Read Nyishi ROMAN 4 Bible Online

ROMAN 4 - Nyishi bible

ROMAN 4

¹Hvnyiloqkam ngulv ngulug at ab Abraham gv nwdam hog hvl betayin? Mwv hognvkv cengpanum?

²Mwwg nyis tulungam nyik hoqgv mwam Pwnbog lvgab kvtaq al dukub mvn mvnyiloqkam mwv atam paqs ak dookinpa, hvbmabde mwv atam Pwnbog agaho paqs dvb nyima.

³Dvrwq potangv bedwn, “Abraham Pwnboam mwwjwnum, hoo mwwg mwwjw ko-gab Pwnbov mwam dvrwqbo nyiv hvl loonum.”

⁴Bon nyinbo nyiam mwwg nyis tulungam nyijongam jigdvn, mwwg soq nyijo sam mwam hvb jinyi pan hvl bedwb nyima dvn; hvbmabde mwam si jidinv.

⁵Nyisam nyinam mam mwwgw maab hvbmabde mwam mwwjwto hiyv dvrwq maanboam dvrwq dvb mvdwn, mwwg mwwjwngam jvqtw dvb xitaq pakun.

⁶Nyis tulungam nyinam mam bepa maabjaq dvrwqbo nyivk hvl Pwnbov loonam hemp ponbo nyi akwg bvrwqngam Debid benum:

⁷“Nyimur kunam mam Pwnbov axia jinam nyi tulungv hemp ponam jaqkv, nyic nyinam mam apaq jiknam nyi tulungv hemp ponam jaqkv!

⁸Nyic nyinam mam xipa kuram hvl At Swg benam nyi tulungv hemp ponam jaqkv.”

⁹Debid soq hemp podynam sam pepaql-mux mvnam nyi tulu aro gab bitwqpan i? Ma, hvbma! Soq si pepaql-mux mvmanam nyi tulu gabkam doodwn. Hoqgab ngulv dvrwqbo potangam bepadvn, “Abraham Pwnboam mwwjwnum, hoo mwwg mwwjw ko-gab Pwnbov mwam dvrwqbo nyiv hvl loonum.”

¹⁰Soq si hwdlo nyinum? Abrahamnvn pepaql-mux mvma daab yv, mvxo kokw soi yv? Pepaql-mux mvma daab otuqho, kokw so ma.

¹¹Mwam kokw so pepaql-mux mvknum, mwam pepaql-mux mvnamv hoggab mvnum. Abraham mwwg mwwjwnam gab Pwnbov mwam dvrwqbo nyedar nyiv hvl kaakin dvb mwam pepaql-mux mvma daab loonum. Hoggab Abraham Pwnboam mwwjwbo mwlwg yvj yal abwb nyidwn, hoqgab mwwg galoqkv mwlwngam dvrwqbo nyiidar nyiv hvl bulam pepaql-mux mvma sujaqkam loopakun.

¹²Mwv pepaql-mux mvnam nyi tulug ab bokumb nyidkun, bulam pepaql-mux mvgam gab ma, hvbmabde bulv ngulug ab Abraham mwam pepaql-mux mvma taab swwnam hvbkalam mwwjwl swwgam gab nyidwn.

¹³Pwnbov Abrahamnvn la mwwg ko hosiq tulungam gvda gvt si mwwg gab dootayin hvl birnum. Soq birnam si Abraham pvvbam bugil swwgam gab ma, hvbmabde mwv Pwnboam mwwjw ko-gab la mwam Pwnbov dvrwqbo nyiidar nyiv hvl loogam gab nyinum.

¹⁴Pwnbov hognvkam birnum, ham pvvbam bugil swwnbo arongam jib nyiloqkam, ho nyiloqkam nyiig mwwjwnamv niqtuq dooma hoo Pwnbog birnamv kam xidwb nyima.

¹⁵Pvvbv Pwnbog haaxaqnam mam baqa dvn; hvbmabde hogloq ho pvvbv dooma dvn hoqho hiyvkam pvvbam pvvb juqbo maadwn.

¹⁶Birnamv mwwjwnam ho doogw dvn, ho birnam mam Pwnbog jinyinam lvqcv hvl pvvbam bugil swwn boam jitwq ma, Abraham gv mwwjwnam hvb mwwjwbo nyi tulungam ho Abraham gv ko hosiq tulungam mwlwngam jidub nyipa. Hoggab Abraham ngul mwlwg yvj yalwg abwb nyipa;

¹⁷dvrwqbo potangv bedwn, “Ngo nam nyob luuxy gab abwb mvpa kun.” Hoqgab birnamv Abraham gv mwwjwnam ho, Pwnbo sik boam turdkub mvnbo hoo gvda gvt so dooma boam doodwb gaml jilinbov Pwnbov.

¹⁸Abraham hingw ko doomako ho, mwwjw lvgab hingwnum, hoqgab mwv “Nyob luuxig abwb nyinum.” Dvrwqbo potangv benam hvbkalam “Noqg ko hosiv dumtwq miilyw tayin.”

¹⁹Abraham mwv lwwg svqtwqb axa kunum; hvbsujaqkam mwwg mwwjwnamv mwwg nyekam gv soodinam hvb anyo maanum, mwv sisv twqb nyis kujaqkam; hoq aoho Sara twrngumnum.

²⁰Abraham mwwg Pwnboam mwwjwnam mam apaq maanum, hoo Pwnbog birnam mam mwwjw maab nyimanum; mwwg mwwjwnamv mwam ator mvdwb jinum, hoo Pwnboam paqnum.

²¹Hoggab Pwnbov hognvkam nyidwb hvl birkunam mam ham nyiky tayin nvbo hvl mwv mwwjw swwswnum.

²²Hoqgab Abrahamnvn mwwg mwwjw ko-gab, “Mwam Pwnbov dvrwqbo nyiv hvl loopakun.”

²³Mwam dvrwqbo nyiv hvl loopakun hvl agam benam sam aro xeqp maanum.

²⁴Ngulug At Sw Jisu sinam hoqgv turabnam bon mwwjwbo nyi tulungam dvrwqbo nyiv hvl ngul mwlwngam loodynam mam ngul mwlw gab soq sam xeqpwl ap pan.

²⁵Ngulv nyic nyigam gab mwam sim dvb jipaqnum, hoq kokw so ngulam Pwnbog lvgab kvtaq alwb doom dukub mwam turdkub purab kunum.