Read Nyishi ROMAN 5 Bible Online

ROMAN 5 - Nyishi bible

ROMAN 5

¹Ngulug mwwjwnamv Pwnbog lvgab ngulam al dukub mvpa kun, ho ngulv sija ngulug At Sw Jisu Kristog galoqkv swrsomalongam kaapa pakun.

²Ngulv Kriston mwwjw ko-gab mwv ngulam sija mwwg dookub doodkub Pwnbog anya kob boanum. Hoqgab nulv hemp podwn. Ngulam kam Pwnbog yuukho yuutaq kodwb mwwjw dvn.

³Ngulug vs-axaq koolo ngulv hemp podwn, hoqgab ngulv cengdwn vs-axaqngv cwqnam mam dwr buqlin dvn,

⁴ho cwqnamv Pwnbog loodynam mam nyilin dvn, hoo Pwnbog loodynamv hingwnam mam nyilin dvn.

⁵Ho soq hingwnam si ngulam mwwrdvb jima dvn, hoggab Pwnbov mwwg ngulam abynam mam kaakin dvn ngulug hang ura si mwwg dvrwqbo Yalam jipa kun. Soq si Pwnbog ngulam jinyinam lvqcv.

⁶Ngulam kol otuqho svka bo dookmab laanyimab doodwkho, ngulug almab nyik gab Kristo ngul gab sinkun.

⁷Nyedarbo nyi ak gob nyitwl nyiv anyo go sidwn. Hvbmabde nyi albo nyi ak hvb nyitwl sidwb nyikam sudco.

⁸Hvbmabde Pwnbov mwv ngulam hog hwdgo abydvn ham ngulam kaakin pakun hoggab ngulv hvraqb nyic nyinbo nyiib nyil doos bakam Kristo ngul gab sinkun.

⁹Mwwg sik gab ngulv sija Pwnbog lvgab al dukun. Hoqgab mwwg haaxaqnam hoqgv ngulam ywwtayin.

¹⁰Ngulv Pwnbog ceebiob nyinum, hvbmabde mwv ngulam mwwg Ko Tuupv sik gab ngulv mwwg ajinb swwdkun. Ngulv sija Pwnbog ajinb swwdkun, ho mwv ngulam ywwt ywwtayin hoggab mwv simab doodo.

¹¹Hvvtwqma ngulam At Sw Jisu Kristo galoqkv Pwnbog ajin swwm dvb jigam gab ngulv Pwnboam hemp podwn.

¹²Nyiv gvda gvtwb nyi akin ciqnyi galoqkv nyicv haanum, ho mwwg nyicv hoq lvgab sigam haagnum, Hoq niqtuqkv sinamv nyiya kog nyob luuxig aoho jilwq kunum. Hoggab nyi mwlw jaqkv nyic nyinum.

¹³Pvvbv dooma daqdwk hoqgv gvda gvt si nyicv doonum. Hvbmabde pvvbv dooma gab nyic nyinam mam xipa dvb nyimanum.

¹⁴Hvbmabde Adamwg swwca dvk hoqgv Mojesg swwca dvk ho nagub nyi mwlwngv sidwb nyinum ho Adam hvb Pwnbog gamlam tamab nyimabo nyi mwlwngv sinum. Adam haata bo nyi ak hoqg nyuqtuq-moor hvb nyinum.

¹⁵Hvbmabde bunyiv aiyin ma, asaqkv; hoggab Pwnbog jinyinam lvqcv Adamwg nyic nyinam hvb nyimanum. Hvbmabde Pwnbog anyangv koi yaadwn, hoo mwwg jinyinam lvqcv nyi akin Jisu Kristo galoqkv hwdgo nyi mwlwngam jidub doodwn.

¹⁶Hoo Pwnbog jinyinam lvqcv nyi akin gonwg nyic nyinam pengko ho luusaq looda dvn. Ko hosiq nyi akin gon nyic nyigam gab “Nyimurnam mam”; pw-hwwnamv haanum. Hvbmabde Adam nyic nyixo kokw so mwam Pwnbov nyimur paku hvnum, hvbmabde nyi mwlwngv nyic nyixo kokw so Pwnbov mwwg anyangam bulam kaakin banv benum, “Nulv nyimur ma!”

¹⁷Soq si jvqtwngv nyi akin gonwg nyic nyigam gab nyi mwlwngv sidwb nyiknum. Nyi akin gonwg, Jisu Kristog nyinamv nyic nyinbo nyi akwg nyinam mam koi yaadwn. Pwnbog anyangam la mwwg dormo nyiib nyim dvb jinyinam lvqcnam mam kaapa bov mwlwngv nwrba cwtam swwgam Kristo galoqkv kaapa tayin.

¹⁸Nyi akin gon nyic nyigam gab nyi mwlwngv yolungam baqnam hvbkalam nyi akin gonwg dvrwqb nyik gab nyi mwlwngam tolin kunv swwgam jipa kun.

¹⁹Nyi akin gonwg Pwnbog benam mam pvvb juqbo ko-gab nyi mwlwngv nyic nyinbo gob nyiknum. Hvbkalam nyi akin gonwg Pwnbog benam mam tagam gab nyi mwlwngam Pwnbog lvgab al dukub mvdwb nyitayin.

²⁰Nyimur nyinam mam goopor mvdwb pvvbam mvlinum hvbmabde nyic nyinamv goolinum, ho Pwnbog anyangv ham koi yaab goopor kunum.

²¹Hoq hvb nyicv ator alnum, hoggab nyi mwlwngv sidwb nyiknum. Hoq hvbkalam Pwnbog anyangv ator aldvn; ho nyi mwlwngam Pwnbog lvgab al dukub ngulug At Sw Jisu Kristo galoqkv nwrba cwtam swwgam kaapa tayin.