Read Nyishi 1 KORINTI 10 Bible Online

1 KORINTI 10 - Nyishi bible

1 KORINTI 10

¹Ngoqg vbw-bor tulu, Mojesg kokwb wnbo ngulug ab-ann tulungv hoggub nyiknum ham nulam mwwgab tvk hvl bedwn. Bulv doomwq niikumho jamp alwb doonum, hoqgv bulv mwlwngv hind alwb Lwwcw Swnyiq nyiqrab wpeqnum.

²Bulv Mojesg kokwb wggam gab doomwq hoola swnyiq galoqkv baptijum nanum.

³Bulv mwlwngv yalwg wtwngam dvbamnum,

⁴ho bulv mwlwngv yalwg twwsam twwnum. Hoggab bulug lvgab wba bo yalwg wlw lwwn hoqgv iss twwnum. Soq lwwn si Kristo mwv atv su.

⁵Hvbmabde Pwnbov bulam vi yaagwn al mwwpa maanum; hoqgab bulug svmangv deexa-raraho geqs geqpwl doonum.

⁶Soq hog mwlw nyinam si ngulam kaagwl bulug al maanbo bonam nyinam hvb nyitin mvma dvb kaakin dvn.

⁷Bulug pengko hoqgv jaqgin ui panum; hoq hvb nulv nyima beka. Dvrwqbo Potangv bedwn, “Nyi tulungv dvta twwtab doanum, hoqgv daqrab banv noso soorab nyanum.”

⁸Bulug pengko ho tuugin yocu-yabio nyinum; ngulv bulug nyinam hvb nyima buj. Bulv hvb nyigam gab al lookin ho lwwyw camnyi leq oum go nyiv siknum.

⁹Bulv nyinam hvb ngulv Atwn pooka-yirka mabju, bulv Atwn pooka-yirka ko-gab bulam tuugin tvbv cexnum.

¹⁰Bulv haqnam hvbkalam nulv haqmab, hoggab bulv haqgam gab bulam sig Ao gumtwngv mengknum.

¹¹Soq mwlw si bulam nyi asaqkam kaagwl swwm dvb nyinum, ho swcw-nyodongv dubta dvk mood so ngulam hengab swwm dvb ngulug gab soq tulu sam xeqpwl ap pan.

¹²Hoqgab hiyv nyiv ngo alwb doos dvnbo mwwnbo akv duleql geqma dvb hengab jaqb dooto.

¹³Nyi tulungam nyinam pooka-yirkanam hoolu luukinv nulgab kam haadwn. Hoggab Pwnbov mwwg birwl apnam mam mwwgab dvn ho nulv heng lama dvb nulam pooka-yirka dvb mwv jiram, hvbmabde nulam pooka-yirka dvk moodam nulam cwqnan atoram jitayin, ho hoq pooka-yirkanam hoqgv kelinko lamtangam kaakin tayin.

¹⁴Hoqgab ngoqg tumanam ajin tulu, ui panam sam apaqto.

¹⁵Ngo nulam cengnbo nyivbo hvl goodwn, nulv atv ngoqg benam sam miid suka nyiato.

¹⁶Ngulam lvqcnam pvtaq gab Pwnboam paqnam hv Kristog uiyam hoq pvtaq hoqgv twwbam maadwn i?

¹⁷Hoggab ngulv mvqlw jaqkam wtwngv taqkin gotwq, gv ngvkam akin gotwq, ho wtw taqkinam dvbam dvn.

¹⁸Israel nyi tulungam kaaka to, bulv Pwnboam guun nannam, yugw hoqkam dvdo, bulv yugw hoqg ajin ma i?

¹⁹Hvb nyiloqkam ngo hognvkam begdvn i? Uiyv hvbmab ui pan nanv hog nyidwn hvl bema

²⁰hvbmabde Nyoodo nyi tulungv guun gvdwn hv Pwnbo gab ma, Pwnboam guuma dvn, hvbmab bulv ui gab guudwn hvl sulak ngo bedwn, hoqgab nulam ngo ui oram mam ajin mvdwb mwwma dvn.

²¹Nulv At Swg twwnam pvtaq hoqgv twgwi ho uiyig pvtaq hoqgv twgwi hvb twnyiram. Nulv At Swg dvnko tebolho dvg gwi, uiyig tebolho dvg gwi, vnyi bwbw ho dwjwqram.

²²Hvbmab ngulv At Swn vnyiq kaaxaq mvdwb nyitayin i? Ngulv mwam ator yaadwn hvl nulv mwwdwn i?

²³Nyinam gotwq bolo nyidub nyisdvn, hvbmabde nyinam luuxiv mwlwngv al maadwn. Nyinam gotwq bolo ngulv nyikin sudwn, hvbmab nyinam hoolu luuxiv mwlwngv swwg gab almadwn.

²⁴Nyi vxiv atwg swwgam mwwdu tamab nyi asaqg swwgam kam kaal swwto.

²⁵Bojarlo puqnam vdinam, vdin gotwq bolo dvngam ram hvl mwwta maab, mwwtaqb rvl dvto.

²⁶Hoggab, Dvrwqbo Potangv bedwn, “Gvda gvt si At Sw gv, ho soq aoso doonbo mwlwngv mwwgv.”

²⁷Kriston mwwjw maanbo nyi akgon nulam vcin dvtwk hvl mwwg namho goqbaloqkam, nulv vv hvl wdwb look baloqkam, dvtwk hvl ap jinam mam, tvi kaamy maab, dvmdvb ap jinam mam dvto.

²⁸Hvbmabde nulam goqnbo nyi akgon soq si ui panan vdin nvk hvl bekin baloqkam ham, nulam hoq nyi ak hv hvkv hvl bekin ko-gab dvmab apaqto.

²⁹Ham dvmab apaqnam hv nyiloqkam, nulv dvngam maadwn hvl mwwgam gab ma, hvbmabde hoq nyi ak hv bekinko gab dvmab apaqto. “Hvnyiloqkam, ngoqg swwnam mam ngo hoggab nyi asaqkv bvk gab apaq tayin.

³⁰Ngo Pwnboam ngoqg dvnam gab paqb nyiloqkam, nyi asaqkv ngoqg dvnam gab Pwnboam paqnam mam hoggab benyi-beya tayin?”

³¹Hoqgab, nulv hog nyitaq mwlwho, dvk twwk ho Pwnbog eminam koi koi mvdwb nyito.

³²Nyitaq mwlwho nulv hiyv nyiv jaqkam, Juhudi ge, Nyoodo nyi ge Pwnbog dvrwq namlongam nyimurl swwma beka.

³³Ngo hoggub nyil swwdwn hoq hvbjaq nyito. Ngo atwg ngoqg swwgam mwwmab nyi mwlwg swwkoram mwwdwql bulug jamp gab mwwl, bulam ywwt ywwnam mam kaapa mvdwb, ngoqg nyinam hvb nyito.