Read Nyishi ROMAN 6 Bible Online

ROMAN 6 - Nyishi bible

ROMAN 6

¹Ho nyiloqkam ngulv hog hvl betayin? Pwnbog anyangam goopor mvdwb hvl ngulv nyic nyidul hvraqb dootayin?

²Ma, hvb yooju; Ngulv sipekun hvb nyic hoqgab nyidkun. Hvb nyid kuloqkam ngulv hoggub nyil hvraqb nyic nyidul dootayin?

³Nulv jvqtw jaqb sam cengdo mwlwngv baptijum naadwkho ngul mwlwngam Jisu Kristog lvgab mwwg sinam hoqg lvgab baptijum jitaq kunum.

⁴Ngulug baptijum naanamv hvbaloqkam ngulam kam mwwg lvgab sipa kun ho nyubu hoo ngulam svma liitaq paku, ho Kriston sinam hoqgv atwg ator yuunam atorv mwam turkur dukub mvnam hvbkalam ngulvkam nit swwgam kaapal swwdwb nyitayin.

⁵Ngulv mwwg lvgab akin gob nyidwn mwwg sinam lvgab simin gvpa kuloqkam, hoq hvbkalam ngulv kam mwwg lvgab akin gob nyil mwam sinam hoqgv swwgab turab mvknam hvb ngulv kam swwgab turab taikun.

⁶Ngulv sam cengdwn, ngulv kolwg otuq hoqg hangam Kristog lvgab daapo aotv ngulug nyic nyinam turdkub hvl ho nyicig nyerab ngulv swwma dukub hvl mengxa kunum.

⁷Hoggab nyiv sixo kokwngam mwv nyicig alaq ator hoqgv lengd kun.

⁸Ngulv Kristog lvgab sibapak nyiloqkam ngulv mwwjw dvn ngulv kam mwwg lvgab dooba tayin.

⁹Hoggab ngulv sam cengdwn, Kriston siknam hoqgv turdkub mvknam hoqgab mwv nywywngam lokta sitin takma. Sinamv mwam sija mwwg aoho hog mvdwb ator dookma.

¹⁰Mwv siknum ho nyicv mwwg aoho alaq idaqsv dook maanum, hoggab mwv soq sam lvkin ciqnyi gob nyiyum pakun, Sija mwwg swwg dvnhv mwv Pwnbo gab swwd kun.

¹¹Hoq hvbkalam nulvkam nyic gab sidkun hvb nyidwn hvl mwwdwb nyido, hvbmabde Jisu Kristog ho Pwnbo gab turl doodwn.

¹²Hoqgab mwlwngv nyicig alaq uraho doomabv. Ho hangwg mwwlwqkob nyim dvb jimab.

¹³Ho nulug gv vpam alman nyicam nyin dvb jimabv. Hvbmabde nulv atam sinam hoqgv swwgwb boolin kunam nyi hvb ngulug gv dorpwngam Pwnboam jito ho mwam mwwg dvrwqbo pagoq gab nyin mvto.

¹⁴Nulv nyicig alaq niikum ho doodwb nyik maadkun; ho pvvbwg alaq hookam nulv dooma dukun, hvbmabde Pwnbog anyanam uraho nulv doodkun.

¹⁵Hvnyiloqkam hognvkam? Pvvbwg alaqho doomab Pwnbog anyako alaqho doogam gab ngulv nyic nyitayin yv? Hoggub nyilakam hvvma!

¹⁶Hoggab nulv sam cengdo, nulv atam nyi ak gonwg dookho swwtayinwk hvl beikam, nulv jvqtw jaqb at ak hoqg nyerab nyidkun. Ho nulv nyicig benam mam taab nyiloqkam sigv, hvbmab Pwnbog benam mam taab nyiloqkam nulam Pwnbog lvgab al dukub mvtayin.

¹⁷Hvbmabde Pwnboam paqdwb nyipa. Hoggab nulv mood golo nyicig nyerab doonum, hvbmabde sija nulv hang ura hoqgv tomswrnam hoqg jvqtwngam nulug kaapa kunam mam bugil swwdo.

¹⁸Nulam nyicig alaq hoqgam Pwnbov naalin kunum hoo nulv sija nyedarbo nyiig nyerab swwd kun.

¹⁹Nyiv looxiam bicwngam bekinam ngo nulam bedwn hoggab nulug gv soodinv atorma. Nulv otuqho atam nyera hvb nyil kacbo gob la hog mwlw almanbo pagoq gab atam twrmab jipaq kunum hoq hvbkalam nulv sija atam nyera hvb dvrwqbo nyi swwdwb dvrwqbo pagoq gab atam twrmab jipaq tuku.

²⁰Nulv nyicig nyerab doodwkho, nulv dvrwq nyiib nyinam hoqgv aado ho doonum.

²¹Hvnyiloqkam, nulv sija hvnyw-har gob nyig nadwb bon ham nyidwkho nulv hognvkv kaapanum? Hoq torab ham nyinam niqtuqkv sinamv.

²²Hvbmabde nulv sija nyic nyinam hoqgv aado dukun hoo Pwnbog nyerab nyidkun, hoqham nyigam gab nulv mwam nulug swwnam mwlwngam jipaq paku hoo kuiyum mam nulv nwrba cwtam swwgam kaapa tayin.

²³Hoggab nyic nyinam niqtuqkv sigv hvbmabde Pwnbog jinyinam nwrba cwtam swwgam At Sw Kristo Jisu galoqkv kaapa dvn.