov nam nyim dvb hengdvn hoo pvvb hoqgv hognvkv aldvn ham xuql naadwb cengm paku;

¹⁹no jvqtw jaqb nyiqca boam bool wg bov. Kan uraho doonbo tulu gab hutongv.

²⁰Damabo gab tomswr bov, hoo anyo bo gab biswrbov hvl hingxw cwrwto. No pvvb lo cenglaqnamv la jvqtwngv doodwn hvl mwwjw swwswl mwwgw do.

²¹No nyi asaqkam tomswr do, no atam hoggub tomswr swrma dvn, no bekin do, “Dvco maabv hvl” hvbmabde no atv dvco codwn?

²²No bedo “Nyiig nywxw-nyolam bwwxin maabv” hvbmabde no atv nyiig nywxw-nyolam bwwxin do? No murtiam haqdwn, hvbmabde no xumk nammam naalil dvco dvn yv?

²³No Pwnbog pvvbam tal bugil swwgam gab xitor gob mwwnbo, no Pwnbog pvvbam pvvb juqbol nyi tulungam Pwnbog ceebiob nyim dvn?

²⁴Dvrwqbo potangv bedwn, Juhudi nyi tulu nulug nyigam gab Nyoodo nyi tulungv Pwnbog eminam bec-beya bedwb nyidwn.

²⁵No pvvbam bugil swwb nyiloqkam noqg pepaql-mux mvnamv xidwb nyidwn, hvbmabde no pvvbam bugil tal swwma baloqkam, nam nywywngam pepaql-mux mvmanamv alv.

²⁶Hoqgab, pepaql-mux mvmanam nyi ak gon pvvb gamlam bugil pvvb nyiloqkam, soq pepaql-mux mvma bo ak sam pepaql-mux mvnbo gob bekram yv?

²⁷Nulam Juhudi nyi tulungam nyoodo nyiv yolu betayin. Hoggab no pvvbam xeqpwl aptvl hoo pepaql-mux mvtlakam pvvbam pvvb juqbo dvn, hvbmabde bulam gv vpam pepaql-mux mvma sujaqkam bulv pvvbam bugil swwdwn.

²⁸Hvb nyiloqkam hiyv jaq Juhudi nyi nyinbov mwv Juhudi loodarv pepaql-muxnam gab, pepaql-mux mvnam nyi vxiv Juhudi nyima dvn. Nyi kaagaho Juhudi nyi nyinbov mwv Juhudi loodar ma, hoo nyi kaaga lo gv ayaqkam pepaql-mux mvnamv hiyvkam pepaql-mux mvnam ma.

²⁹Hvbmabde hang uraho Juhudi nyiib nyinbo hoo hang urangam pepaql-mux mvnam ak hvvjaq lak loodarv, hoqhv Pwnbog yalwg bon nyinamv, hvbmabde xeqpwl apnam pvvbwb nyinam ma, mwam paqnamv nyi galoqkvma. Hvbmabde Pwnbog toloqgv.