Read Nyishi ROMAN 7 Bible Online

ROMAN 7 - Nyishi bible

ROMAN 7

¹Ngoqg vbw-bor tulu, ngo nulam hognvkv betadvn ham nulv cengdo, hoggab nul mwlwngv pvvb pagoqkam cengdo. Pvvbv nyiam simab swwl doody deedib nyiig aoho atorv doodwn.

²Nyem naaknamv mwnwg nyegangv simab doody deedib mwwg benam mam tadwb pvvbv doodwn, hvbmabde nyegangv sixo kokwngam nyemv mwnwg nyega lvgab doom dvb mwnwn pvvbv nootul apnam hoqgv mwn lengd kun, ho pvvbv mwnwn liitu nyoma dvn.

³Hoqgab mwn nyega akgonwg lvgab mwnwg nyolam doom tvl dooba baloqkam mwnwn nyol bwwxinbo nyemvk hvl bedwb nyitayin. Hvbmabde mwnwg nyegangv sixo kokwngam mwn mwnwg mwwkub nyidkub pvvbv doodwn, hoo mwn nyega asaq ak nyol bob nyiilo mwn yocu-yabio nyima dvn.

⁴Ngoqg vbw-bor tulu, nulvkam soq sam nyidwb nyiky dvn. Pvvbam hinglwq yukam, nulvkam sipa kun hvb nyidwn. Hoggab nulv Kristog pacgon hvb nyidwn, ho nulv sija sinam hoqgv turdkub pwrabnam nyi ak hoqhvb nyidkun; hoo ngulv Pwnbo gab la albo bonam nyil swwdwb doodwn.

⁵Ngulv nyia kog swwcwb swwl doodwkho pvvbv ngulug gv soodinam nyic nyim dvb jinum. Hoo sigam dwr buqlinum.

⁶Hvbmabde sija ngulv pvvbwg alaqho dookma, hoggab otuqho ngulam nyumwb leel doogbov ngulam sija hog mvnyi kuram, ngulv mwwg kaagaho sidkun hvb nyidwn. Sija ngulv otuqg nyinam hvb kokwg xeqpwl apnam pvvbv gaml jinam hvb pvvbv nyima dukun, hvbmabde yal nit lamtangam kaakin kob swwdkun.

⁷Hvnyiloqkam ngulv hog hvl betayin? Pvvbv nyicv i? Ma, hvbma! Pvvbv ngam nyicv hog nvkv ham ngam cengdwb jinum. Hoggab pvvbv, “Kaaby maabv,” hvl bekin maloqkam kaabynamv hognvkv ham ngo cengram.

⁸Nyicv ngam hog dvdy luuxy mwlwngam kaaby mvdwb ngoqg hangam kaaby mabwk hvl betwl ngam nyic nyim dvb jinum. Pvvbv dooma loqkam nyicv mwwg swwk ator dooram.

⁹Ngo otuqho pvvbv dooma jaqkam vpwb swwnum. Hvbmabde gamlv haaxo kokw so nyicv swwrab kunum,

¹⁰hoo ngo siknum. Birnam gamlv ngam swwgam jidwb nyinum, hvbmabde ngo sigam ya kaakinum.

¹¹Hoggab nyicv birnam gaml hoqgv ngam xaalyo lyodwb pagoqkam biyuq banv gamlam betaql ngam nyicv mengnum.

¹²Pvvbv dvrwqdvn, ho gamlv kam dvrwqdvn, kvtaqdvn hoo aldvn.

¹³Hvnyiloqkam albov ngoqgab sigam baqapan hvl i? Hvbma! Nyicv alboam bon nyigwnal soq sam nyinum. Nyicv ngam sidwb jinam hv nyiloqkam nyicv hoggub nyidwn ham jvqtw jaqb kaakin dvb sulak nyinum. Hoqgab birnam gaml gab nyicv otuqgam sija koi yaab nyic-nyiab nyinkun.

¹⁴Ngulv cengdwn pvvbv Pwnbo jinamv, hvbmabde ngo sinbo nyiv ho ngo nyicig alaqho nyerab pwnam nyiv.

¹⁵Ngo hognvkam nyidwn ham ngo cengma, hoggab ngo hognvkam nyidwb mwwdwn ham ngo nyima, hvbmab hognvkam ngo oyum dvn ham nyidwn.

¹⁶Ngoqg nyib mwwnam mam ngo nyimanamv ngo pvvb kvtaqdvn hvl ngoqg loonam mam kaakin dvn.

¹⁷Hoqgab soq sam nyinbo akv jvqtw jaqb ngo nyima, hvbmabde nyicv ngoqg urasi dootwl sam nyidwn.

¹⁸Ngo cengdwn ngo nyiib nyigam gab ngoqg uraso hog albo dooma dvn. Hoggab ngo albo bonam ngoqg hang urasi nyib mwwjaqkam ngo ham nyiny ma.

¹⁹Ngo albo bonam nyidwb mwwnam mam ngo ham nyima, hvbmabde alman boam ngoqg nyidwb mwwmanam mam ngo nyidwn.

²⁰Noqg nyib mwwmanam mam ngo nyib nyiloqkam hoqham nyinbo akv ngo ma, hvbmabde ngoqg uraso doonbo nyicv ham nyidwn.

²¹Hoggab ngo pvvbam bon nyidul doonam mam kaapa do. Ngo albo bonam nyidwn mwwikam ngo almanbo yaangam nyidwb xuqkub dvn.

²²Ngoqg hangv Pwnbog pvvbam hemp mwwpa dvn.

²³Hvbmabde ngo kaanamv ngoqg hang urasi pvvb aro go bon nyidul doodo ho ngoqg hangv loonam pvvb akwg lvgab paiyaq mins dvb urasi bon nyidul doodo.

²⁴Oa ngo hognvk hingmuram hengn bo nyiv yu? Hiyv ngam soq sig ung soqgv vp sam ywwd bov?

²⁵At Sw Jisu Kriston hentaql ngam ywwnbo Pwnboam paqdwn. Ngo soq sib nyil ngoqg Pwnbog pvvbam ngoqg hang arongv hoo nyia kog nyicig pvvbam ngo tal swwdwb nyipku.