Read Nyishi 1 KORINTI 11 Bible Online

1 KORINTI 11 - Nyishi bible

1 KORINTI 11

¹Ngo Kriston kaal mwwg kokwb wnam kalam hvb nulvkam ngam kaagwl swwto.

²Nulv hog mwlw nyitaqlo ngoqg benam mam mwwgabl ngoqg gaml jinam mam bugil swwgam gab ngo nulam paqdwn.

³Kristo nyega vxig mwlwngam koi yaanbo atv, ho hoq hvbkalam nyolv mwwg nywxw mwlwngam koi yaanbo atv, ho Pwnbov Kristog aoho hoq atv. Hoq pagoq sam nulv cenam si alpa ngo mwwdwn.

⁴Hiyv nyegangv dumpongam pulub tvl xumdwn ho Pwnbog puiyam goodwn mwv Kriston hvnyw nyipadvn.

⁵Hiyv nyemv dumpongam pulub maab Pwnboam xumdwn ho Pwnbog puiyam nyi tulug agaho goodwn mwnwg atwg nyegangam xima dvn, hoggab mwn dumpo dummam reqpaqnam hvb nyidwn.

⁶Hiyv nyemv dumpo ho vj pulub dooma dvn hoq nyem akv dumpo dummam kam reqpaqto. Hvbmabde dumpo dummam reqxianam mam hvnyw mwwpa baloqkam mwn dumpongam pulub tvl dooto.

⁷Hoggab nyegangv Pwnbog yuunamv ho Pwnboam kvviyiq dvb pwnamv, hoqgab nyegangv dumpo pulub dvb nyima dvn. Hvbmabde nyemv nyegag yuutaq nanv.

⁸Hoggab nyegangv nyem galoqkv lengmanum, hvbmab nyemv nyega galoqkv lengnum,

⁹hvbkalam nyegangv nyem gab dooma dvn, hvbmabde nyega gab nyem mam pwnum.

¹⁰Ao gumtw tulungam xil nyemv atwg dumpongam pulubla mwnwg atoram kaakin dvb nyiky dvn.

¹¹Hvbsujaqkam At Swg kaagaho nyegangv nyem galoqkv ho nyemv nyega galoqkv vpwb swwla maadwn, hoq hvbkalam.

¹²Nyemv nyega galoqkv lengdwn, ho nyegangv nyem galoqkv dwr buqlinamv; hvb nyistvl mwlwngv Pwnbog galoqkv lengdwn.

¹³Nulv atv nulug hang uraho mwwdy suka nyato, nyemv dumpongam pulub maab asarb nyiig kaagaho Pwnboam xumdwb nyi rolu ho nyid nvbadw ham mwwkato.

¹⁴Nyegangv dum aaso dvb nyima dvn hv nudungv, dum aaso dvb apnamv nyega gab almadwn.

¹⁵Hvbmabde nyem gab dum aaso dvb apnam hv gumnv. Nyemam dumpo dummam aaso dvb ap mvdwb jinam si mwnwg dumpongam pulubnam dvb.

¹⁶Hvbmabde hiyv akgon soq pagoq sam haqnbo doob nyiloqkam ngoqg bedynamv, Pwnboam xumk pagoq so ngulv kam ho Pwnbog dvrwq namlo tulu hoqgv hog asaq xumcw ak doodwn hvl bedy sanam asaq so dooma.

¹⁷Sijag tomswr tagdvn so ngo nulam paqram, hoggab nulug dvrwq namlo dookumv albo bonam hilayab almanbo bon yangam nyibin do. Albo bon gab dookum maab almanbo bon gab dookum dvk hvl ngo tapa do

¹⁸Otuqjaqb, ngoqg tapanamv nulug pengko lo hang pwsaq pwsaqb mwwnam pagoqgo tapa do, soq sam jvqtwb nulug pengko lo nyidy dvnbo hvl ngo mwwjwdvn.

