Read Nyishi 1 KORINTI 1 Bible Online

1 KORINTI 1 - Nyishi bible

1 KORINTI 1

¹Pwnbog mwwlwqkob xuqlin kunam Jisu Kristog Tugu Puiyam bekar mvdwb xuqdumnam ho ngulug bor Sostenes galoqkv-

²Korinti ho doonbo Pwnbog ho Jisug eminlo dvrwq dvb nyedar darxaq kunam, Kristog dvrwqbo nyi tulu, ngulug la bulug At Swb nyinbo At Sw Jisu Kriston xumn bo nyi tulu gab-

³Ngulug Ab Pwnbog galoqkv la At Sw Jisu Kristo galoqkv nulgab anyangv la swrsomalongv doonka.

⁴Ngo looxiam Pwnboam Jisu Kristog emin gab nulam anyangam jigam gab paql doodwn.

⁵Hoggab Kristog lvgab nulv lokub doogam gab sija nulv hog mwlwho, nyijwq-nyegam bek pagoqho hoo bvrwq bek gab pwbw nyiadku.

⁶Kristog tugu pui bvrwqkam bejaqkam nulug pengko ho hindy jaqb ogungv guugab paku ho

⁷nulv hogloq pagoq hookam nulv Pwnbog lvqc cinam mam kaapa maab nyimab, At Sw Jisu Kristog haad aal nagub kaayal doodo.

⁸Mwv nulam biim maab dvrwqjaqb ngulug At Sw Jisu Kristog Aalam hog kac-kanyiaqgo nulug gv ho dooma dvb nyedar darxaql ap jitayin.

⁹Pwnbov mwwgw dvb nyidwn. Pwnbov lak nulam mwwg ko tuup ngulug At Sw Jisu Kristog lvgab lokub dooba mvdwb dvgoq goqnbov.

¹⁰Ngoqg vbw-bor tulu, ngulug At Sw Jisu Kristog emin gab ngo nul mwlwngam xuml bedwn, nulug pengko lo akwn akwn benam mam tvlwq minsul swwto, hvb nyibaloqkam nulug pengko lo hang pwsaq baqk pagoq dooram. Mwlwngv hang pwkin gob mwwg dvl, mwwnam akinam mwwiyin gvdwl pagoq goqkinam mwwgab nyiato.

¹¹Hoggab Klos imiq hoq nyi tulungv ngam nulug puiyam hindy jaqb tvbw hwrw dvb baqtampa, ngoqg tapanamv nulug pengko lo yolu paiyaq mins nyiadwk hvl tapa gvdo.

¹²Nulug vxiv ok oksub bedwk hvdo, “Ngo Poul gv,” hoqgv akgonwg begamv “Ngo Apollo gv,” akgonwg begamv “Ngo Pitor gv,” hoqgv akgonwg begamv, “Ngo Kristogv.”

¹³Kriston hoggub dvpar asaq asaqb mvgyin! Poul i nulgab daapo ao tol sinum? Poulwg emin lo i nulam baptijum jinum?

¹⁴Ngo Pwnboam paqdwn, ngo hiyv nvkam Krispasnvn la Gaiusg aoho baptijum jima.

¹⁵Hoqgab nulug pengko ho hiyamkam ngo Poulwg baptijum jinamv hvl bedwb nyiram.

¹⁶(Koxee mwwpa kumab Istepanaswg la mwwg imiq nyi akamrub ngo baptijum jinum. Soq aoso ngo hiyv nvkam baptijum jitnvbo hvl mwwpa ma.)

¹⁷Kristo ngam baptijum jitak hvl kanam maanum; hvbmabde mwv ngam Tugu Puiyam bekin mvdwb kanamnum. Ho Tugu Pui betaqho nyi asaqg benam hvb nyijwq-nyegam cingngwr-cingtwrbo nyi hvb agam gooma bvk hvl benum, ho Kristog daapo ao tol sinam ator bvrwqngam niqtuq dooma dvb bema bvk hvl kanam pan.

¹⁸Hoggab yuupaq kunbo nyi tulu gab Kristog daapo aoho sinam pui si niqtuq dooma dvn, hvbmabde ywwknam nyi tulu gab la ngul gab soq pui si Pwnbog atorv.

¹⁹Hoggab dvrwqbo Potangv bedwn, “Ngo nyijwq-nyegam belaqbo nyi tulug ho poory rilaqbo nyi tulug cenglaqnam mam ngo twrm tayin.”

²⁰Hvnyiloqkam nyijwq-nyegam atv hoglo doon kun? Cenglaqbo nyi tulungv hoglo? Gvda gvt soq nyegam belaqbo nyi tulungv hoglo? Pwnbov soq gvdag nyi tulug nyijwq-nyegam mam dama paca gob bedwn.

²¹Pwnbov mwwg cengnam mam nyia koam mwam cenglaq mvma dvb mvnum. Hvbmab “Niqtuq doomabo” ngulug tugu pui bekinam soqgv Pwnbov mwwjwbo nyi tulungam ywwdwb hvl bibwq kunum.

²²Juhudi tulungv swrdorxeqb nyil kaakinam mam meegaq dvn, ho Gwrik nyi tulungv nyijwq-nyegam mam meegaq dvn.

²³Hvbmabde ngulv daapo ao tol mengknam Kristog puiyam dukar dvn, soq pui si Juhudi tulu gab yolu puiyv ho Nyoodo nyi gab damabo puiyv.

²⁴Hvbmabde Pwnbov dvgoq goql xuqlin kunam nyi tulu gab, Juhudi ge, Nyoodo nyi ge soq si Kristog puiyv, Pwnbog atorb la mwwg cenglaqnamv.

²⁵Pwnbog damanamv nyia kog cenglaqnam mam koi yaadwn, ho Pwnbog ator maab nyinamv nyia kog ator tornam mam koi yaadwn.

²⁶Ngoqg vbw-bor tulu, Pwnbov nulam goqma daqdwk otuqho hoggub swwl doonum ham mwwpa kaato, nulug pengko hoqgv nyiv anyo yaagwn nyijwq-nyegam nyiib ho atorbo nyiib, ho lvpwlo swwn geenbo nyiib nyia ko vnyiq kaagaho nyinum.

²⁷Pwnbov gvda gvtwg nyi tulug vnyiq kaagaho damabo nyiam damnbo nyi tulungam hvnyw nyipa mvdwb bulam xuqnum; hoqgv gvda gvtwg vnyiq kaagaho ator dooma boam ator doonbo nyi tulungam hvnyw nyipa mvdwb mwv ator doomabo nyi tulungam xuqnum.

²⁸Pwnbov gvda gvtwg vnyiq kaagaho kaanyi taiyanam ho mvnyi-mviyanam ximanam nyiam gvda gvtwg xinam nyi tulungam domyu mvdwb xuqlinum.

²⁹Soq sib nyinam pagoq si nyiloqkam hiyv nvkam Pwnbog kaagaho xitor gob mwwm mvma dvb nyipan.

³⁰Hvbmabde Pwnbov nulam Jisu Kristog lvgab lokub dooba mvdwb jipa ku ho Kriston ngul gab nyijwq-nyegam cenglaqnan ann gob mwj paku. Mwv ngulam Pwnbog lvgab al dukub mvpa kun. Ngulv sija Pwnbog dvrwqbo nyi tulu gob nyidkun. Ho ngulv nyet nyi gob nyidkun.

³¹Dvrwqbo Potangv bedwn, “Hiyv nyiv paqs dvn hoq nyi ak hv At Swn pvqgw gvdwl paqdwb nyidwn.”