Read Nyishi ROMAN 8 Bible Online

ROMAN 8 - Nyishi bible

ROMAN 8

¹Kristo Jisug lvgab mwwg uraho guugabl doonbo nyi tulu gab sija bulam yolu bes dookma.

²Hoggab yalwg pvvbv ngulam Jisu Kristog lvgab mwwg uraho doogam gab ngulam swwgam jipa kun. Soq si ngulam nyic hoqgv la sig ung hoqgv naalin pakun.

³Pvvbv mvnyi kumanam mam Pwnbov mvknum. Hoggab nyia kog ator doomanum mwwg Ko Tuupam nyi nyip gob mvtkul mwv kanamnum, ho ngulug nyic nyib gv hvbkalam nyitkul ngulug nyicam naaxatab haanum.

⁴Pwnbov soq sib nyinamsi hvb loqkam pvvbwg nyera jaqb daagab lalal nyia kov nyinam. Hvbmabde yal haal uraho doonbo nyi tulug ko gab nammam hang xumdwb nyidwb mwwl nyinum.

⁵Nyia kog hangwg mwwcwb mwwl swwnbo nyi tulungv bulv bulug hangam nyia kog hang mwwcw mwwnam alaqho doodwn. Hvbmabde hiyvg nyiv yalwg benam mam tal swwn bov bulv yalwg mwwlwqkob doodwn.

⁶Nyia koog nyij-muj lvgab mvturnam niqtuqkv sigv; Yalwg lvgab mvturnam niqtuqkv swwgv la swrsomalongv.

⁷Hoggab hiyv nyiv atwg hangam nyia kog nyicwb mwwnbo nyi ak hv Pwnbog ceebiob swwdwn, hoggab mwv Pwnbog pvvbam tal bugil swwma dvn, ho bitwjaqb beb nyiloqkam mwv sam bugil swwnyi maadwn.

⁸Ho nyia kog mwwcwb mwwnbov bulv Pwnboam xumdwb hog nyinyi maadwn.

⁹Hvbmabde nulv nyia kog hang bvqcwb baql hoqg benam mam tama dvn. Hvbmab nulv yalwg bekwb tal swwdwn, ho jvqtw jaqb nulv Pwnbog yalwg uraho doodwn. Hiyv nyiv Pwnbog Yalam doog maadvn mwv Kristo gab dooma dvn.

¹⁰Hvbmabde nulug hang uraho Kristo doob nyiloqkam nulug gv vpv nyic nyigam gab sik jaqkam Yalv nulgab swwgv. Hoggab nulam Pwnbog lvgab al dukub mvpa kun.

¹¹Jisun sik boam pwrabo Pwnbog Yalv nulug uraho doob nyiloqkam Kristo sik boam turdkub pwrabo akv nulug sidbo gv vpam mwwg Yalv uraho dool nulam kam swwgam jitayin.

¹²Hoqgab ngoqg vbw-bor tulu, nulug nyis ak doodwn, hvbmabde ngulv ngulug nyia kog hangwg mwwcwb mwwl swwdwb nyima dvn.

¹³Hoggab nulv nyia kog hang mwwcwb mwwl swwb nyiloqkam nulv sitayin; hvbmabde yalwg hang bvqcwb baqb nyiloqkam nulv nyicig bon nyinam mam mengxa tayin, hoo nulv swwtayin.

¹⁴Pwnbog yalwg alaqlo doon bov bulv Pwnbog ko tuupwb nyidwn.

¹⁵Pwnbog nulam yal jinam hv nulam nyera swwm dvb mwwma dvn, hoo nulam bos mvdwb jima dvn, hvbmabde hoq yal hv bulam Pwnbog ko tuupwb swwm dvb jidwn, hoo yalwg ator jigam gab nulv Pwnboam “Ngoqg Aba” hvl bedwn.

¹⁶Pwnbog Yalv nulug yalwg lvgab mwv atv dooba banv ngulv Pwnbog kob nyidkun hvl mwv ngulam bekin dvn.

¹⁷Ngulv mwwg kob nyigam gab mwv nyi tulungam apnam lvqc cam ngulv kaapa tayin. Ho Kristog lvgab ngulv kam mwwg gab jinam lvqcnam mam Pwnbog galoqkv kaapa tayin. Hoggab ngulv Kristog lvgab mwwg hinglwq hengnam mam hemba baloqkam ngulv kam mwwg lvgab ngulam yuunam mam kaapa ming tayin.

¹⁸Ngo apo soqg hentwr henam sam kuiyum mam ngulam kaakin dvb yuudynam lvgab akukam dooc dvb nyima dvn hvl ngo bedwn.

¹⁹Gvda gvt soqg pwnam hoolu mwlwngv Pwnbov mwwg Ko Tuupam kaakin deenam mam kvvnwb mwlw jaqkv kaayal doodwn.

²⁰Hoggab pwnam mwlwjaqkam xima dukub mwwknam si bulug mwwkub nyima, hvbmabde Pwnbov soq sam sib nyim dvb mwwnum, hvbsujaqkam hingw sv ak doonum.

