Read Nyishi ROMAN 9 Bible Online

ROMAN 9 - Nyishi bible

ROMAN 9

¹Ngoqg beg dvn si jvqtwngv; ngo xaalyo maadwn hoggab ngo Kristo gab dood kun, Dvrwqbo Yalwg alaqho doonbo ngoqg hangv kam ngam xaalyo maadnvk hvl bitwl bekin dvn.

²Ngoqg hangv mwwdwq aldo hwdjaqgo nyi tulu gab hang vc do.

³Ngo bulug pagoq gab ngo atam Pwnbog benam hvb hoo Kristo galoqkv boopin kunam hvb mwwdo.

⁴Bulv Pwnbog xuqnam nyiv, mwv bulam mwwg ko tuup gob mvnum ho mwwg yuunam gumnam mwwg lvgab bwwba mvdwb jinum. Mwv bulug lvgab mwwg goornam mam hoo mwwg pvvbam bulam jinum, ho bulug xuqnamv jvqtwngv; bulv Pwnbog birnam mam kaapanum.

⁵Bulv kolwg at ab tulug ko hosiqkv, ho Kristo nyia kob nyigam gab bulug nyobub nyidwn. Kuiyum godab ngulam kaaya bo Pwnboam nwrba gob paqnka! Amen.

⁶Pwnbov birnamv niqtuq lengkma, hvl ngo bema, hoggab Israel nyi tulu mwlwngam Pwnbov xuqnam nyi ma.

⁷Ho Abraham gv ko hosiq mwlwngv Pwnbog kob nyitayin hvl Pwnbov bemanum; hoggab Pwnbov Abrahamnvn benam, “Aisak gv ko hosiq arongv noqg ko hosiqb nyitayin.”

⁸Soq beg dvn si hvl bedwn, ko bwwcwb bwwnam ko tulungv Pwnbog kob nyima dvn hvbmabde Pwnbog birkob ko bwwnam tulungv jvqtw jaqb Pwnbog kov.

⁹Hoggab Pwnbo hvl benum, “Ngo mood jaqkam hookur tayin hoo Sara nyega ko ak dootayin.”

¹⁰Hoo siitwq ma, Rebekkag nyega ko vnyiv kam ab akin hoqg kov; bulv ngulug at ab Aisak gv kov.

¹¹Pwnbo ko tuup akin xuqnamv lokam Pwnbo atwg pagoq dootwl xuqdub nyikam subaco. Pwnbov soq sam bulam ko bwwma daab hog nvkv alv korv ham cengma daab benum, soq si bulv hog nyis ak nyigam gabma, hvbmabde hog mwlw nyinamv Pwnbog mwwg mwwlwqkob nyiam gaqnam gab nyidwn-

¹²Pwnbov Rebekanvn benum, “Vbw akv bor akam bon nyijtayin.”

¹³Dvrwqbo potangv xeqpwn. “Ngo Jakubnvn abynum, hvbmabde Isunvn oyumnum.”

¹⁴Hvnyiloqkam ngulv Pwnboam kvtaq maadvn hvl betayin? Hvb bedwb nyima.

¹⁵Hoggab mwv Mojes benum, “Ngo anya dvb mwwnam mam nyiam anya tayin,”

¹⁶Hoqgab Pwnbov nyiam xuqnamv nyiv hog nyiib mwwgam gabma, hvbmabde hog nyigam gab kama, hvbmabde Pwnbo anyangam kaakin ko bvrwqgab nyidwn.

¹⁷Hoggab dvrwqbo potangv bedwn, Paronvn Pwnbov benum, “Ngo nam ngoqg atoram kaakin dvn hoo ngoqg eminam noqg galoqkv gvda gvt soqg nyi tulungam tapal jim dvb ngo nam lvpw at mvnum.”

¹⁸Hoqgab Pwnbov nyi dama nyiam anya dvn, hoo hangam vdw dvb mwwnam mam vdw dvb mvdwn.

¹⁹Nulug pengko hoqgv akin tox tayin, “Hvb nyid nyiloqkam Pwnbov hoggub nyil nyiam nyixiaqnam mam kaapa nyotayin? Ho Pwnbog mwwnam mam hiyv mvtur nyotayin?”

²⁰Ngoqg ajin tulu, “Pwnboam goorwq deebv hiyv nulug pengko ho doodwn? Deekam pwcwngv mwam pwnbo nyi akam, “No ngam hoggub soq sib mvpan hvl tox maadwn?”

²¹Hoggub nyilakam deekam pwcw mvnbo nyi akv suiyungam mwwg mwwlwqkob mvdwb atorv doodwn, ho deekam olum lumkin hoqgv pwcw xinam gola ximanam pwcw cwnyigo mwwg mwwlwqkob mvlin dvb nyidwn.

²²Pwnbov hoq hvbkalam jvqtw jaqb nyinum, mwwg haaxaqngam mwv kaakin tvl mwwg atoram nyi tulungam cengm dvb jidwb mwwnum. Hoqgab mwv cwql mwwg haaxaqngam nyi tulungam mwx-mvaql twrta kunam hoq nyi tulu ham himwl doonum.

²³Hoo mwam hog hwdwg yuudub nyidwn ham anyangam kaakin dvb mwv ngulam mwwg yuunam mam jinum hoq nyi tuluhv mwwg anyangam kaakin dvb pwr rwl apnam nyi tulungv.

²⁴Hoqgab ngulv mwwg goqnam nyiv, Juhudi tulug pengko hoqgv twqma hvbmabde nyob luusaq nyi tulu pengko hoqgv kam goqnum.

²⁵Soq sam Hosiyag potalo benum: “Ngoqg nyiib nyimabo nyi tulungam, ngoqg nyivk hvl betayin. Ngo aby kumanam nyobam, ngoqg hang biinam nyobv hvl betayin.

²⁶Hogloq kedho bulam Pwnbov nulv ngoqg nyi ma hvl benum, hoq kedho Pwnbov bulam nywywngam sima bo, Pwnbog ko tulungv hvl bulam betayin.”

²⁷Aijaya Israel nyi tulug pagoqkam benum, “Israel nyiv swnyiq bviywrho xuqx hvb jaqt sujaqkam bulam anyo gon ywwdwb nyitayin,

²⁸hoggab At Sw gvda gvtwg xisam nyiqyab kama dab xidwn.”

²⁹Soq sam Aijaya otuqho benum, “At Sw albo atwb nyil ngulug ko hosiq tulungam ap pvvkur maloqkam ngulv Sodom la Gomorra hvb nyik banpv,

³⁰Ngulv soq sam hvnyiloq hog hvl betayin? Pwnbog lvgab al dukub atam mwwma bo nyoodo nyi tulungv bulug mwwjw ko-gab bulv Pwnbog lvgab al duku;

³¹hoq hvb xuqdumnam nyobv pvvbam meegaql pvvb galoqkv Pwnbog lvgab al dukub mwwnbov ham kaapa kuma.

³²Hoggab kaapa kuma? Soq sib nyiknam si hvbloqkam, bulv mwwjwnam mam hingw maab bonam nyinam mam hingw ko-gab nyinum. Bulv duqtubl geqk wlw ho duqtubl geqknum.

³³Dvrwqbo potangv soq pagoq sam bedwn: “Kaato, ngo Jaiyon ho nyi tulungam duqtubl geqm dvb wlw pwg ap pan, lwwn pwg bulam duqtubl geqm dvb ap pan. Hvbmabde mwam mwwjwbo nyi akv nywywngam hvnyw dvb nyiram.”