¹⁹(Hang pwsaqb baqnam si nulug pengko lo dooky dvb nyipa, hoggab soq nyinam soqgv hiyv kvtaq lamtab wdwn ham kaadar lala dvb aldvn.)

²⁰Nulv olum gob lokub dookum yukam, soq so At Swg swrsa dvnam mam dvtab hookum maas dvn lak, hvbmabde nyi vxiv at atwg dvsam nyi asaqkv dvma daab dvco dvn,

²¹hoqgab bulug pengko lo tuugin kano dvn, tuugin twwxum tvl rugaq dvn hvb nyidwn.

²²Hvb nyiloqkam nulug dvk-twwkv atwg nammv dooma dvn i? Hvb majaqkam nulv Pwnbog dvrwq namlongam mwwnyi-saqyal nyil jwwgw homabo nyi tulungam hvnyw nyisu dvb hvl i? Nulv ngam hog hvl betbvk hvl soq pagoq sam bedwn. Ngo nulam vjaq boknyi hvl paqtayin i? Ngo ham nyig suram!

²³At Swg galoqkv ngoqg nyegam tagabnam mam ngo kaapal nulam jisiq kunamv soq si, At Sw Jisun nyepin dvk aiho,

²⁴Mwv wtw taqg naarab banv Pwnboam paqyalinco hvl paqxo tvl ham pindub banv, mwv benum, “Soq si ngoqg gv soodinv, nulgab soq sam ngam mwwpa dvb nulv nyil doolaka.”

²⁵Hoq hvbkalam wtwngam dvxo kokw so mwv pvtaqngam naarab banv benum, “Soq si ngoqg hijum biqwr kunam Pwnbog nit pvvbv, nulv soq sam twwdy deedib, nulv ngam mwwpal nyil doolaka.

²⁶Soq si hvb loqkam nulv hog hwdgo soq wtw sam dvtayin ho hog hwdgo soq pvtaq so twwtayin, hvd kalam go At Swg hookurnam gob nulv mwwg sinam puiyam bekar dvn hvb nyidwn.

²⁷Hoqgab hiyv nyiv dviyin maatwl At Swg wtwngam dvdwn hoo twwiyin maatwl hoq twwnam pvtaqho twwdwn hoq nyi ak hv mwv At Swg gvvngam la hijum mam nyimur ko-gab yolu baqtayin.

²⁸Hoqgab vxiv nulv atv atam otuqb hindy nyato, hoq kokwb wtwngam la ho hoq pvtaq ham twwto.

²⁹Hoggab hiyv nyiv at gv vpam hendar sumab atwg gv soodinam dvb loqkam ho hoq pvtaq hoqkam twwb loqkam mwv atv hoq nyi akv yolungam atwg aoho dubum twbum ko-gab nyipup sudwn.

³⁰Hoq hvb nyik gab nulug pengko lo vigo vc cidwn ho any maab nyidwn, hoqgv vigo sinkun.

³¹Ngulv atv atam otuqb hendar sunyiloqkam ngulv Pwnbog pw-hwwnam mam kaapa maab nyil Pwnbog laqm mam baqmab nyis dvco.

³²Hvbmabde ngulam Pwnbov pw-hwwpa kun ho At Swg galoqkv ngulv laqm mam baqpakun, ho sija ngulv gvda gvtwg lvgab laqm baqba dukub nyikma, ho xuqtaql xuqxia kodwb nyima dukun.

³³Hoqgab ngoqg vbw-bor tulu, nulv hwdam hookum haapal Atwg swrsa dvnam mam dvtab dookum yukam akwn akwn gab kaayal dooto.

³⁴Hiyv nyiv kano dvn, mwv atwg namho dvtka, ho ngulv Pwnbog galoqkv yolu baqram ho laqm gokam baqdwb nyiram. Hoqgv soq aoso bidsv doonam pagoqkam ngo nulug dookub wba loqkam bixiq tayin.