²¹Pwnam si mwwg nyerab swwnum, hoqgv aal golo naalin taikun, ho mwv Pwnbog ko tulug lvgab yuumanam vrram yuunam gumnam bwwbatayin.

²²Hoggab ngulv cengdwn soolog aal so pwnam mwlwngv cinc cinbo hvb vcv cil sigin ginl doodwn.

²³Hvbmabde pwnam aro ngvtwqma, ngulv Pwnbog otuqcob jilwl jinam Yalam doog nyiabnv mwlwngv ngulug atwg hang uraso Pwnbov ngulam hwdam mwwg ko tuup acam gob mvtayin ho ngulam gv dorpwngam naalin tayin ham ngulv kaayal sigin gindul doodwn.

²⁴Hog akjaq ngulv hingw ko-gab ngulam ywwnum, hvbmabde ngulv hog nvkam vnyiqkv kaapanam ham hingw baloqkam hoqhv jvqtw jaqb hingwnam ma, hoggab hiyvkam vnyiqkv kaapanam mam akukam hingw maadwn.

²⁵Hvbmabde ngulv kaapa maanam mam hingw baloqkam ham ngulv cwql kaayal doodwb nyidwn.

²⁶Hoq hvbkalam Yal lo ngulv ator maaikam ngulam svka taab haadwn. Hoggab ngulv xumnam ngam hoggub mvtayin ham ngulv cengma. Hvbmabde Yalv ngulug pagoq gab mwv Pwnbog lvgab agam belaqmanam bvrwqngam joojdvn.

²⁷Nyi mwlwg hang urangam kaapa bo Pwnbov, mwv cengdwn Yalv hognvkam mwwdwn hoggab Yalv Pwnbog mwwg nyi tulug bid gab mwv Pwnbog lvgab mwwg mwwlwqkob bijdvn.

²⁸Hoggab ngulv cengdwn hog mwlw nyitaqlo Pwnbov mwwg pagoq gab goqknam, mwam aby bon boam mwlwngam albo bonam nyidwn.

²⁹Ho Pwnbov xuqknam nyi tulungam mwv mwwg ko tuup gon xuqnam hvb oksub xuqlin ap pakun, ho ko tuupam mwlwg vbw-bor tulungv lengma daab lengco mvdwb nyitayin.

³⁰Hoo Pwnbov mwwg goqxuqb kunam nyi tulungam mwv oksub ap pakun, ho bulam Pwnbov mwwg lvgab al dukub mvpa kun. Mwv bulam mwwg lvgab al dukub mwtwq ma hvbmabde bulam mwwg yuunam mam mwwg lvgab yuutaq mvdwb jipa kun.

³¹Soq mwlw nyinam sam kaapa tvl ngulv hog hvl betayin? Pwnbov mwwrwl ngulug nyemaqb swwb nyiloqkam, hiyv ngulam ceebio baqdy bov?

³²Mwv atwg Ko tuup akinam kam tumab pvvkur maanum, ho ngul mwlw gab jinum. Mwv atwg Ko Tuupam jinbov mwv ngulam hog mwlwngam mwwtaqb jinyiram i?

³³Pwnbog xuqnam nyi tulungam yolu bedybov hiyv? Pwnbov mwv atv bulam nyimur mapan hvl bedwn.

³⁴Hiyvg nyiv bulam yolu bedybov? Kristo Jisu lok sinbo akv ho swwgab purab kunam akv, mwv sija Pwnbog alaq lvqbwq taqc tv doodwn, mwv Pwnbog lvgab ngulug pagoqkam gooj dvn.

³⁵Hvnyiloqkam hiyv ngulam Kristog abynam hoqgv boopin boora nyotayin? Vs-axaq yaangv yv, mwwdwqnam yaangv yv, mvnyi-mviyanam yaangv yv, dwr kano hentwr yaangv yv, jwwgw homa yaangv yv, sig dorg yaangv yv, ho sinam yaangv yv, ngulam Jisu Kristo galoqkv boopin boora nyotayin?

³⁶Dvrwqbo potangv bedwn, “Noqg gab ngulv aal loopwngam sig ubu ho doodwn, ngulam pata kunam sviya ko hvb nyidkun.”

³⁷Kaato soq mwlw si ngulam aby bonbo galoqkv ngul mwlwngam mviyanam hoggv mviya pakun.

³⁸Hoggab ngo hingxw cwrwl cengdwn. Hiyvkam ngulam aby bonbo ngulug At Jisu Kriston hentaql ngulam Pwnbog galoqkv boopin boora nyoram.

³⁹Ngo hingxw sudwn hiyv ngulam mwwg abynam hoqgv boopin boora nyoram; sigv kam, dorgv kam, ao gvdangv kam, oram nyookv kam, pwnam mwlwg pengko hoqgv hog akukam ngulam Pwnbog abynam At Sw Jisu Kriston hentaql jinam hoqgv boopin boora nyoram.